'ಸುಂದರ್‌ಬನ್'ನಲ್ಲಿ ಕಾಣಿಸಿಕೊಂಡಿದೆ ಅಪರೂಪದ ವೈಟ್ ಕಿಂಗ್ ಫಿಷರ್

ಕೋಲ್ಕತ್ತಾ: ಸುಂದರ್‌ಬನ್‌ನಲ್ಲಿ ಕಳೆದ ವಾರ ಬಿಳಿ ಕಿಂಗ್ ಫಿಷರ್ (ಮಿಂಚುಳ್ಳಿ) ಪತ್ತೆಯಾಗಿದ್ದು ನಗರದ ಪಕ್ಷಿ ವೀಕ್ಷಕರ ಕುತೂಹಲ ಗರಿಗೆದರಿದಂತಾಗಿದೆ. ಕೆಲವರು ಈ ಪ್ರದೇಶದಲ್ಲಿ ಶ್ವೇತ ವರ್ಣದ ಕಿಂಗ್ ಫಿಷರ್ ಕಂಡುಬಂದಿದ್ದು ಇದೇ ಮೊದಲೆನ್ನುತ್ತಿದ್ದರೆ, ಮತ್ತೆ ಕೆಲವರು ರಾಜ್ಯದಲ್ಲಿಯೇ ಮೊದಲ ಬಾರಿಗೆ ಇದು ಕಂಡುಬಂದಿದೆ ಎನ್ನುತ್ತಿದ್ದಾರೆ.

ಆದಾಗ್ಯೂ, ಇದು ಬಿಳಿಯಾಗಿರುವುದರಿಂದ ಯಾವ ಜಾತಿಗೆ ಸೇರಿದ್ದೆಂದು ನಿರ್ಧರಿಸಲು ಪಕ್ಷಿ ವೀಕ್ಷಕರು ವಿಫಲವಾದರು. ನಾವಿದನ್ನು ಮೊದಲ ಬಾರಿಗೆ ನೋಡಿದ್ದು ಸೆಪ್ಟೆಂಬರ್ 20ರಂದು. ಬಳಿಕ ಇತರ ಕೆಲ ಪ್ರವಾಸಿಗರು ಸಹ ಇದನ್ನು ಗಮನಿಸಿದರು. ಬಹುಶಃ ಸುಂದರ್‌ಬನ್‌ನಲ್ಲಿ ಬಿಳಿ ಮಿಂಚುಳ್ಳಿ ಕಾಣಸಿಕೊಂಡಿದ್ದು ಇದೇ ಮೊದಲು, ಎನ್ನುತ್ತಾರೆ ವನ್ಯಜೀವಿ ಛಾಯಾಗ್ರಾಹಕ ಮತ್ತು ಪರಿಸರವಾದಿ ಸೌಮ್ಯಜಿತ್ ನಂದಿ.

ಬಿಳಿ ಕಿಂಗ್ ಫಿಷರ್ ಕಾಣಿಸಿಕೊಳ್ಳುವುದೇ ಅಪರೂಪವೆನ್ನುತ್ತಾರೆ ಪಕ್ಷಿ ಶಾಸ್ತ್ರಜ್ಞರು. ಜಲಮೂಲ ಮಲಿನಗೊಂಡರೆ ಕಿಂಗ್ ಫಿಷರ್ ನೆಲೆಗೆ ಧಕ್ಕೆ ಬರುತ್ತದೆ. ಶುದ್ಧ ನೀರಿನ ಪರಿಸರದ ಸುತ್ತಮುತ್ತ ಇವುಗಳ ಸಂತಾನೋತ್ಪತ್ತಿ ನಡೆಯುತ್ತದೆ. ಪರಿಸರದ ಶುದ್ಧತೆಯನ್ನು ಅಳೆಯುವ ಈ ಜಲಜೀವಿಗಳನ್ನು ಸಂರಕ್ಷಿಸುವ ಅಗತ್ಯವಿದೆ.