ಮುತ್ತು ಕೊಡಲು ಹೋಗಿ ನದಿಗೆ ಬಿದ್ದ ಜೋಡಿ: ವೀಡಿಯೋ ವೈರಲ್‌

ಹೊಸದಿಲ್ಲಿ: ಮದುವೆಗೆ ಮುನ್ನ ಪ್ರೀವೆಡ್ಡಿಂಗ್ ಫೋಟೋಗ್ರಫಿ ಸೆಷನ್ ಮಾಡುವುದು ಇತ್ತೀಚಿನ ನವ ವಿವಾಹಿತರಿಗೆ ಟ್ರೆಂಡ್‌ ಆಗಿದೆ. ಮದುವೆಯಾಗುತ್ತಿರುವ ಹೊಸ ಜೋಡಿಯ ರೊಮ್ಯಾನ್ಸ್ ಹಾಗೂ ಪ್ರೀತಿಯನ್ನು ಸೆರೆ ಹಿಡಿಯುವುದು ಅದರ ಉದ್ದೇಶ. ಆದರೆ, ಕೇರಳದ ಜೋಡಿಯೊಬ್ಬರ ಪ್ರೀ ವೆಟ್ಟಿಂಗ್ ಫೋಟೋ ಶೂಟ್‌ ಬೇರೆ ಕಾರಣಕ್ಕೆ ವೀಡಿಯೋ ವೈರಲ್‌ ಆಗಿದೆ.

ನಾವೆ ಅಥವಾ ಸಣ್ಣದೋಣಿಯಲ್ಲಿ ಕುಳಿತಿದ್ದ ಜೋಡಿ ಮುತ್ತು ಕೊಡಬೇಕು ಎನ್ನುವಷ್ಟರಲ್ಲಿ ಇಬ್ಬರೂ ನದಿಗೆ ಬಿದ್ದಿದ್ದಾರೆ. ಈ ವಿನೋದದ ಘಟನೆ ಅಂತರ್ಜಾಲದಲ್ಲಿ ಅನೇಕರ ಗಮನ ಸೆಳೆದಿದೆ.

ಈ ಜೋಡಿಯನ್ನು ಟಿಜಿನ್ ಥಂಕಾಚೆನ್ ಹಾಗೂ ಶಿಲ್ಪಾ ಎಂದು ಗುರುತಿಸಲಾಗಿದ್ದು, ಇವರಿಬ್ಬರೂ ಮೇ 6ರಂದು ವಿವಾಹವಾಗಲಿದ್ದಾರೆ. ಪಥನಥಿಟ್ಟ ಜಿಲ್ಲೆಯ ಪಂಬಾ ನದಿಯ ದಂಡೆಯಲ್ಲಿ ಫೋಟೋ ಶೂಟ್‌ ನಡೆಯುತ್ತಿದ್ದಾಗ ಈ ಘಟನೆ ಸಂಭವಿಸಿದೆ ಎಂದು ತಿಳಿದುಬಂದಿದೆ.

ಸಣ್ಣದೋಣಿಯಲ್ಲಿ ಕುಳಿತಿದ್ದ ಜೋಡಿಗೆ ಫೋಟೋಗ್ರಾಫರ್ ಸೂಚನೆಗಳನ್ನು ನೀಡುತ್ತಿದ್ದುದ್ದನ್ನು ವೀಡಿಯೋದಲ್ಲಿ ನೋಡಬಹುದು. ಮೊದಲಿಗೆ ಪ್ಲಾನ್‌ನಂತೆ ತಮ್ಮ ತಲೆಗಳ ಮೇಲೆ ಬಾಳೆಎಲೆಯನ್ನು ಜೋಡಿ ಇಟ್ಟುಕೊಂಡಿದ್ದರು. ಅಲ್ಲಿ ನೀರು ಅವರ ಮೇಲೆ ಬೀಳುತ್ತಿರುತ್ತದೆ. ಬಳಿಕ ಮುತ್ತು ಕೊಡಲು ಅವರು ಹೇಳುತ್ತಾರೆ.

ಆದರೆ, ಟಿಜಿನ್ ಶಿಲ್ಪಾರತ್ತ ಮುತ್ತು ಕೊಡಲು ಹೋಗುತ್ತಿದ್ದಂತೆ ಇಬ್ಬರೂ ಬ್ಯಾಲೆನ್ಸ್ ತಪ್ಪಿ ದೋಣಿಯಿಂದ ನದಿಗೆ ಬೀಳುತ್ತಾರೆ. ಇನ್ನು, ಈ ಬಗ್ಗೆ ಮಾಹಿತಿ ನೀಡಿದ ಫೋಟೋಗ್ರಾಫರ್, ಬೀಳುವುದು ಕೂಡ ಪ್ಲಾನ್‌ನಲ್ಲಿತ್ತು. ಆದರೆ, ಆ ಜೋಡಿಗೆ ಈ ಟ್ವಿಸ್ಟ್‌ ಅನ್ನು ಹೇಳಿರಲಿಲ್ಲ ಎಂದು ತಿಳಿಸಿದ್ದಾರೆ.



ಈ ವೀಡಿಯೋವನ್ನು 1.9 ಲಕ್ಷಕ್ಕೂ ಅಧಿಕ ಜನ ಆ ಕಂಪನಿಯ ಫೇಸ್‌ಬುಕ್‌ ಪೇಜ್‌ನಲ್ಲಿ ನೋಡಿದ್ದಾರೆ. ಅಲ್ಲದೆ, ಈ ಪೋಸ್ಟ್‌ಗೆ 4 ಸಾವಿರಕ್ಕೂ ಹೆಚ್ಚು ಲೈಕ್ಸ್ ಸಿಕ್ಕಿದೆ.