ವಿಶ್ವ ದಾಖಲೆ ಮಾಡಲು ಅಡ್ಡಿಯಾಗಿದ್ದಕ್ಕೆ ಹಲ್ಲು ಕೀಳಿಸಿಕೊಂಡ ಅಜ್ಜ

ಹೊಸದಿಲ್ಲಿ: ಈ ಅಜ್ಜನಿಗೆ ಏನಾದರೂ ವಿಶ್ವ ದಾಖಲೆ ಮಾಡುವ ಆಸೆ. ಮೈ ತುಂಬಾ ಸುಮಾರು 366 ರಾಷ್ಟ್ರಧ್ವಜಗಳ ಹಚ್ಚೆ ಹಾಕಿಸಿಕೊಂಡು ಒಂದು ವಿಶ್ವ ದಾಖಲೆ ಮಾಡಿದರೆ, ಬಾಯಿಯಲ್ಲಿ 500 ಸ್ಟ್ರಾಗಳನ್ನು ಒಮ್ಮೆಯೇ ಇಟ್ಟುಕೊಂಡು ಮತ್ತೊಂದು ದಾಖಲೆ ಮಾಡಿದ್ದಾರೆ. ಅದಕ್ಕೆ ಅವರು ಇರುವ ಹಲ್ಲುಗಳನ್ನೂ ಕೀಳಿಸಿಕೊಂಡಿದ್ದಾರೆ.

ಇದುವರೆಗೆ ಸುಮಾರು 20 ವಿಶ್ವ ದಾಖಲೆಗಳನ್ನು ಮಾಡಿರುವುದಾಗಿ ಹೇಳಿಕೊಳ್ಳುತ್ತಿರುವ ಹರ್ ಪ್ರಕಾಶ್ ರಿಷಿ, ತಮ್ಮನ್ನು ಗಿನ್ನೀಸ್ ರಿಷಿ ಎಂದೇ ಕರೆದುಕೊಳ್ಳುತ್ತಾರೆ. ರಾಷ್ಟ್ರದ ರಾಜಧಾನಿಯ ಸಿನಿಮಾ ಹಾಲ್‌ನಲ್ಲಿ 1942ರಲ್ಲಿ ಜನಿಸಿದ ರಿಷಿ, ತಮ್ಮಿಬ್ಬರು ಸ್ನೇಹಿತರೊಂದಿಗೆ 1990ರಲ್ಲಿ ಸುಮಾರು 1,001 ಗಂಟೆಗಳ ಕಾಲ ಬೈಕ್ ಚಲಾಯಿಸಿ, ಗಿನ್ನೀಸ್ ದಾಖಲೆ ಮಾಡಿದರು.

ಅಲ್ಲಿಂದ ಸ್ಟಾರ್ಟ್ ಆಯಿತು ರಿಷಿಗೆ ಗಿನ್ನೀಸ್ ರೆಕಾರ್ಡ್ ಮಾಡುವ ಹುಚ್ಚು. ಅದಕ್ಕಾಗಿಯೇ ಚಿತ್ರ ವಿಚಿತ್ರ ಕಾರ್ಯಗಳನ್ನು ಮಾಡಲು ಮುಂದಾದರು. ಹೊಸದಿಲ್ಲಿಯಿಂದ ಸ್ಯಾನ್‌ ಫ್ರಾನ್ಸಿಸ್ಕೋಗೆ ಫಿಜ್ಜಾ ಡೆಲಿವರಿ ಮಾಡಿದ್ದರಿಂದ ಹಿಡಿದು, ಟೊಮ್ಯಾಟೋ ಕೆಚಪ್ ಅನ್ನು ಕೇವಲ ನಾಲ್ಕೇ ನಿಮಿಷಗಳಲ್ಲಿ ಕುಡಿದು, ದಾಖಲೆ ನಿರ್ಮಿಸಿದರು.

ದಾಖಲೆ ನಿರ್ಮಿಸಿದ ಪತ್ನಿ: ಕೇವಲ ರಿಷಿ ಮಾತ್ರವಲ್ಲ, ಇವರ ಪತ್ನಿಯೂ ದಾಖಲೆ ಮಾಡುವುದರಲ್ಲಿ ಎತ್ತಿದ ಕೈ. 1991ರಲ್ಲಿ 'ಆಲ್ ಟು ಸನ್' ಎಂಬ ಅತ್ಯಂತ ಪುಟ್ಟದಾದ ಉಯಿಲು ಪತ್ರ ಬರೆಯುವ ಮೂಲಕ ದಾಖಲೆ ನಿರ್ಮಿಸಿದ್ದಾರೆ.

ವಾಹನ ಬಿಡಿಭಾಗಗಳ ತಯಾರಕರಾದ ರಿಷಿ, 500 ಸ್ಟ್ರಾಗಳನ್ನು ಬಾಯಲ್ಲಿಟ್ಟುಕೊಳ್ಳುವ ದಾಖಲೆ ಮಾಡಲು ಕಷ್ಟವಾಯಿತೆನ್ನುತ್ತಾರೆ.

'496 ಸ್ಟ್ರಾಗಳನ್ನು ಬಾಯಲ್ಲಿಕೊಂಡು ವಿಶ್ವ ದಾಖಲೆ ಮಾಡಿದ್ದೆ. ಮತ್ತೊಂದಿಷ್ಟನ್ನು ತೂರಿಸಲು ಕಷ್ಟವಾಯಿತು. ಆ ಕಾರಣ ಎಲ್ಲ ಹಲ್ಲುಗಳನ್ನೂ ಕೀಳಿಸಿಕೊಂಡೆ,' ಎನ್ನುತ್ತಾರೆ ದಾಖಲೆ ವೀರ.

ಇದೀಗ ಮೈ ಮೇಲೆ ಪ್ರಧಾನಿ ಮೋದಿ, ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮಾ, ಬ್ರಿಟನ್ ರಾಣಿ ಎಲಿಜಬೆತ್ ಮತ್ತು ಮಹಾತ್ಮ ಗಾಂಧಿ ಸೇರಿ ಜಗದ್ವಿಖ್ಯಾತ ನಾಯಕರ ಹಚ್ಚೆಗಳನ್ನು ಹಾಕಿಸಿಕೊಂಡು, ಎಲ್ಲರ ಗಮನವನ್ನು ತಮ್ಮತ್ತ ಸೆಳೆದುಕೊಳ್ಳುತ್ತಿದ್ದಾರೆ.