ಕಣ್ಮರೆಯಾದ ದ್ವೀಪ, ಹುಡುಕಾಡುತ್ತಿರುವ ಜಪಾನ್‌!

ಅಚ್ಚರಿ ಎಂಬಂತೆ ಜಪಾನ್‌ನ ದ್ವೀಪವೊಂದು ಕಣ್ಮರೆಯಾಗಿದೆ. ಇದೀಗ ಕಾಣೆಯಾಗಿರುವ ದ್ವೀಪದ ಹುಡುಕಾಟದಲ್ಲಿದೆ ಜಪಾನ್‌ ಸರಕಾರ.

ಜಪಾನ್‌ನಲ್ಲಿರುವ ವಾಸ ಯೋಗ್ಯವಲ್ಲದ 158 ದ್ವೀಪಗಳ ಪೈಕಿ ಇದೂ ಒಂದು. ಇಸಾಂಬೆ ಹನಕಿಟ ಕೊಜಿಮ(Esanbe Hanakita Kojima) ಎಂದು ಗುರುತಿಸಲ್ಪಡುವ ದ್ವೀಪ ಎಲ್ಲಿದೆ ಎಂದೇ ಯಾರಿಗೂ ಗೊತ್ತಿಲ್ಲ. ಸರುಫುಟ್ಸು ಎಂಬ ಪ್ರದೇಶದಿಂದ ಸುಮಾರು 500 ಮೀಟರ್‌ ದೂರದಲ್ಲಿದ್ದ ಈ ದ್ವೀಪ ಏನಾಯಿತೆಂದು ಯಾರಿಗೂ ಗೊತ್ತಿಲ್ಲ.

ತಜ್ಞರ ಪ್ರಕಾರ ದ್ವೀಪವು ಸಾಗರದಾಳಕ್ಕೆ ಕುಸಿದಿದೆ. ಹತ್ತಿರದ ಪ್ರದೇಶದಲ್ಲಿದ್ದ ಮಂದಿಗೂ ಗೊತ್ತಾಗದಂತೆ ಕಣ್ಮರೆಯಾಗಿದೆಯಂತೆ.

ಇಸಾಂಬೆ ಹನಕಿಟ ಕೊಜಿಮ ಪ್ರದೇಶವು ಜಪಾನ್‌ನ ಉತ್ತರ ಭಾಗದಲ್ಲಿದೆ. ಇದು ಜಪಾನ್‌ ಮತ್ತು ರಷ್ಯಾ ಮಧ್ಯೆ ಇದೆ. ಪೆಸಿಪಿಕ್‌ ಯುದ್ಧದ ನಂತರ ಈ ದ್ವೀಪವನ್ನು ರಷ್ಯಾ ವಶಪಡಿಸಿಕೊಂಡಿತ್ತು.

ಈ ದ್ವೀಪ ಕಣ್ಮರೆಯಾದ ಬಗ್ಗೆ ಬೆಳಕಿಗೆ ಬಂದಿದ್ದು ಸೆಪ್ಟಂಬರ್‌ ತಿಂಗಳಲ್ಲಿ. ಜಪಾನ್‌ನಲ್ಲಿರುವ ದ್ವೀಪಗಳ ಬಗ್ಗೆ ಪುಸ್ತಕ ಬರೆಯುತ್ತಿರುವ ಲೇಖಕ ಹಿರೋಶಿ ಶಿಮಿಜು ಅವರು ಸರುಫುಟ್ಸು ಪ್ರದೇಶಕ್ಕೆ ತೆರಳಿದ್ದಾಗ ದ್ವೀಪ ಕಣ್ಮರೆಯಾಗಿರುವುದು ಗಮನಕ್ಕೆ ಬಂದಿದೆ.

ಸ್ಥಳೀಯ ಮೀನುಗಾರರು ದ್ವೀಪವಿದ್ದ ಪ್ರದೇಶಕ್ಕೆ ಬೋಟ್‌ಗಳಲ್ಲಿ ತೆರಳಿ ಹುಡುಕಿದಾಗ ಪೂರ್ತಿ ದ್ವೀಪವೇ ಕಣ್ಮರೆಯಾಗಿರುವುದು ಅರಿವಿಗೆ ಬಂದಿದೆ. ದಶಕಗಳ ಹಿಂದಷ್ಟೇ ಕೆಲವು ಮೀನುಗಾರರು ಈ ದ್ವೀಪಕ್ಕೆ ಭೇಟಿ ನೀಡಿದ್ದ ಬಗ್ಗೆ ತಿಳಿಸಿದ್ದಾರೆ.

1987ರಲ್ಲಿ ಸಮೀಕ್ಷೆ ನಡೆಸಿದ್ದಾಗ ಸಮುದ್ರದ ಮೇಲ್ಭಾಗದಿಂದ 1.4 ಮೀಟರ್‌ ಎತ್ತರದಲ್ಲಿತ್ತು. ಇದೀಗ ಜಪಾನ್‌ ಸರಕಾರ ದ್ವೀಪದ ಹುಡುಕಾಟ ನಡೆಸಿದೆ.