ಒಂದು ಎಕರೆ ಭೂಮಿಯನ್ನು ಪ್ರವಾಹ ಸಂತ್ರಸ್ತರಿಗೆ ದಾನ ಮಾಡಿದ ಬಾಲಕಿ

ಕಣ್ಣೂರ್‌: ದೇವರ ನಾಡು ಅಕ್ಷರಶಃ ನರಕವಾಗಿದೆ. ಪ್ರವಾಹದ ಏಟಿಗೆ ಸಿಲುಕಿ ಇಡೀ ಕೇರಳವೇ ಛಿದ್ರ-ಛಿದ್ರವಾಗಿರುವ ದೃಶ್ಯ ಮನ ಕಲಕುವಂತಿದೆ. ಸಂತ್ರಸ್ತರ ಕಷ್ಟಕ್ಕೆ ಮಿಡಿದ ಅನೇಕ ಮಾನವೀಯತೆ ಮುಖಗಳು ತಮ್ಮ ಕೈಲಾದ ಸಹಾಯ ಮಾಡಿ ನೆರವಾಗುತ್ತಿದ್ದಾರೆ. ಆದರೆ ಕೆಲವರ ಉದಾರತೆ ಸೆಲೆಬ್ರಿಟಿಗಳನ್ನು ಮೀರಿಸಿದೆ.

ಕಣ್ಣೂರಿನ ಪಯನೂರಿನ ಬಾಲಕಿಯೊಬ್ಬಳು ತನಗೆ ಸೇರಿದ್ದ ಒಂದು ಎಕರೆ ಜಾಗವನ್ನು ಸಂತ್ರಸ್ತರಿಗೆ ನೀಡುವ ಮೂಲಕ ತನ್ನ ಸಹಾಯ ಹಸ್ತ ಚಾಚಿದ್ದಾರೆ.

ಈ ಬಾಲಕಿ ಹೆಸರು ಸ್ವಾಹಾ, ಪಯನೂರಿನಲ್ಲಿ 9ನೇ ತರಗತಿಯಲ್ಲಿ ಓದುತ್ತಿರುವ ಸ್ವಾಹಾ ಹಾಗೂ ಆಕೆಯ ಸಹೋದರ ಬ್ರಹ್ಮ ಇಬ್ಬರು ಸೇರಿ ತಮ್ಮ ತಂದೆ ನಮ್ಮ ಭವಿಷ್ಯಕ್ಕಾಗಿ ಮಾಡಿಟ್ಟ ಜಾಗದಲ್ಲಿ ಒಂದು ಎಕರೆ ಜಾಗವನ್ನು ದಾನ ಮಾಡಲು ನಿರ್ಧರಿಸಿರುವುದಾಗಿ ಪತ್ರ ಬರೆದಿದ್ದಾರೆ.

ತುಂಬಾ ಚಿಕ್ಕ ಪ್ರಾಯದಲ್ಲಿಯೇ ಸಂತ್ರಸ್ತರ ಕಷ್ಟಕ್ಕೆ ಸ್ಪಂದಿಸಿದ ಬಾಲಕಿ, ಸಂತ್ರಸ್ತರ ಪಾಲಿಗೆ ದಾನ ದೇವತೆಯೇ ಆಗಿದ್ದಾಳೆ.