ಪ್ರತಿದಿನ ID Card ಮರೆತು ಹೋಗುತ್ತಿದ್ದ, ಅದಕ್ಕಾಗಿ ಈ ಕ್ರೇಜಿ ಹುಡುಗ ಮಾಡಿದ್ದೇನು ಗೊತ್ತಾ!

ಹನೋಯ್: ಶಾಲೆ, ಕಾಲೇಜು ಅಥವಾ ಆಫೀಸಿಗೆ ಹೋಗುವ ಹೆಚ್ಚಿನ ಜನರನ್ನು ಕಾಡುವ ಸಾಮಾನ್ಯ ಸಮಸ್ಯೆ ಎಂದರೆ ಐಡಿ ಕಾರ್ಡ್ ಮರೆತು ಹೋಗುವುದು. ಕೆಲಸಕ್ಕೆ ಹೋಗುವವರಿಗಂತೂ ಐಡಿ ಕಾರ್ಡ್ ಮರೆತಿದ್ದಾರೆ ಎಂದರೆ ಅಂದಿನ ಹಾಜರಾತಿ ಮಿಸ್ ಆದ ಹಾಗೆ. ವಿಯೆಟ್ನಾಂನ ಈ ಹುಡುಗನಿಗೂ ಇದೇ ಸಮಸ್ಯೆ ಇತ್ತು. ಕಾರ್ಡ್ ಮರೆತು ಹೋಗುವುದರಿಂದ ಅವನಿಗೆ ಎದುರಾಗುತ್ತಿದ್ದ ಅತಿ ದೊಡ್ಡ ಸಮಸ್ಯೆ ಎಂದರೆ ಮದ್ಯ ಖರೀದಿಯದು. ಗುರುತಿನ ಚೀಟಿ ಇಲ್ಲದಿದ್ದರೆ ಬಾರ್‌ನಲ್ಲಿ ಮದ್ಯ ಕೊಡುತ್ತಿರಲಿಲ್ಲ.

ಪಾಪ. ನಿಜಕ್ಕೂ ಇದು ಬಹುದೊಡ್ಡ ಸಮಸ್ಯೆಯೇ ಬಿಡಿ! ಕೊನೆಗೂ ಈ ಮಹಾತ್ಮ ತನ್ನ ಕಷ್ಟಕ್ಕೆ ಪರಿಹಾರ ಕಂಡುಕೊಂಡ. ಇದು ಎಷ್ಟು ವಿಭಿನ್ನ ಪರಿಹಾರವಾಗಿತ್ತು ಎಂದರೆ ವಿಶ್ವದಾದ್ಯಂತ ಸಾಮಾಜಿಕ ಜಾಲತಾಣದಲ್ಲಿ ಇಂದಿದು ಚರ್ಚೆಯಾಗುತ್ತಿದೆ. ತನ್ನ ಕೈ ಮೇಲಾತ ಗುರುತಿನ ಚೀಟಿಯ ಹಚ್ಚೆ ಹಾಕಿಸಿಕೊಂಡ. ಇದೀಗ ವೈರಲ್ ಆಗಿದೆ.

ಹೇಗೆ ಹುಟ್ಟಿತು ಈ ಐಡಿಯಾ?


ಅವನ ಗೆಳೆಯರು ಹೇಳುವ ಪ್ರಕಾರ ಕೆಲ ದಿನಗಳ ಹಿಂದೆ ಎಲ್ಲ ಸ್ನೇಹಿತರು ಒಂದು ಕ್ಲಬ್‌ನಲ್ಲಿ ಸೇರಿದ್ದರು . ಅಲ್ಲಿ ಅವರಿಗೆ ಮದ್ಯ ಕೊಡಲು ನಿರಾಕರಿಸಲಾಯಿತು. ಈ ಮಹಾನುಭಾವ ಅಂದು ಕೂಡ ತನ್ನ ಐಡಿ ಕಾರ್ಡ್ ಬಿಟ್ಟು ಬಂದಿದ್ದ. ಪದೇ ಪದೇ ಈ ಸಮಸ್ಯೆ ಕಾಡುತ್ತಿದೆ ಎಂದು ಅಂದೇ ಆತ ಕೈ ಮೇಲೆ ಹಚ್ಚೆ ಹಾಕಿಸಿಕೊಳ್ಳಲು ನಿರ್ಧರಿಸಿದ.

ಹಚ್ಚೆ ಬಿಡಿಸಲು ನಿರಾಕರಿಸಿದ್ದ ಕಲಾವಿದ

ಈತ ತನ್ನ ಕೈ ಮೇಲೆ ಹಚ್ಚೆ ಬಿಡಿಸೆಂದು ಕಲಾವಿದನ ಬಳಿ ಹೇಳಿದಾಗ ಆತ ಒಪ್ಪಿರಲಿಲ್ಲ. ಆದರೀತ ಹಠ ಬಿಡಲಿಲ್ಲ. ಕೊನೆಗೆ ಬರೋಬ್ಬರಿ 1 ಗಂಟೆಯ ಪರಿಶ್ರಮದ ಬಳಿಕ ಈತನ ಕೈ ಮೇಲೆ ಹಚ್ಚೆ ಮೂಡಿತು.