ಸಂಗಾತಿ ಜತೆ ಚಾಟ್‌ ಮಾಡಲು ಚಾಟ್‌ಬಾಟ್‌ ಸೃಷ್ಟಿಸಿದ!

ಬೀಜಿಂಗ್‌: ಬಾಯ್‌ಫ್ರೆಂಡ್‌ ತನಗೆ ಸಮಯ ಕೊಡುತ್ತಿಲ್ಲ ಎಂಬುದು ಹೆಚ್ಚಿನ ಹುಡುಗಿಯರ ಕಂಪ್ಲೆಂಟ್‌. ಕಚೇರಿಯಲ್ಲಿದ್ದಾಗಲೂ, ಕೆಲಸದ ಒತ್ತಡಗಳ ನಡುವೆಯೂ ಸಂಗಾತಿ ಜತೆ ಚಾಟ್‌ ಮಾಡುತ್ತಲೇ ಇರಬೇಕು ಎಂದು ಬಯಸುತ್ತಾರೆ.

ಈ ತಲೆಬಿಸಿ ಪರಿಹಾರ ಎಂಬಂತೆ ಸಂಗಾತಿಯನ್ನು ಖುಷಿ ಪಡಿಸಲು ಚೀನಾದ ಸಾಫ್ಟ್‌ವೇರ್‌ ಇಂಜಿನೀರ್‌ ಬ್ರಿಲಿಯಂಟ್‌ ಉಪಾಯ ಕಂಡು ಹಿಡಿದಿದ್ದಾರೆ. ಕೆಲಸದಲ್ಲಿ ಬ್ಯುಸಿ ಇರುವ ವೇಳೆ ಗರ್ಲ್‌ಫ್ರೆಂಡ್‌ ಜತೆ ಚಾಟ್‌ ಮಾಡಲು ಚಾಟ್‌ಬಾಟ್‌ಅನ್ನು ಸೃಷ್ಟಿ ಮಾಡಿದ್ದಾನೆ.

ಈ ರೋಬೋಟ್‌ ಅದೆಷ್ಟು ಚೆನ್ನಾಗಿ ಮೆಸೇಜ್‌ ಮಾಡುತ್ತದೆ ಎಂದರೆ ಎಂತಹವರನ್ನು ಮರಳು ಮಾಡಿಬಿಡುತ್ತದೆ. ಬೇಬಿ ಇದು ನಮ್ಮ 618ನೇ ಭೇಟಿ. ನೀನು ಸುಂದರ ಬಿಸಿಲನ್ನು ಎಂಜಾಯ್‌ ಮಾಡುತ್ತಿದ್ದೀಯಾ ಎಂದು ಭಾವಿಸಿದ್ದೇನೆ ಎಂದೆಲ್ಲಾ ಚಾಟ್‌ಬಾಟ್‌ ಸಂದೇಶ ಕಳುಹಿಸುತ್ತದೆ.

ಚೀನಾದ ಟೆಕ್ಕಿ ಲಿ ಕಾಯ್‌ಕ್ಸಿಯಾಂಗ್‌ ಸಂಗಾತಿಯ ಮೆಸೇಜ್‌ಗಳನ್ನು ಕಡೆಗಣಿಸುತ್ತಿದ್ದೇನೆ ಎಂಬ ಭಾವನೆ ಕಾಡಿದ್ದರಿಂದ ಈ ಚಾಟ್‌ಬಾಟ್‌ ಸೃಷ್ಟಿಸಲು ಮುಂದಾಗಿದ್ದಾನೆ. ಕಚೇರಿಯಲ್ಲಿ ಒತ್ತಡದ ಕೆಲಸ ಇರುವುದರಿಂದ ಆತನಿಗೆ ಗರ್ಲ್‌ಫ್ರೆಂಡ್‌ ಜತೆ ಚಾಟ್‌ ಮಾಡಲು ಸಾಧ್ಯವಾಗುತ್ತಿರಲಿಲ್ಲ.

ಚೀನಾದ ಮೈಕ್ರೋಬ್ಲಾಗಿಂಗ್‌ ಸೈಟ್‌ ವೀಬೊ ಮೂಲಕ ಚಾಟ್‌ಬಾಟ್‌ ಸೃಷ್ಟಿಸಿ, ಕೆಲಸದ ವೇಳೆ ಬ್ಯುಸಿ ಇದ್ದಾಗ ಸಂಗಾತಿ ಜತೆ 300ಕ್ಕೂ ಹೆಚ್ಚು ಬಾರಿ ಚಾಟ್‌ ಮಾಡಿದ್ದಾನೆ ಎಂದು ಅಬಕಸ್‌ ನ್ಯೂಸ್‌ ವರದಿ ಮಾಡಿದೆ.

ಆದರೆ ಕೊನೆಗೆ ಸಂಗಾತಿಗೆ ಮೆಸೇಜ್‌ಗಳಲ್ಲಿ ಏನೋ ದೋಷವಿದೆ ಎಂಬ ಅನುಮಾನ ಬಂದಿದೆ. ಸಹಜವಾಗಿ ಬಹಳ ತಡವಾಗಿ ಉತ್ತರಿಸುತ್ತಿದ್ದಾತ ಈಗ ಬೇಗನೆ ಉತ್ತರಿಸುತ್ತಿದ್ದಾನಲ್ಲಾ ಎಂಬ ಅನುಮಾನ ಆಕೆಗೆ ದಟ್ಟವಾಗಿದೆ. ಒಮ್ಮೆ (How can I respond when there's no problem?) ಸಮಸ್ಯೆಯೇ ಇಲ್ಲದಿದ್ದಾಗ ನಾನು ಹೇಗೆ ಸ್ಪಂದಿಸಲಿ ಎಂದು ಸಂದೇಶ ರವಾನೆಯಾಗಿದೆ.

ಸಧ್ಯ ಲೀಯ ವಿಬೊ ಖಾತೆ ಡಿಲೀಟ್‌ ಆಗಿದೆ. ಆದರೆ ಸಂಗಾತಿ ಜತೆ ನಡೆಸಿದ ಚಾಟ್‌ನ ಸ್ಕ್ರೀನ್‌ಶಾಟ್‌ ಸಾಮಾಜಿಕ ತಾಣಗಳಲ್ಲಿ ವೈರಲ್‌ ಆಗಿದೆ. ಇದೀಗ ಹೆಚ್ಚಿನ ಯುವಕರು ಲೀಯ ಬೆನ್ನು ಬಿದ್ದಿದ್ದಾರೆ. ನಮಗೂ ಅಂತಹ ಒಂದು ಚಾಟ್‌ಬಾಟ್‌ ಬೇಕು ಎಂದು ದುಂಬಾಲು ಬಿದ್ದಿದ್ದಾರಂತೆ!.