ನಾಯಿ ಡೇಟಿಂಗ್‌ಗೂ ಬಂತು ಆ್ಯಪ್‌ !

ಬೆಂಗಳೂರು: ನಿಮ್ಮ ಮನೆಯ ನಾಯಿ ಒಂಟಿತನದಿಂದಾಗಿ ಮಂಕಾಗಿದೆಯೇ ? ಚಿಂತಿಸದಿರಿ, ಸಮೀಪದ ಪ್ರದೇಶದಲ್ಲಿ ಅದರೊಂದಿಗೆ ಬೆರೆಯಲು ಜೋಡಿಯೊಂದನ್ನು ಹುಡುಕುವುದು ಇನ್ನು ಸುಲಭ. ಇದಕ್ಕೆಂದೇ ಬೆಂಗಳೂರು ನಿವಾಸಿಯಾಗಿರುವ ವ್ಯಕ್ತಿಯೊಬ್ಬರು ‘ಪೆಟ್ಸ್‌ಆ್ಯಪ್‌’( petsapp) ಹೆಸರಿನ ಆ್ಯಪ್‌ ಸಿದ್ಧಪಡಿಸಿದ್ದಾರೆ.

ಪಗ್‌, ಲ್ಯಾಬ್ರಡಾರ್‌, ಬೀಗಲ್‌ ಇತ್ಯಾದಿ ವಿದೇಶಿ ತಳಿಯ ನಾಯಿಗಳಿಗೆ ಜೋಡಿ ಹುಡುಕಲು ಈ ಆ್ಯಪ್‌ ನೆರವಾಗಲಿದೆ. ಗೂಗಲ್‌ಪ್ಲೇಸ್ಟೋರ್‌ನಲ್ಲಿ ‘ಪೆಟ್ಸ್‌ಆ್ಯಪ್‌’ ಲಭ್ಯವಿದೆ. ಆ್ಯಂಡ್ರಾಯ್ಡ್‌ ಫೋನ್‌ಗಳಲ್ಲಿ ಇದು ಕಾರ್ಯ ನಿರ್ವಹಿಸುತ್ತದೆ. ಆ್ಯಪ್‌ ಡೌನ್‌ಲೋಡ್‌ ಮಾಡಿಕೊಂಡು ಪ್ರಾಥಮಿಕ ಮಾಹಿತಿ ಒದಗಿಸಿ ಪ್ರೊಫೈಲ್‌ ಕ್ರಿಯೇಟ್‌ ಮಾಡಿಕೊಂಡಲ್ಲಿ ನಿಮ್ಮ ನಾಯಿಗೆ ಜೊತೆಗಾರ/ಜೊತೆಗಾತಿಯನ್ನು ಹುಡುಕಬಹುದಾಗಿದೆ.

ಈ ಆ್ಯಪ್‌ಅನ್ನು ಅಭಿವೃದ್ಧಿಪಡಿಸಿದವರು ಅಖಿಲ್‌ ನಾಥ್‌ ಮತ್ತು ಸುಜಾತಾ ಕುರ್ಕೇಜಾ. ವರ್ಷದ ಹಿಂದೆ ಅಖಿಲ್‌ನಾಥ್‌ ಅವರು ಕುಟುಂಬದಿಂದ ಪ್ರತ್ಯೇಕಗೊಂಡು ಹೊರ ಬಂದಾಗ ಅವರ ಜತೆ ಕರೆ ತಂದ ಬೀಗಲ್‌ ತಳಿಯ ‘ಮೊಫಿ’ ಒಂಟಿತನದಿಂದ ಮಂಕಾಗಿತ್ತು. ತುಂಬು ಕುಟುಂಬದಲ್ಲಿದ್ದಾಗ 6 ನಾಯಿಗಳು ಜತೆಗಿರುತ್ತಿದ್ದವು. ಇದಕ್ಕೆ ಪರಿಹಾರ ಕಂಡು ಹಿಡಿಯುವ ನಿಟ್ಟಿನಲ್ಲಿ ಯೋಚಿಸಿದಾಗ ‘ಆ್ಯಪ್‌’ ಸಿದ್ಧಪಡಿಸುವ ಆಲೋಚನೆ ಹೊಳೆದಿದೆ.

ಬೆಂಗಳೂರು/ ಚೆನ್ನೈನಲ್ಲಿ ನೆಲೆ ಹೊಂದಿರುವ ಕಂಪನಿಯೊಂದರ ನೆರವಿನೊಂದಿಗೆ ಆ್ಯಪ್‌ ಸಿದ್ಧಪಡಿಸಿದ್ದಾರೆ. ಅದರ ಮೂಲಕವೇ ಸಮೀಪದ ಪ್ರದೇಶದಲ್ಲೇ ‘ಮೊಫಿ’ ಜತೆ ಕಾಲ ಕಳೆಯಲು ಜೋಡಿಯೊಂದನ್ನು ಹುಡುಕಿಕೊಂಡಿದ್ದಾರೆ.

‘ಆ್ಯಪ್‌ ಸದ್ಯ ಬೀಟಾ ವರ್ಶನ್‌ನಲ್ಲಿದ್ದು, ಆ್ಯಂಡ್ರಾಯ್ಡ್‌ ಫೋನ್‌ಗಳಲ್ಲಿ ಮಾತ್ರ ಕಾರ್ಯ ನಿರ್ವಹಿಸುತ್ತದೆ. ಮುಂದಿನ ತಿಂಗಳಲ್ಲಿ ಇತರ ಆಪರೇಟಿಂಗ್‌ ಸಿಸ್ಟ್ಟಮ್‌ನಲ್ಲೂ ಸಾಫ್ಟ್‌ವೇರ್‌ ಕಾರ್ಯ ನಿರ್ವಹಿಸುವಂತೆ ರೂಪಿಸಲಾಗುವುದು. ಪರಿಸರದಲ್ಲಿ ಸಾಕುಪ್ರಾಣಿ (ನಾಯಿ/ಬೆಕ್ಕು)ಯನ್ನು ಹುಡುಕುವ ಸೌಲಭ್ಯದ ಜತೆಗೆ, ಕಳೆದು ಹೋದ ಮತ್ತು ಪತ್ತೆಯಾದ ಸಾಕುಪ್ರಾಣಿ ಮಾಹಿತಿ, ದತ್ತು ಪಡೆಯಲು ವೇದಿಕೆ, ಸಾಕುಪ್ರಾಣಿಗಳಿಗೆ ಅಗತ್ಯ ಆಹಾರ, ವಸ್ತು ಮಾರುವ ಅಂಗಡಿ ಇತ್ಯಾದಿ ಮಾಹಿತಿ ಆ್ಯಪ್‌ನಲ್ಲಿ ಲಭ್ಯವಿದೆ' ಎಂದು ಅಖಿಲ್‌ನಾಥ್‌ ಮಾಹಿತಿ ನೀಡಿದರು.

‘ಒಮ್ಮೆ ಆ್ಯಪ್‌ ಡೌನ್‌ಲೋಡ್‌ ಮಾಡಿ ಸೈನ್‌ಅಪ್‌ ಮಾಡಿದಲ್ಲಿ 10 ಕಿ.ಮೀ. ವ್ಯಾಪ್ತಿಯಲ್ಲಿರುವ ಇತರ ಸಾಕುಪ್ರಾಣಿಗಳ ಫೋಟೊಗಳು ಕಾಣ ಸಿಗುತ್ತವೆ. ಸಾಕಪ್ರಾಣಿಗಳ ಮಾಲೀಕರ ಜತೆ ಚಾಟ್‌ ಮಾಡುವ ಅವಕಾಶವನ್ನು ಒದಗಿಸಲಾಗಿದೆ’ ಎಂದರು.