ವಾಷಿಂಗ್ಟನ್: ಅಮೆರಿಕನ್ ಯುವತಿಗೆ ಈಗ ಶಾಕ್ ಆಗಿದೆ, ಕೇವಲ 24 ವರ್ಷ ಹರಯದ ಯುವತಿ ಮದುವೆಯಾಗಿದ್ದು 68ರ ಹರಯದ ಪುರುಷನನ್ನು. ಆದರೆ, ತಾನು ಮದ್ವೆ ಅಂತ ಆಗಿರೋದು ತನ್ನ ಸ್ವಂತ ಅಜ್ಜನನ್ನೇ ಎಂಬುದು ತಿಳಿದು ಆಘಾತಕ್ಕೆ ಒಳಗಾಗಿದ್ದಾಳೆ.
ಈಕೆ ಮೂರು ತಿಂಗಳ ಹಿಂದೆಯಷ್ಟೇ ಮದುವೆಯಾಗಿದ್ದಳು. ತನ್ನ ಗಂಡನ ಮೊದಲ ಹೆಂಡತಿ ಮತ್ತು ಮಕ್ಕಳ ಫೋಟೋ ಅಲ್ಬಮ್ ನೋಡುತ್ತಿದ್ದಾಗ ಫೋಟೋದಲ್ಲಿರುವ ತನ್ನ ಗಂಡನ ಮಗ ಬೇರಾರೂ ಅಲ್ಲ, ತನ್ನ ಸ್ವಂತ ಅಪ್ಪ ಎಂಬ ವಿಷಯ ಗೊತ್ತಾಗಿ ಬೆಚ್ಚಿ ಬಿದ್ದಿದ್ದಾಳೆ.
''ನನ್ನ ಮೊದಲ ಪತ್ನಿ ಮಕ್ಕಳೊಂದಿಗೆ ತನ್ನನ್ನು ತೊರೆದಳು, ಎಷ್ಟೇ ಪ್ರಯತ್ನ ಪಟ್ಟರೂ ಆಕೆಯ ಗುರುತು ದೊರಕಿರಲಿಲ್ಲ, ನಂತರ ನಾನು ಎರಡನೆ ಮದುವೆಯಾಗಿ ಆಕೆಯಿಂದಲೂ ವಿಚ್ಚೇದನ ಪಡೆದೆ. ಎರಡು ವರ್ಷಗಳ ಬಳಿಕ ಲಾಟರಿಯಲ್ಲಿ ಸಾಕಷ್ಟು ಹಣ ಬಂತು. ಸಿರಿವಂತನಾದೆ, ''ಎಂದು ಈ ಯುವತಿಯ ಪತಿ ಹೇಳಿಕೊಂಡಿದ್ದಾನೆ.
2015 ರಲ್ಲಿ ಮತ್ತೊಂದು ಮದುವೆಗೆ ತಯಾರಿದ್ದ ವ್ಯಕ್ತಿಗೆ ಸ್ಥಳೀಯ ವೆಬ್ಸೈಟ್ ಒಂದರಿಂದ ಯುವತಿಯ ಪರಿಚಯವಾಗಿದೆ. ''ಆಕೆಯನ್ನು ಮೊದಲ ಬಾರಿಗೆ ಕಂಡಾಗಲೇ ಎಲ್ಲೊ ನೋಡಿದ ಅನುಭವವಾಗಿತ್ತು. ನಾವು ಮದುವೆಯಾಗಲು ನಿರ್ಧರಿಸಿದೆವು. ನಾನು ಈಗಾಗಲೇ ಎರಡು ವಿಚ್ಚೇಧನ ಪಡೆದಿದ್ದೇನೆ. ಆದರೆ ಮೂರನೇ ವಿಚ್ಚೇಧನಕ್ಕೆ ತಯಾರಿಲ್ಲ ,'' ಎಂದು ಆತ ಹೇಳಿಕೊಂಡಿದ್ದಾನೆ.
'' ಫೋಟೋ ಅಲ್ಬಮ್ನಿಂದ ಗಂಡ ತನ್ನ ಸ್ವಂತ ಅಜ್ಜ ಎಂದು ತಿಳಿದಾಗ ನನಗೆ ತೀವ್ರ ನಿರಾಶೆಯಾಯಿತು, ಆದರೆ ನಮ್ಮಿಬ್ಬರ ನಡುವಿನ ಸಂಬಂಧ ಗಾಢವಾಗಿದೆ. ದೂರವಾಗುವ ಮನಸ್ಸು ನಮಗಿಲ್ಲ, ''ಎಂದು ಯುವತಿ ತಿಳಿಸಿದ್ದಾಳೆ.