ಟೋಲ್‌ ಬೂತ್‌ನಿಂದ ಹಣ ಎಗರಿಸಿ ಎಸ್ಕೇಪ್‌ ಆದ ಕೋತಿ; ಸಿಬ್ಬಂದಿ ಶಾಕ್ (ವೀಡಿಯೋ ನೋಡಿ)

ಕಾನ್ಪುರ: ಹೆದ್ದಾರಿಗಳಲ್ಲಿ ಹಾಗೂ ಹೆದ್ದಾರಿಯ ಟೋಲ್‌ ಬೂತ್‌ಗಳಲ್ಲಿ ಕಳ್ಳತನ ನಡೆಯುವ ಹಲವು ಪ್ರಕರಣಗಳು ವರದಿಯಾಗಿವೆ. ಆದರೆ, ಕೋತಿಯೊಂದು ಟೋಲ್‌ ಬೂತ್‌ನಲ್ಲಿ ಹಣ ಕಳ್ಳತನ ಮಾಡಿ ಎಸ್ಕೇಪ್‌ ಆಗಿರುವ ವೀಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗುತ್ತಿದ್ದು ಅಚ್ಚರಿ ಮೂಡಿಸುವಂತಿದೆ.

ಉತ್ತರ ಪ್ರದೇಶದ ಕಾನ್ಪುರ ನಗರ ದೇಹತ್ ಪ್ರದೇಶದ ಅಕ್ಬಾರ್‌ಪುರ ಕೋಟ್ವಾಲಿಯ ಬಾರಾ ಟೋಲ್‌ ಪ್ಲಾಜಾದಲ್ಲಿ ಏಪ್ರಿಲ್ 25ರಂದು ಈ ಘಟನೆ ನಡೆದಿದೆ. ಕೋತಿ 5 ಸಾವಿರ ರೂ. ಹಣ ಕಳ್ಳತನ ಮಾಡಿರುವ ಸಂಪೂರ್ಣ ದೃಶ್ಯಾವಳಿ ಟೋಲ್‌ ಬೂತ್‌ನಲ್ಲಿ ಅಳವಡಿಸಿರುವ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿದ್ದು, ಈ ವೀಡಿಯೋ ಇಂಟರ್‌ನೆಟ್‌ನಲ್ಲಿ ವೈರಲ್‌ ಆಗಿದೆ.

ವೀಡಿಯೋ ಇಲ್ಲಿದೆ ನೋಡಿ:


ನೀವು ವೀಡಿಯೋದಲ್ಲಿ ನೋಡುತ್ತಿರುವಂತೆ ಬಿಳಿಯ ಕಾರೊಂದು ಟೋಲ್‌ ಬೂತ್‌ನಲ್ಲಿ ನಿಲ್ಲುತ್ತದೆ. ನಂತರ, ಕಾರಿನ ಕಿಟಕಿಯಿಂದ ಕೋತಿ ಹೊರಬಂದು ಬೂತ್ ಒಳಗೆ ನುಗ್ಗುತ್ತದೆ. ಹನುಮ ಸ್ವರೂಪಿ ಕೋತಿ ಬೂತ್ ಒಳಗೆ ಬಂದಿದ್ದನ್ನು ನೋಡಿ ಟೋಲ್ ಬೂತ್ ಸಿಬ್ಬಂದಿ ನಗುತ್ತಾರೆ. ಆದರೆ, ಸಿಬ್ಬಂದಿಯ ಭುಜದ ಮೇಲೆ ಏರಿದ ಕೋತಿ ಕ್ಯಾಶ್‌ ರೆಜಿಸ್ಟರ್‌ನಲ್ಲಿದ್ದ ನೋಟಿನ ಬಂಡಲನ್ನು ಎತ್ತಿಕೊಂಡು ಆ ಜಾಗದಿಂದ ಎಸ್ಕೇಪ್‌ ಆಗುತ್ತದೆ.

ಆ ರೀತಿಯ ಕಳ್ಳತನ ಮಾಡಲು ಕೋತಿಗೆ ತರಬೇತಿ ನೀಡಲಾಗಿತ್ತು ಎಂದು ತಿಳಿದುಬಂದಿದೆ. ಸುಮಾರು 5 ಸಾವಿರ ರೂ. ನಗದನ್ನು ಕೋತಿ ಕಳ್ಳತನ ಮಾಡಿರುವುದು ತಿಳಿದುಬಂದಿದೆ.

ಈ ಸಂಬಂಧ ಮಾಹಿತಿ ನೀಡಿದ ಬಾರಾ ಟೋಲ್ ಪ್ಲಾಜಾದ ಅಸಿಸ್ಟೆಂಟ್ ಜನರಲ್‌ ಮ್ಯಾನೇಜರ್ ಮನೋಜ್ ಶರ್ಮಾ, ''ಈ ಹಿಂದೆಯೂ ಕೋತಿ ಹಣದೊಂದಿಗೆ ಪರಾರಿಯಾಗಿರುವ ಎರಡು ಘಟನೆಗಳು ನಡೆದಿತ್ತು'' ಎಂದು ಹೇಳಿಕೊಂಡಿದ್ದಾರೆ. ಅಲ್ಲದೆ, ಘಟನೆ ಸಂಬಂಧ ಪೊಲೀಸರಿಗೆ ದೂರು ನೀಡಲಾಗಿದ್ದು, ಪೊಲೀಸರು ಈ ಕೇಸಿನ ತನಿಖೆ ನಡೆಸುತ್ತಿದ್ದಾರೆ.

ಆದರೆ, ಈ ಘಟನೆಯಿಂದ ಗಾಬರಿಯಾದ ಹಲವು ಟೋಲ್ ಸಿಬ್ಬಂದಿ ಕೆಲಸಕ್ಕೆ ಹೋಗಲು ಭಯ ಪಡುತ್ತಿದ್ದಾರೆ ಎಂದು ತಿಳಿದುಬಂದಿದೆ.