ಅನ್ಯ ಜಾತಿಯ ಯುವಕನ ಜತೆ ಅಫೇರ್ ಇಟ್ಟುಕೊಂಡಿದ್ದಕ್ಕೆ ಮಹಿಳೆಗೆ ಗ್ರಾಮಸ್ಥರು ಮಾಡಿದ್ದೇನು ಗೊತ್ತಾ?

ಜಬುವಾ: ಅನ್ಯ ಜಾತಿಯ ಯುವಕನ ಜತೆ ಸಂಬಂಧ ಇಟ್ಟುಕೊಂಡಿದ್ದಕ್ಕೆ ಯುವತಿಗೆ ಆಕೆಯ ಊರಿನ ಗ್ರಾಮಸ್ಥರು ಅವಮಾನ ಮಾಡಿರುವ ಘಟನೆ ಮಧ್ಯಪ್ರದೇಶಸಲ್ಲಿ ನಡೆದಿದೆ. ಯುವಕನನ್ನು ಆ ಮಹಿಳೆ ಹೊತ್ತುಕೊಂಡು ಹೋಗುವಂತೆ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.

ಮಧ್ಯಪ್ರದೇಶ ರಾಜಧಾನಿ ಭೋಪಾಲ್‌ನಿಂದ ಸುಮಾರು 340 ಕಿ.ಮೀ ದೂರದಲ್ಲಿರುವ ಜಬುವಾ ಜಿಲ್ಲೆಯಲ್ಲಿ ಈ ಘಟನೆ ನಡೆದಿದೆ. ಬೇರೆ ಜಾತಿಯ ವ್ಯಕ್ತಿಯ ಜತೆಗೆ ಸಂಬಂಧ ಇಟ್ಟುಕೊಂಡಿದ್ದಕ್ಕೆ ಸುಮಾರು 20ರ ಆಸುಪಾಸಿನಲ್ಲಿರುವ ಮಹಿಳೆಗೆ ಆಕೆಯ ಊರಿನ ಗ್ರಾಮಸ್ಥರು ಅವಮಾನ ಮಾಡಿದ್ದಾರೆ. ಅಲ್ಲದೆ, ಯುವಕನನ್ನು ಆಕೆಯ ಭುಜದ ಮೇಲೆ ಹೊತ್ತುಕೊಂಡು ಹೋಗುವಂತೆ ಗ್ರಾಮಸ್ಥರು ಮಾಡಿದ್ದಾರೆ. ಯುವತಿ ಯುವಕನನ್ನು ಹೊತ್ತುಕೊಂಡು ತಿರುಗುತ್ತಿದ್ದರೆ ಗ್ರಾಮಸ್ಥರು ಕೇಕೆ ಹಾಕಿ ನಗುತ್ತಿದ್ದರು.

ಘಟನೆಯ ವೀಡಿಯೋ ವೈರಲ್‌ ಆದ ಬಳಿಕ ಈ ವಿಚಾರ ಬೆಳಕಿಗೆ ಬಂದಿದೆ. ವ್ಯಕ್ತಿಯನ್ನು ತನ್ನ ಭುಜದ ಮೇಲೆ ಹೊತ್ತುಕೊಂಡಿದ್ದ ಮಹಿಳೆಯನ್ನು ನಡೆಯುತ್ತಲೇ ಇರುವಂತೆ ಗ್ರಾಮಸ್ಥರು ಒತ್ತಾಯಿಸುತ್ತಿರುವುದು ವೀಡಿಯೋದಲ್ಲಿ ಸೆರೆಯಾಗಿದೆ. ಆಕೆ ಸ್ವಲ್ಪ ಹೊತ್ತು ಅಲ್ಲೇ ನಿಂತರೂ ಗ್ರಾಮಸ್ಥರು ಕೂಗಾಡಿ ಆಕೆಯನ್ನು ನಡೆಯುವಂತೆ ಮಾಡುತ್ತಿದ್ದರು. ಅಲ್ಲದೆ, ಆ ಪರಿಸ್ಥಿತಿಯನ್ನು ನೋಡಿ ಅಲ್ಲಿನ ಜನರು ಕೇಕೆ ಹಾಕಿ ನಗುತ್ತಿದ್ದರು ಎಂಬುದು ಸಹ ವೀಡಿಯೋದಲ್ಲಿ ದಾಖಲಾಗಿದೆ.

ಈ ಸಂಬಂಧ ಪೊಲೀಸರು ಸ್ವಯಂ ಪ್ರೇರಿತವಾಗಿ ಕೇಸ್ ದಾಖಲಿಸಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ. ಈ ಬಗ್ಗೆ ಮಾಹಿತಿ ನೀಡಿದ ಜಬುವಾ ಎಸ್‌ಪಿ ವಿನೀತ್ ಜೈನ್, ''ಜಬುವಾದ ದೇವಿಗಢ ಗ್ರಾಮದ ಗುಂಪಿನಲ್ಲಿದ್ದ ಹಲವು ಜನರು ಮಹಿಳೆಗೆ ಅಗೌರವ ತೋರಿದ್ದಾರೆ. ಈ ಹಿನ್ನೆಲೆ ಆ ಎಲ್ಲರ ವಿರುದ್ಧ ಕೇಸ್‌ ದಾಖಲಿಸಿಕೊಂಡಿದ್ದು, ಈಗಾಗಲೇ ಇಬ್ಬರನ್ನು ಬಂಧಿಸಲಾಗಿದೆ. ಅಲ್ಲದೆ, ಉಳಿದ ಎಲ್ಲರನ್ನೂ ಸೆರೆ ಹಿಡಿಯಲು ಯತ್ನಿಸುತ್ತಿದ್ದೇವೆ'' ಎಂದೂ ಮಾಹಿತಿ ನೀಡಿದ್ದಾರೆ.