ಟಿಂಡರ್ ಆ್ಯಪ್‌ನಲ್ಲಿ ಯುವಕ - ಯುವತಿ ನಡುವೆ ವಾಗ್ವಾದ: ರಾಷ್ಟ್ರಪತಿ ಭವನಕ್ಕೆ ಬಾಂಬ್ ಇಡ್ತೀನಿ ಎಂದ ಯುವತಿ?

ಹೊಸದಿಲ್ಲಿ: ಟಿಂಡರ್ ಡೇಟಿಂಗ್ ಆ್ಯಪ್‌ನಲ್ಲಿ ಹುಡುಗ - ಹುಡುಗಿ ಅನೇಕ ವಿಚಾರಗಳ ಬಗ್ಗೆ ಮಾತನಾಡುತ್ತಾರೆ. ಇನ್ನು, ಅವರಿಬ್ಬರ ನಡುವೆ ಪ್ರೀತಿ ಮೂಡಿ ನಂತರ ಬ್ರೇಕಪ್ ಆದರಂತೂ ಯಾವ ರೀತಿ ಬೇಕಾದರೂ ಕೊನೆಯಾಗಬಹುದು. ಆದರೆ, ರಾಷ್ಟ್ರ ರಾಜಧಾನಿ ಹೊಸದಿಲ್ಲಿಯಲ್ಲಿ ಹುಡುಗ - ಹುಡುಗಿ ನಡುವಿನ ಬ್ರೇಕಪ್‌ ರಾಷ್ಟ್ರೀಯ ಬೆದರಿಕೆಯ ವಿಚಾರವಾಗಿದೆ. ಅದು ಹೇಗೆ ಅಂತೀರಾ? ಈ ಸ್ಟೋರಿ ನೋಡಿ.

ಪೂರ್ವ ದಿಲ್ಲಿಯ ಲಕ್ಷ್ಮೀ ನಗರ ಪ್ರದೇಶದ ಚಾರ್ಟಡ್ ಅಕೌಂಟೆಂಟ್‌ ಆಕಾಂಕ್ಷಿಯೊಬ್ಬ ಟಿಂಡರ್ ಆ್ಯಪ್‌ನಲ್ಲಿ ಯುವತಿಯೊಬ್ಬಳ ಜತೆ ಮಾತುಕತೆ ನಡೆಸುತ್ತಿರುವಾಗ ಶಾಕ್ ಆಗಿದ್ದಾನೆ. ಯಾಕೆಂದರೆ ಅವರಿಬ್ಬರ ಜಗಳಕ್ಕೆ ರಾಷ್ಟ್ರಪತಿ ಭವನಕ್ಕೆ ಬಾಂಬ್ ಇಡುವುದಾಗಿ ಯುವತಿ ಬೆದರಿಕೆ ಹಾಕಿದ್ದಾಳಂತೆ.

ಈ ಸಂಬಂಧ ಪೊಲೀಸ್ ಕಂಟ್ರೋಲ್ ರೂಂಗೆ ಕರೆ ಮಾಡಿದ ಆತ ದಿಲ್ಲಿ ಪೊಲೀಸರಿಗೆ ದೂರು ನೀಡಿದ್ದಾನೆ. ಬುಧವಾರ ( ಫೆಬ್ರವರಿ 20, 2019) ರ ರಾತ್ರಿ 10.30ರ ವೇಳೆಗೆ ವ್ಯಕ್ತಿ ಈ ದೂರು ನೀಡಿದ್ದಾನೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ನಂತರ, ದಿಲ್ಲಿ ಪೊಲೀಸ್ ವಿಶೇಷ ದಳ, ಗುಪ್ತಚರ ಇಲಾಖೆ ಹಾಗೂ ಸ್ಥಳೀಯ ಪೊಲೀಸರು ಆತನನ್ನು ವಿಚಾರಣೆ ಮಾಡಿದ್ದಾರೆ.

ಟಿಂಡರ್ ಡೇಟಿಂಗ್ ಆ್ಯಪ್‌ನಲ್ಲಿ ತನ್ನ ಹಾಗೂ ಆ ಯುವತಿಯೊಂದಿಗೆ ವಾಗ್ವಾದ ನಡೆಯಿತು. ಆ ವೇಳೆ, ''ನಾನು ಯಾರೆಂದು ನಿನಗೆ ಗೊತ್ತಿಲ್ಲ. ದಿಲ್ಲಿಯಲ್ಲಿ ಪರಮಾಣು ದಾಳಿ ಹಾಗೂ ರಾಷ್ಟ್ರಪತಿ ಭವನಕ್ಕೆ ಬಾಂಬ್ ಇಟ್ಟು ಉಡಾಯಿಸಿದಾಗ ನಿನಗೆ ಗೊತ್ತಾಗುತ್ತದೆ'' ಎಂದು ಆಕೆ ಹೇಳಿದ್ದಾಳೆಂದು ವ್ಯಕ್ತಿ ಪೊಲೀಸರಿಗೆ ತಿಳಿಸಿದ್ದಾನೆಂದು ಪಿಟಿಐ ವರದಿ ಮಾಡಿದೆ.

ಇನ್ನು, ಆ ಯುವತಿ ಈ ರೀತಿ ಹೇಳುತ್ತಿದ್ದಂತೆ ದಿಲ್ಲಿಯ ಲಕ್ಷ್ಮೀ ನಗರ ಪ್ರದೇಶದ ಚಾರ್ಟಡ್ ಅಕೌಂಟೆಂಟ್‌ ಆಕಾಂಕ್ಷಿ ಪೊಲೀಸರಿಗೆ ಕರೆ ಮಾಡಿ ಘಟನೆ ಬಗ್ಗೆ ತಿಳಿಸಿದ್ದಾನೆ ಎನ್ನಲಾಗಿದೆ. ಆದರೆ, ಹೆಚ್ಚಿನ ವಿಚಾರಣೆ ಬಳಿಕ ತಿಳಿದು ಬಂದಿದ್ದೇನೆಂದರೆ ಆ ವ್ಯಕ್ತಿಯೇ ಒಬ್ಸೆಸೀವ್ ಕಂಪಲ್ಸೀವ್ ಡಿಸಾರ್ಡರ್‌ ( ಮಾನಸಿಕ ಕಾಯಿಲೆ) ನಿಂದ ಬಳಲುತ್ತಿದ್ದಾನೆ ಹಾಗೂ ಚಿಕಿತ್ಸೆ ಪಡೆಯುತ್ತಿದ್ದಾನೆ ಎಂದು ತಿಳಿದುಬಂದಿದೆ.

ಹೀಗಾಗಿ, ಈ ಬೆದರಿಕೆಯೇ ಸುಳ್ಳು ಎಂದು ಪೊಲೀಸರು ಅಭಿಪ್ರಾಯಪಟ್ಟಿದ್ದಾರೆ. ಆದರೂ ಕೂಡ ಆ ಯುವತಿ ಬಗ್ಗೆ ಹೆಚ್ಚಿನ ಮಾಹಿತಿ ಕಲೆಹಾಕಲು ಟಿಂಡರ್ ಮೂಲಕ ಪ್ರಯತ್ನ ಮಾಡುತ್ತಿದ್ದಾರೆ ಎಂದು ತಿಳಿದುಬಂದಿದೆ.