ಅನಾಥ ಕೋತಿ ಮರಿಯನ್ನು ಸ್ವಂತ ಮಗುವಿನಂತೆ ನೋಡಿಕೊಳ್ಳುತ್ತಿರುವ ಬೀದಿನಾಯಿ

ಭೋಪಾಲ್: ನಾಯಿಗಿರುವ ನಿಯತ್ತು, ಕರುಣೆ ಬಗ್ಗೆ ನಮಗೆಲ್ಲ ಗೊತ್ತಿರುವಂಥದ್ದೇ. ಇದೇ ರೀತಿ ಮಧ್ಯಪ್ರದೇಶದಲ್ಲೂ ಅನಾಥ ಕೋತಿ ಮರಿಯನ್ನು ತನ್ನ ತಾಯಿಯಂತೆ ನೋಡಿಕೊಳ್ಳುತ್ತಿದೆ ಇಲ್ಲಿನ ಬೀದಿ ನಾಯಿ.

ಮಧ್ಯಪ್ರದೇಶದ ಕನ್ಸ್‌ಖೇಡಾ ಗ್ರಾಮದಲ್ಲಿ ಬೀದಿನಾಯಿಗಳ ಗುಂಪಿನಿಂದ ದಾಳಿಗೊಳಗಾದ ಕೋತಿ ಮರಿಯೊಂದನ್ನು ಬೀದಿ ನಾಯಿಯೊಂದು ತಾನು ಆ ಪ್ರಾಣಿಯ ಬಾಡಿಗೆ ತಾಯಿಯೆಂಬಂತೆ ದತ್ತು ತೆಗೆದುಕೊಂಡಿದೆ.

ರೂಬಿ ಎಂಬ ಹೆಸರಿನ ಈ ಬೀದಿನಾಯಿಗೆ ಸ್ವಂತ ಮಕ್ಕಳಿಲ್ಲ. ಹೀಗಾಗಿ, ಈ ಕೋತಿ ಮರಿಯನ್ನು ರಕ್ಷಣೆ ಮಾಡುವ ರೂಬಿ, ಕೋತಿ ಮರಿಯನ್ನು ತನ್ನ ಬೆನ್ನಿನ ಮೇಲೆ ಹೊತ್ತೊಯ್ಯುತ್ತೆ ಎಂದು ಸ್ಥಳೀಯರು ತಿಳಿಸಿದ್ದಾರೆ. ಅಲ್ಲದೆ, ಒಂದು ವೇಳೆ ಬೆನ್ನಿನ ಮೇಲೆ ಇಲ್ಲದಿದ್ದ ಪಕ್ಷದಲ್ಲೂ, ಅದನ್ನು ಗಮನಿಸುತ್ತಿರುತ್ತದೆ ಎಂದು ನಾಯಿಯ ಮಾಲೀಕ ಸುರೇಶ್‌ ಮಾಹಿತಿ ನೀಡಿದ್ದಾರೆ.

''ಒಮ್ಮೆ ನಾಯಿಗಳ ಗುಂಪೊಂದು ನಮ್ಮ ಪ್ರದೇಶದಲ್ಲಿ ಸುತ್ತಾಡುತ್ತಿದ್ದ ಕೋತಿ ಮರಿಗಳ ಮೇಲೆ ದಾಳಿ ಮಾಡಿದವು. ನಂತರ, ಅದನ್ನು ನೋಡಿದ ರೂಬಿ, ಕೋತಿಗೆ ಹೆಚ್ಚಿನ ಗಾಯಗಳಾಗುವ ಮುನ್ನವೇ ಅದನ್ನು ಬಚಾವ್ ಮಾಡಿತ್ತು. ಆ ಘಟನೆ ನಡೆದು ಒಂದೂವರೆ ತಿಂಗಳು ಕಳೆದಿದ್ದರೂ, ನಾಯಿ - ಕೋತಿ ಮರಿ ಜೋಡಿ ನಮ್ಮ ಗ್ರಾಮದ ಕೇಂದ್ರಬಿಂದುವಾಗಿದೆ'' ಎಂದು ರೂಬಿ ಮಾಲೀಕ ಮಾಧ್ಯಮವೊಂದಕ್ಕೆ ಹೇಳಿಕೊಂಡಿದ್ದಾರೆ.

ಅಲ್ಲದೆ, ಸ್ವಂತ ಮಕ್ಕಳಿಲ್ಲದ ಕಾರಣ ಕೋತಿಯನ್ನೇ ತನ್ನ ಮಗುವಾಗಿ ಸ್ವೀಕರಿಸಿದ್ದು, ರಕ್ಷಣೆ ಮಾಡುತ್ತಿದೆ ಎಂದೂ ಸುರೇಶ್‌ ಹೇಳಿಕೊಂಡಿದ್ದಾರೆ.

ಇನ್ನೊಂದೆಡೆ, ಬೀದಿನಾಯಿ - ಕೋತಿ ಜೋಡಿಯ ಫೋಟೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಶೇರ್ ಮಾಡಲಾಗಿದ್ದು, ಬಳಿಕ ಸಿಕ್ಕಾಪಟ್ಟೆ ವೈರಲ್‌ ಆಗಿದೆ. ಅಲ್ಲದೆ, ಹೋಷಂಗಾಬಾದ್ ಜಿಲ್ಲೆಯ ಸಿಯೋನಿ ಮಾಳ್ವಾ ನಗರದಲ್ಲೂ ಇದು ಚರ್ಚೆಗೆ ಗ್ರಾಸವಾಗಿದ್ದು, ಈ ಜೋಡೊಯನ್ನು ನೋಡಲು ಬೇರೆ ಗ್ರಾಮಗಳಿಂದಲೂ ಭೇಟಿ ನೀಡುತ್ತಿದ್ದಾರೆ ಎಂದು ಸುರೇಶ್‌ ಹೇಳಿದ್ದಾರೆ.