ಫೆಸಿಫಿಕ್ ಮಹಾಸಾಗರದ ಮಧ್ಯೆ 3 ಗಂಟೆಗಳ ಕಾಲ ತೇಲುತ್ತ ಪ್ರಾಣ ಉಳಿಸಿಕೊಂಡ. ಹೇಗೆ ಗೊತ್ತಾ? (ವೀಡಿಯೋ ನೋಡಿ)

ನ್ಯೂಯಾರ್ಕ್: ನ್ಯೂಜಿಲೆಂಡ್‌ ಕರಾವಳಿಯ 20 ಮೈಲು ದೂರದಲ್ಲಿ ಫೆಸಿಫಿಕ್‌ ಮಹಾ ಸಾಗರದಲ್ಲಿ ಸಿಲುಕಿದ್ದ ಜರ್ಮನಿಯ ವ್ಯಕ್ತಿಯೊಬ್ಬ ಮೂರು ಗಂಟೆಗೂ ಅಧಿಕ ಕಾಲ ನೀ(ರಿನಲ್ಲಿ ತೇಲಾಡಿಕೊಂಡೇ ಜೀವ ಉಳಿಸಿಕೊಂಡಿದ್ದಾನೆ. ತಾನು ಧರಿಸಿದ್ದ ಜೀನ್ಸ್ ಪ್ಯಾಂಟ್‌ ಮೂಲಕವೇ ಬಚಾವಾಗಿದ್ದಾನೆ.

ಹೌದು, ನ್ಯೂಜಿಲೆಂಡ್‌ನ ಆಕ್ಲೆಂಡ್‌ನಿಂದ ಬ್ರೆಜಿಲ್‌ಗೆ 12 ಮೀಟರ್‌ ಎತ್ತರದ ಯಾಚ್(ದೋಣಿ) ಮಾರಲು ತನ್ನ ಸಹೋದರನ ಜತೆ ಹೋಗುತ್ತಿದ್ದಾಗ ದೋಣಿ ದುರಂತ ಸಂಭವಿಸಿದೆ. ಆ ವೇಳೆ, 30 ವರ್ಷದ ಆರ್ನೆ ಮುರ್ಕೆ ಮಹಾ ಸಾಗರದಲ್ಲಿ ಬಿದ್ದಿದ್ದು, ಮೂರು ಗಂಟೆಗೂ ಅಧಿಕ ಕಾಲ ಆತ ಮಹಾ ಸಾಗರದಲ್ಲಿ ತೇಲಿಕೊಂಡೇ ಇದ್ದ ವಿಸ್ಮಯಕಾರಿ ಘಟನೆ ಬೆಳಕಿಗೆ ಬಂದಿದೆ.

ದೋಣಿ ಅಪಘಾತ ನಡೆದಿದ್ದ ಕೆಲವು ಕ್ಷಣಗಳ ಬಳಿಕವೇ ಮುರ್ಕೆಯ ಸಹೋದರ ಲೈಫ್‌ಜಾಕೆಟ್‌ ಅನ್ನು ತನ್ನ ಸಹೋದರನತ್ತ ಎಸೆದಿದ್ದರೂ ಪ್ರಬಲವಾದ ಅಲೆಗಳ ನಡುವೆ ಅದನ್ನು ತೆಗೆದುಕೊಳ್ಳಲು ಸಹ ಆತನಿಗೆ ಸಾಧ್ಯವಾಗಲಿಲ್ಲ. ಹೀಗಾಗಿ, ಲೈಫ್‌ ಜಾಕೆಟ್‌ ತೇಲಿಕೊಂಡು ದೂರ ಸಾಗಿದೆ. ಆ ವೇಳೆ ನ್ಯೂಜಿಲೆಂಡ್‌ನ ಪೂರ್ವಕರಾವಳಿಯ ಟೊಲಾಗಾ ಬೇನಿಂದ 20 ಮೈಲುಗಳಷ್ಟು ದೂರದಲ್ಲಿ ಮುರ್ಕೆ ಸಿಲುಕಿಕೊಂಡು ಪ್ರಾಣ ಉಳಿಸಿಕೊಳ್ಳಲು ಹರಸಾಹಸ ಪಡುತ್ತಿದ್ದ.

ಆದರೆ, ಕೆಲವೇ ಕ್ಷಣಗಳಲ್ಲಿ ತಲೆ ಓಡಿಸಿದ ಆತ ತನ್ನ ಜೀನ್ಸ್ ಪ್ಯಾಂಟ್‌ ಅನ್ನೇ ತೇಲುವ ಸಾಧನವನ್ನಾಗಿ ಮಾಡಿಕೊಂಡು ಫೆಸಿಫಿಕ್ ಮಹಾಸಾಗರದ ಪ್ರಬಲವಾದ ಅಲೆಗಳಿಗೆ ಪ್ರತಿರೋಧವೊಡ್ಡಲು ಯಶಸ್ವಿಯಾಗಿದ್ದಾನೆ. ಮೂರು ಗಂಟೆಗಳ ಕಾಲ ಜೀನ್ಸ್‌ ಪ್ಯಾಂಟ್‌ ಅನ್ನು ತೇಲುವ ಸಾಧನವನ್ನಾಗಿ ಬಳಸಿಕೊಂಡು ಆತ ಜೀವ ಉಳಿಸಿಕೊಂಡಿದ್ದಾನೆ. ನಂತರ, ಕಡಲ ತೀರದ ರಕ್ಷಕರು ಆತನನ್ನು ರಕ್ಷಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಈ ಸಂಬಂಧ ಮಾತನಾಡಿದ ಮುರ್ಕೆ, ''ಜೀನ್ಸ್ ಪ್ಯಾಂಟ್ ಅನ್ನು ತೇಲುವ ಸಾಧನವನ್ನಾಗಿ ಬಳಸಿಕೊಳ್ಳುವ ಟ್ರಿಕ್ಸ್ ತನಗೆ ಗೊತ್ತಿತ್ತು. ಜೀನ್ಸ್ ಪ್ಯಾಂಟ್‌ ಇಲ್ಲದಿದ್ದರೆ ತಾನು ಬದುಕುತ್ತಿರಲಿಲ್ಲ'' ಎಂದು ಹೇಳಿಕೊಂಡಿದ್ದಾನೆ.

''ದೀರ್ಘವಾದ ಉಸಿರು ಎಳೆದುಕೊಂಡು, ಜೀನ್ಸ್ ಪ್ಯಾಂಟ್‌ ಅನ್ನು ಬಿಚ್ಚಿ, ಕಾಲುಗಳ ತುದಿಯಲ್ಲಿ ಗಂಟುಗಳನ್ನಾಗಿ ಮಾಡಿಕೊಂಡೆ. ನಂತರ, ಜೀನ್ಸ್ ಪ್ಯಾಂಟ್‌ ಅನ್ನೇ ಉಬ್ಬಿಸಿ, ನೀರಿನಿಂದ ಮೇಲೆಳೆದು, ಒಳಗೆ ಗಾಳಿ ಹೋಗುವಂತೆ ಮಾಡಿದೆ. ನಂತರ, ನೀರಿನೊಳಗೆ ಪ್ಯಾಂಟ್‌ ಅನ್ನು ತಳ್ಳಿದೆ. ಅದರಿಂದ ಲೈಫ್‌ ಜಾಕೆಟ್‌ ರೀತಿಯಲ್ಲಿ ತನ್ನ ಜೀವ ಉಳಿಸಿಕೊಂಡೆ'' ಎಂದು ಮುರ್ಕೆ ತಿಳಿಸಿದ್ದಾನೆ.

ಕಳೆದ ಬುಧವಾರ (ಮಾರ್ಚ್ 6, 2019)ರಂದು ಈ ಘಟನೆ ನಡೆದಿದ್ದು, ದೋಣಿ ಅಪಘಾತ ನಡೆದ ಮೂರೂವರೆ ಗಂಟೆ ಬಳಿಕ ಮುರ್ಕೆಯನ್ನು ಪತ್ತೆ ಹಚ್ಚಲಾಗಿತ್ತು. ಬಳಿಕ ಆತನನ್ನು ರಕ್ಷಿಸಿದ ಲೋವ್‌ ಕಾರ್ಪೊರೇಷನ್‌ ರೆಸ್ಕ್ಯೂ ಹೆಲಿಕಾಪ್ಟರ್‌ ಟ್ರಸ್ಟ್ ನವರು ಆತನನ್ನು ಕಾಪಾಡಿದ ವೀಡಿಯೋವನ್ನು ಫೇಸ್‌ಬುಕ್‌ನಲ್ಲಿ ಶೇರ್ ಮಾಡಿಕೊಂಡಿದ್ದರು. ಈ ವೀಡಿಯೋವನ್ನು ಲಕ್ಷಾಂತರ ನೆಟ್ಟಿಗರು ವೀಕ್ಷಣೆ ಮಾಡಿದ್ದು ಹಲವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.