ಚಿರತೆ ಮರಿ ತಾಯಿಯನ್ನು ಸೇರಿದ್ದು ಹೇಗೆ ಗೊತ್ತೇ?(ವೀಡಿಯೋ)

[This story originally published in Indiatimes.com on March 13,2019]

ನಾಗ್ಪುರ: ನಿಮ್ಮ ಪೋಷಕರಿಂದ ನೀವೆಂದಾದರೂ ಕಳೆದು ಹೋದ ಸನ್ನಿವೇಶ ಅನುಭವಿಸಿದ್ದೀರಾ? ಊರ ಜಾತ್ರೆಯಲ್ಲಿ, ಶಾಪಿಂಗ್‌ ಮಾಲ್‌ನಲ್ಲಿ ಅಪ್ಪ-ಅಮ್ಮನಿಂದ ತಪ್ಪಿ ಹೋಗಿ, ಜೋರಾಗಿ ಅತ್ತು, ಬಳಿಕ ಅಮ್ಮನನ್ನು ಕಂಡಾಗ ಎಷ್ಟು ಖುಷಿ ಆಗುತ್ತೆ ಅಲ್ವೇ?

ಈ ವಿಚಾರ ಪ್ರಸ್ತಾಪಿಸಲು ಒಂದು ಕಾರಣ ಇದೆ. ಸುಮಾರು 2 ತಿಂಗಳ ಪುಟ್ಟ ಚಿರತೆ ಮರಿ, ನಾಗ್ಪುರದ ಹೊರವಲಯದಲ್ಲಿನ ಗ್ರಾಮದಲ್ಲಿ ಸಿಕ್ಕಿದೆ. ತನ್ನ ತಾಯಿಯಿಂದ ಬೇರ್ಪಟ್ಟ ಚಿರತೆ ಮರಿ, ಒಂದೇ ಸಮನೆ ಅಳುತ್ತಾ, ತನ್ನ ತಾಯಿಯ ಹುಡುಕಾಟದಲ್ಲಿ ತೊಡಗಿತ್ತು.

ಗ್ರಾಮಸ್ಥರಿಗೆ ಚಿರತೆ ಮರಿಯ ಕೂಗು ಕೇಳಿ, ಕೊಂಚ ಭಯಗೊಂಡರೂ, ಸ್ಥಳೀಯ ಅರಣ್ಯಾಧಿಕಾರಿಗಳಿಗೆ ಮಾಹಿತಿ ನೀಡಿದರು.
ಗ್ರಾಮದ ಹೊಲದಲ್ಲಿದ್ದ ಚಿರತೆ ಮರಿಯನ್ನು ರಕ್ಷಿಸಿ, ಆರೈಕೆ ಮಾಡಿದ ಅರಣ್ಯ ಸಿಬ್ಬಂದಿ, ರಾತ್ರಿ ಹೊಲದ ಒಂದು ಭಾಗದಲ್ಲಿ ಚಿರತೆ ಮರಿಯನ್ನು ಬಾಕ್ಸ್‌ನಲ್ಲಿ ಹಾಕಿ ಇಟ್ಟಿದ್ದಾರೆ. ಸುತ್ತಲೂ ಕ್ಯಾಮರಾ ಫಿಕ್ಸ್‌ ಮಾಡಿದ್ದಾರೆ.

ಚಿರತೆ ಮರಿ ಮತ್ತೆ ತನ್ನ ತಾಯಿಗಾಗಿ ಕೂಗುತ್ತಲಿತ್ತು. ಕೆಲ ಗಂಟೆಗಳ ಬಳಿಕ ತಾಯಿ ಚಿರತೆ, ತನ್ನ ಮಗುವಿನ ಕೂಗು ಆಲಿಸಿ, ಹುಡುಕುತ್ತಾ ಬಂದಿದೆ.
ಅಷ್ಟು ಮಾತ್ರ ಅಲ್ಲ, ತನ್ನ ಮಗುವನ್ನು ಗುರುತಿಸಿ, ಅದನ್ನು ಮುದ್ದಿಸಿ, ತನ್ನೊಂದಿಗೆ ಒಯ್ದಿದೆ. ಈ ಮಮತೆಯ ದೃಶ್ಯ ಕ್ಯಾಮರಾದಲ್ಲಿ ಸೆರೆಯಾಗಿದ್ದು, ವೀಡಿಯೋ ಸಾಮಾಜಿಕ ತಾಣಗಳಲ್ಲಿ ವೈರಲ್‌ ಆಗಿದೆ. ನೀವು ನೋಡಿ, ತಾಯಿ ಚಿರತೆ ಹಾಗೂ ಮರಿ ಒಂದಾದ ದೃಶ್ಯ!