ಆಕ್ಸ್‌ಫರ್ಡ್ ಇಂಗ್ಲೀಷ್‌ ಡಿಕ್ಷನರಿಗೆ 'ಚಡ್ಡೀಸ್‌' ಎಂಬ ಭಾರತೀಯ ಪದ ಸೇರ್ಪಡೆ

ಲಂಡನ್‌: ಆಕ್ಸ್‌ಫರ್ಡ್ ಇಂಗ್ಲೀಷ್‌ ಡಿಕ್ಷನರಿಗೆ ಅನೇಕ ಭಾರತೀಯ ಪದಗಳು ಸೇರುತ್ತಿರುತ್ತವೆ. ಇದೇ ರೀತಿ, ಈ ಬಾರಿಯೂ ಭಾರತದ ಪದವೊಂದು ಪ್ರತಿಷ್ಠಿತ ಆಕ್ಸ್‌ಫರ್ಡ್ ನಿಘಂಟಿಗೆ ಸೇರ್ಪಡೆಯಾಗಿದೆ. ಆದರೆ, ಈ ಪದ ಆಕ್ಸ್‌ಫರ್ಡ್ ಡಿಕ್ಷನರಿಗೆ ಸೇರಿರುವುದು ಅನಿರೀಕ್ಷಿತವಾಗಿದೆ.

'ಚಡ್ಡೀಸ್‌' ಅಂದರೆ ಒಳುಡುಪುಗಳು ಎಂಬ ಪದ ಆಕ್ಸ್‌ಫರ್ಡ್ ಇಂಗ್ಲೀಷ್‌ ನಿಘಂಟಿಗೆ ಸೇರ್ಪಡೆಯಾಗಿದೆ. ಪ್ರತಿಷ್ಠಿತ ಆಕ್ಸ್‌ಫರ್ಡ್ ಇಂಗ್ಲೀಷ್‌ ಡಿಕ್ಷನರಿಯ ಮಾರ್ಚ್ ತಿಂಗಳ ಅಪ್‌ಡೇಟ್‌ನಲ್ಲಿ ಸೇರ್ಪಡೆಯಾಗಿದೆ.

1990 ರ ಮಧ್ಯದ ದಶಕದಲ್ಲಿ ಬಿಬಿಸಿಯಲ್ಲಿ ಪ್ರಸಾರವಾಗುತ್ತಿದ್ದ ಬ್ರಿಟಿಷ್ ಏಷ್ಯನ್‌ ಕಾಮಿಡಿ ಸೀರೀಸ್‌ 'ಗುಡ್‌ನೆಸ್‌ ಗ್ರೇಷಿಯಸ್‌ ಮಿ'ಯಲ್ಲಿ ಚಡ್ಡೀಸ್‌ ಎಂಬ ಪದವನ್ನು ಬಳಕೆ ಮಾಡಲಾಗುತ್ತಿತ್ತು. ಅಂದಿನಿಂದ ಈ ಪದ ಹೆಚ್ಚು ಜನಪ್ರಿಯವಾಗಿದೆ ಎಂದು ತಿಳಿದುಬಂದಿದೆ.

ನಟ ಹಾಗೂ ಬರಹಗಾರ ಸಂಜೀವ್‌ ಭಾಸ್ಕರ್‌ ಜನಪ್ರಿಯಗೊಳಿಸಿರುವ ಚಡ್ಡೀಸ್‌ (ಒಳಉಡುಪು) ಎಂಬ ಪದವನ್ನು ಬ್ರಿಟಿಷ್‌ ಇಂಡಿಯಾದ ಪದ ಬಳಕೆಗೆ ಸೇರಿಸಲಾಗಿದೆ ಎಂದು ಆಕ್ಸ್‌ಫರ್ಡ್‌ ಇಂಗ್ಲೀಷ್‌ ಡಿಕ್ಷನರಿಯ ಹಿರಿಯ ಸಹಾಯಕ ಸಂಪಾದಕ ಜೊನಾಥನ್ ಡೆಂಟ್‌ ಮಾಹಿತಿ ನೀಡಿದ್ದಾರೆ.

ಸಾರ್ವಜನಿಕರ ಬೇಡಿಕೆ ಮೇರೆಗೆ ಆಕ್ಸ್‌ಫರ್ಡ್ ಇಂಗ್ಲೀಷ್‌ ಡಿಕ್ಷನರಿ ಜಗತ್ತಿನ ಹಲವು ವಿವಿಧ ಜನಪ್ರಿಯ ಪದಗಳನ್ನು ಸೇರಿಸುತ್ತಾ ಹೋಗುತ್ತದೆ.