ಪೊಲೀಸ್‌ ಆಗ್ಬೇಕೆಂದ 7 ವರ್ಷದ ಮಗಳಿಗೆ, ಆಕೆಯ ವ್ಹೀಲ್‌ಚೇರನ್ನೇ ಪೊಲೀಸ್‌ ಜೀಪಂತೆ ಮಾಡಿಕೊಟ್ಟ ತಂದೆ!

ಮಗಳಿಗೆ ಪೊಲೀಸ್‌ ಪಡೆ ಸೇರಬೇಕೆಂದು ಆಸೆ. ಭವಿಷ್ಯದಲ್ಲಿ ಅದು ಸಾಧ್ಯವಿಲ್ಲ ಎಂಬ ಸತ್ಯ ಗೊತ್ತಿರುವ ತಂದೆ. ಆದರೆ ಮಗಳೆಂದರೆ ಪ್ರಾಣ. ಆಕೆ ಕೇಳಿದ್ದೆಲ್ಲವನ್ನೂ ನೀಡಬೇಕು ಎಂಬ ಒತ್ತಾಸೆ.

ಕಿಡ್ನಿ ಮತ್ತು ದೃಷ್ಟಿ ವೈಫಲ್ಯದಿಂದ ಬಳುತ್ತಿರುವ 7 ವರ್ಷದ ಮಗಳಿಗೆ ಪೊಲೀಸ್‌ ಜೀಪಿನಲ್ಲಿ ಓಡಾಡುವ ಅನುಭವ ನೀಡಲು ಆಕೆಯ ತಂದೆ ಮಾಡಿದ ಐಡಿಯಾಗೆ ನೆಟ್ಟಿಗರು ತಲೆದೂಗಿದ್ದಾರೆ. ಮಗಳ ತಳ್ಳು ಗಾಡಿಯನ್ನೇ ಪೊಲೀಸ್‌ ಜೀಪ್‌ನಂತೆ ವಿನ್ಯಾಸಿಸಿ, ಆಕೆಗೆ ಪೊಲೀಸ್‌ ಉಡುಗೆ ತೊಡಿಸಿದ್ದಾರೆ. ಮುಗ್ಧ ಮಗಳು ಪೊಲೀಸ್‌ ಜೀಪ್‌ನಲ್ಲಿ ಕುಳಿತು, ಥೇಟ್‌ ಲೇಡಿ ಪೊಲೀಸ್‌ ಆಫೀಸರ್‌ನಂತೆ ಪೋಸು ನೀಡಿದ್ದಾಳೆ.

ಪೊಲೀಸ್‌ ಜೀಪ್‌ನಂತೆ ವಿನ್ಯಾಸಗೊಳಿಸಿದ ವ್ಹೀಲ್‌ ಚೇರ್‌ನಲ್ಲಿ ಸಂಚರಿಸುವಾಗ ಸ್ಥಳೀಯ ಪೊಲೀಸರು ತಡೆದಿದ್ದಾರೆ. ಮುಂದೆ ಅದೇ ಪೊಲೀಸ್‌ ಅಧಿಕಾರಿ ಪುಟಾಣಿ ಪೊಲೀಸ್‌ ಜತೆಗೆ ಫೋಟೋಗೆ ಪೋಸ್‌ ನೀಡುತ್ತ ಖುಷಿಯಾಗಿ ಕಾಲ ಕಳೆದಿದ್ದಾರೆ.

ಅಮೆರಿಕದ ಥೋರ್ಟನ್‌ ಪೊಲೀಸ್‌ ಠಾಣೆಯ ಅಧಿಕಾರಿ ಜಾನ್‌ ಕಾರ್ಟರ್‌ 7 ವರ್ಷದ ಪುಟಾಣಿ ಪೊಲೀಸ್‌ ಅಧಿಕಾರಿ ಹ್ಯಾಲೇ ಹಾಕ್‌ ಜತೆಗೆ ಫೋಟೋಗಳನ್ನು ತೆಗೆಸಿಕೊಂಡಿದ್ದಾರೆ. ಈ ಚಿತ್ರಗಳನ್ನು ಥೋರ್ಟನ್‌ ಪೊಲೀಸ್‌ ಕಚೇರಿ ತನ್ನ ಅಧಿಕೃತ ಟ್ವೀಟರ್‌ ಖಾತೆಯಲ್ಲಿ ಹಂಚಿಕೊಂಡಿದೆ. ಪೊಲೀಸ್‌ ಪಡೆ ಸೇರಿದ್ದಕ್ಕೆ ಧನ್ಯವಾದಗಳು. ನಿನ್ನ ಜತೆ ಕೆಲಸ ಮಾಡಲು ನಮಗೆ ಹೆಮ್ಮೆಯಾಗುತ್ತದೆ ಎಂದಿದ್ದಾರೆ.