ಈತನಿಗಿದ್ದರು 4 ಗರ್ಲ್ ಫ್ರೆಂಡ್ಸ್, ಇಂಪ್ರೆಸ್ ಮಾಡಲು ಕದಿಯುತ್ತಿದ್ದ ಹೊಸ ಹೊಸ ಕಾರು

ಗುರುಗ್ರಾಮ: ಹರಿಯಾಣ ಪೊಲೀಸರು ಗುರುವಾರ 22 ವರ್ಷದ ಕಾರ್ ಕಳ್ಳನೊಬ್ಬನನ್ನು ಬಂಧಿಸಿದ್ದಾರೆ. ಆತ ದಿಲ್ಲಿ ಮತ್ತು ಗುರುಗ್ರಾಮದಲ್ಲಿ ಅನೇಕ ದಿನಗಳಿಂದ ನಡೆಯುತ್ತಿದ್ದ ಕಾರ್ ಕಳ್ಳತನ ಪ್ರಕರಣದಲ್ಲಿ ಪೊಲೀಸರಿಗೆ ಬೇಕಾಗಿದ್ದ.

ಆರೋಪಿಯನ್ನು ಸನಮ್ ಅಲಿಯಾಸ್ ಸಚಿನ್ ಎಂದು ಗುರುತಿಸಲಾಗಿದ್ದು , ಆತ ಜನರಿಗೆ ಬಣ್ಣದ ಮಾತುಗಳಿಂದ ಮರಳು ಮಾಡಿ ಅವರ ಕೀ ಎಗರಿಸಿ ಗಾಡಿಗಳನ್ನು ಕದ್ದು ಪರಾರಿಯಾಗುತ್ತಿದ್ದ. ಆತ ಕಾರ್ ಕದಿಯುತ್ತಿದ್ದುದು ಯಾಕೆ ಗೊತ್ತಾ?

ಆರೋಪಿಗೆ ಒಂದಲ್ಲ, ಎರಡಲ್ಲ, ನಾಲ್ಕು ಗರ್ಲ್ ಫ್ರೆಂಡ್ಸ್ ಇದ್ದಾರಂತೆ. ಅವರನ್ನು ಇಂಪ್ರೆಸ್ ಮಾಡಲು ಅವರು ಹೊಸ ಹೊಸ ಕಾರು ಕದಿಯುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಏಪ್ರಿಲ್ 2018ರಲ್ಲಿ ಈತನನ್ನು ಇದೇ ಆರೋಪದ ಮೇಲೆ ಬಂಧಿಸಲಾಗಿತ್ತು. 3 ತಿಂಗಳು ಜೈಲಲ್ಲಿದ್ದ ಆತ ಜಾಮೀನು ಪಡೆದು ಹೊರ ಹೋಗಿದ್ದ. ಜೈಲಿಗೆ ಹೋಗಿ ಬಂದರೂ ಆತ ತನ್ನ ಹಳೆಯ ಚಾಳಿಯನ್ನು ಬಿಡಲಿಲ್ಲ. ಗುರುಗ್ರಾಮದಿಂದ 7 ಮತ್ತು ದಿಲ್ಲಿಯಿಂದ ಒಂದು ಗಾಡಿಯನ್ನು ಕದ್ದಿದ್ದ. ಇವೆರಡು ಸ್ಥಳಗಳಲ್ಲಿ ಆತನ ವಿರುದ್ಧ ಕಳ್ಳತನಕ್ಕೆ ಸಂಬಂಧಿಸಿದ 20 ಪ್ರಕರಣಗಳು ದಾಖಲಾಗಿವೆ.

ಇತ್ತೀಚಿಗೆ ಗಾಯವಾಗಿರುವ ನೆಪ ಮಾಡಿಕೊಂಡು ವೈದ್ಯರ ಬಳಿ ಹೋಗಿದ್ದ ಆತ, ಅವರು ಚಿಕಿತ್ಸೆ ನೀಡುವಾಗ ಗಾಡಿ ಕೀ ಕದ್ದು ಪರಾರಿಯಾಗಿದ್ದ. ಹೊಟೇಲ್ ಮತ್ತು ಆಸ್ಪತ್ರೆಯ ಪಾರ್ಕಿಂಗ್‌ನಿಂದ ಆತ ಅನೇಕ ಕಾರುಗಳನ್ನು ಕದ್ದಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.