ವೇಗವಾಗಿ ಟುಕ್‌ ಟುಕ್‌ ಚಲಾಯಿಸಿ ಗಿನ್ನೆಸ್‌ ದಾಖಲೆ ಸೃಷ್ಟಿಸಿದ ಯುಕೆ ಉದ್ಯಮಿ

ಆಟೋ ರಿಕ್ಷಾವನ್ನು ಅತಿ ಹೆಚ್ಚು ವೇಗವಾಗಿ ಚಲಾಯಿಸಿ ಯುನೈಟೆಡ್‌ ಕಿಂಗ್‌ಡಮ್‌ ಮೂಲದ ಉದ್ಯಮಿಯೊಬ್ಬರು ಹೊಸ ಗಿನ್ನೆಸ್‌ ವಿಶ್ವ ದಾಖಲೆ ಸೃಷ್ಟಿಸಿದ್ದಾರೆ.

46 ವರ್ಷದ ಎಸ್ಸೆಕ್ಸ್ ಮೂಲದ ಉದ್ಯಮಿ ಮ್ಯಾಟ್‌ ಎವೆರಾರ್ಡ್ ತಾನು ಇ ಬೇ ಯಲ್ಲಿ ಕೊಂಡುಕೊಂಡ ಮೂರು ಚಕ್ರದ ಥಾಯ್‌ ಟುಕ್‌ ಟುಕ್‌ ವಾಹನದಲ್ಲಿ ಒಂದು ಗಂಟೆಗೆ 74.306 ಮೈಲುಗಳಷ್ಟು ವೇಗವಾಗಿ ವಾಹನ ಚಲಾಯಿಸಿ ನೂತನ ದಾಖಲೆ ಸೃಷ್ಟಿಸಿದ್ದಾರೆ. ಅಲ್ಲದೆ, ಗಿನ್ನೆಸ್ ವಿಶ್ವ ದಾಖಲೆಯವರು ನೀಡಿದ್ದ ಒಂದು ಗಂಟೆಗೆ 68.35 ಮೈಲುಗಳಷ್ಟು ವೇಗದ ದಾಖಲೆಯನ್ನು ಅವರು ಮುರಿದಿದ್ದಾರೆ.

1971ರ ಬ್ಯಾಂಕಾಕ್‌ ಟ್ಯಾಕ್ಸಿಯಂತೆ ಕಾಣುವ ಎವೆರಾರ್ಡ್‌ರ ಟುಕ್‌ ಟುಕ್ ವಾಹನ ಸೋಮವಾರ (ಮೇ 13,2019) ಉತ್ತರ ಯಾರ್ಕ್ಶೈರ್‌ನ ಎಲ್ವಿಂಗ್ಟನ್‌ ಏರ್‌ಫೀಲ್ಡ್‌ನಲ್ಲಿ ಈ ಗಿನ್ನೆಸ್‌ ದಾಖಲೆಯನ್ನು ಸೃಷ್ಟಿಸಿದ್ದಾರೆ. ಇನ್ನು, ಉದ್ಯಮಿಯ ಸೋದರ ಸಂಬಂಧಿ ರಸ್ಸೆಲ್‌ ಶೆರ್ಮನ್‌ ಈ ವೇಳೆ ವಾಹನದಲ್ಲಿ ಪ್ರಯಾಣಿಕರಾಗಿ ಕುಳಿತಿದ್ದರು ಎಂದು ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.

ಇನ್ನು, ತನ್ನ ವಾಹನವನ್ನು ಮಾರ್ಪಡಿಸಲು ಮತ್ತು ಸುಧಾರಣೆ ಮಾಡಲು ಎವೆರಾರ್ಡ್ 18 ಲಕ್ಷ ರೂ.ಗೂ ಅಧಿಕ ಖರ್ಚು ಮಾಡಿದ್ದಾರೆ. ಅಲ್ಲದೆ, ಅವರು 2017ರಲ್ಲಿ ಈ ವಾಹನವನ್ನು ಕೊಂಡುಕೊಂಡ ಬಳಿಕ ಪ್ರತಿ ನಟ್, ಬೋಲ್ಟ್‌ ಹಾಗೂ ಬೇರಿಂಗ್‌ಗಳ ಬಗ್ಗೆಯೂ ಕಾಳಜಿ ವಹಿಸಿದ್ದರು ಎಂದು ತಿಳಿದುಬಂದಿದೆ.

ಥಾಯ್ಲೆಂಡ್‌ನಲ್ಲಿ ಗೆಳೆಯರೊಬ್ಬರ ಮದುವೆಗೆ ಹೋದಾಗ ಸ್ಥಳೀಯ ಟ್ಯಾಕ್ಸಿಯನ್ನು ಚಲಾಯಿಸುವುದು ಹೆಚ್ಚು ಮಜಾಕೊಡುತ್ತದೆಂದು ಎವೆರಾರ್ಡ್ ಟುಕ್‌ ಟುಕ್‌ನಲ್ಲಿ ಪ್ರಯಾಣಿಸಿದ್ದರು. ಬಳಿಕ, ಟುಕ್‌ ಟುಕ್‌ ವಾಹನದಲ್ಲಿ ಕೆಲ ರೈಡ್‌ಗಳನ್ನು ಮಾಡಿದ ಬಳಿಕ ಮಜಾ ನೀಡಿದ್ದು, ವಾಹನ ಕೊಂಡುಕೊಳ್ಳುವ ಆಲೋಚನೆ ಮಾಡಿದ್ದಾರೆ. ಈ ಹಿನ್ನೆಲೆ ಇ - ಬೇ ಯಲ್ಲಿ ಅದೇ ರೀತಿಯ ವಾಹನವನ್ನು ಕೊಂಡುಕೊಂಡಿದ್ದೆವು ಎಂದು ಎವೆರಾರ್ಡ್ ಅಂತಾರಾಷ್ಟ್ರೀಯ ಮಾಧ್ಯಮಕ್ಕೆ ಮಾಹಿತಿ ನೀಡಿದ್ದಾರೆ.

ಅಲ್ಲದೆ, ಈ ವಾಹನ ಕೊಂಡುಕೊಂಡ ಬಳಿಕ ತನ್ನ ಪತ್ನಿಗೆ ಈ ಬಗ್ಗೆ ಸಮಜಾಯಿಷಿ ನೀಡಬೇಕಿತ್ತು. ಈ ಹಿನ್ನೆಲೆ ಗಿನ್ನೆಸ್‌ ದಾಖಲೆಯತ್ತ ದೃಷ್ಟಿ ನೆಟ್ಟಿದ್ದು ಯಶಸ್ವಿಯಾಗಿದ್ದೇನೆ ಎಂದು ಸಹ ತಿಳಿಸಿದ್ದಾರೆ.