'ಸರ್ಫ್ ಎಕ್ಸೆಲ್‌' ಜಾಹೀರಾತಿಗೆ ವಿರೋಧ: 'ಮೈಕ್ರೋಸಾಫ್ಟ್ ಎಕ್ಸೆಲ್‌' ವಿರುದ್ಧ ನೆಟ್ಟಿಗರ ಆಕ್ರೋಶ!

ಯಾರದ್ದೋ ತಪ್ಪಿಗೆ ಇನ್ಯಾರಿಗೋ ಶಿಕ್ಷೆ ಎನ್ನುವಂತೆ ಸರ್ಫ್‌ ಎಕ್ಸೆಲ್‌ ಜಾಹೀರಾತಿನಿಂದ ಆಕ್ರೋಶಗೊಂಡ ಜನತೆ ಸಾಫ್ಟ್‌ವೇರ್‌ ದೈತ್ಯ ಮೈಕ್ರೋಸಾಫ್ಟ್‌ ಎಕ್ಸೆಲ್‌ ಮೇಲೆ ತಮ್ಮ ಆಕ್ರೋಶವನ್ನು ಪ್ರಯೋಗಿಸುತ್ತಿದ್ದಾರೆ. ಯಾಕೆಂದರೆ ಮೈಕ್ರೋಸಾಫ್ಟ್‌ ಎಕ್ಸೆಲ್‌ಗೂ ಬಟ್ಟೆ ಸ್ವಚ್ಛಗೊಳಿಸುವ ಸರ್ಫ್ ಎಕ್ಸೆಲ್‌ಗೂ ಸಂಬಂಧವಿದೆಯೆಂದು ಹಲವು ಆ್ಯಂಡ್ರಾಯ್ಡ್‌ ಬಳಕೆದಾರರು ತಿಳಿದುಕೊಂಡಿದ್ದಾರೆ.

ಹಿಂದೂ ಹುಡುಗಿ ಹಾಗೂ ಮುಸ್ಲಿಂ ಹುಡುಗ ಹೋಳಿ ಆಡುತ್ತಿರುವ ಇತ್ತೀಚಿನ ಸರ್ಫ್ ಎಕ್ಸೆಲ್‌ ಜಾಹೀರಾತು ಸಿಕ್ಕಾಪಟ್ಟೆ ವೈರಲ್‌ ಆಗಿತ್ತು. ಈ ಜಾಹೀರಾತನ್ನು ಹಲವರು ಹೊಗಳಿದ್ದರೆ, ಇನ್ನೂ ಹಲವು ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸಿದ್ದರು. ಈ ಜಾಹೀರಾತಿನ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದ ಫೇಸ್‌ಬುಕ್ ಹಾಗೂ ಟ್ವಿಟರ್ ಬಳಕೆದಾರರು ಸರ್ಫ್ ಎಕ್ಸೆಲ್‌ ಹಾಗೂ ಅದರ ಮಾತೃ ಕಂಪನಿ ಹಿಂದೂಸ್ತಾನ್ ಯುನಿಲೀವರ್ ಲಿಮಿಟೆಡ್(ಎಚ್‌ಯುಎಲ್‌) ಅನ್ನು ಬಹಿಷ್ಕಾರ ಹಾಕಲು ಒತ್ತಾಯಿಸಿದ್ದರು.


ಬಳಿಕ, #BoycottSurfExcel (ಸರ್ಫ್ ಎಕ್ಸೆಲ್‌ಗೆ ಬಹಿಷ್ಕಾರ ಹಾಕಿ), #BoycottHindustanUnilever(ಹಿಂದೂಸ್ತಾನ್ ಯುನಿಲೀವರ್ ಲಿಮಿಟೆಡ್(ಎಚ್‌ಯುಎಲ್‌)ಗೆ ಬಹಿಷ್ಕಾರ ಹಾಕಿ ) ಎಂಬ ಹ್ಯಾಶ್‌ಟ್ಯಾಗ್‌ಗಳು ಸಾಮಾಜಿಕ ಜಾಲತಾಣದಲ್ಲಿ ಕಳೆದ ಎರಡು ಮೂರು ದಿನಗಳಿಂದ ಟ್ರೆಂಡಿಂಗ್ ಆಗುತ್ತಿದೆ. ಆದರೆ, ಇದರ ಜತೆಗೆ, ಗೂಗಲ್‌ನ ಆ್ಯಪ್‌ಸ್ಟೋರ್‌ನಲ್ಲಿ 'ಮೈಕ್ರೋಸಾಫ್ಟ್‌ ಎಕ್ಸೆಲ್‌'ನ ಆ್ಯಪ್‌ನ ರೇಟಿಂಗ್‌ ಸಹ ಕಡಿಮೆ ಆಗುತ್ತಿದೆ.

ಮೈಕ್ರೋಸಾಫ್ಟ್‌ ಎಕ್ಸೆಲ್‌ ಆ್ಯಪ್‌ ದೇಶ ವಿರೋಧಿ ಎಂದು ಹಲವರು ಗೂಗಲ್‌ ಪ್ಲೇನಲ್ಲಿ ಕಾಮೆಂಟ್‌ ಮಾಡುತ್ತಿದ್ದಾರೆ. ಅಲ್ಲದೆ, Boycott Surf Excel ಎಂಬ ಕಾಮೆಂಟ್‌ ಹಾಕಿಕೊಂಡು ಮೈಕ್ರೋಸಾಫ್ಟ್‌ ಎಕ್ಸೆಲ್‌ ಆ್ಯಪ್‌ಗೆ ಕಾಮೆಂಟ್ ಮಾಡುತ್ತಿದ್ದಾರೆ,. ಜತೆಗೆ, 1 ಸ್ಟಾರ್‌ ರೇಟಿಂಗ್ ಕೊಡುವುದು ಸಹ ಹೆಚ್ಚಾಗಿದೆ. ಆದರೆ, ಇತ್ತೀಚಿನ ಹೋಳಿ ಜಾಹೀರಾತಿಗೂ ಸರ್ಫ್ ಎಕ್ಸೆಲ್‌ಗೂ ಅಥವಾ ಎಚ್‌ಯುಎಲ್‌ಗೂ ಯಾವುದೇ ಸಂಬಂಧವಿಲ್ಲ. ಆದರೆ, 'ಎಕ್ಸೆಲ್‌' ಎಂಬ ಒಂದು ಪದ ಎರಡರಲ್ಲೂ ಇರುವುದರಿಂದ ಜನ ಗೊಂದಲಕ್ಕೀಡಾಗಿ ಮೈಕ್ರೋಸಾಫ್ಟ್‌ ಎಕ್ಸೆಲ್‌ ಹಿಂದೂ ವಿರೋಧಿ ಎಂದೂ ಸಾಮಾಜಿಕ ಜಾಲತಾಣದಲ್ಲಿ ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಇನ್ನೊಂದೆಡೆ, ಈ ಗೊಂದಲವನ್ನು ಅರ್ಥೈಸಿಕೊಂಡ ಹಲವರು ಮೈಕ್ರೋಸಾಫ್ಟ್‌ ಎಕ್ಸೆಲ್‌ ಆ್ಯಪ್‌ಗೆ 5 ಸ್ಟಾರ್‌ ರೇಟಿಂಗ್‌ ಅನ್ನು ಕೊಡುತ್ತಿದ್ದಾರೆ. ಅಲ್ಲದೆ, ಮೈಕ್ರೋಸಾಫ್ಟ್‌ ಎಕ್ಸೆಲ್‌ಗೆ ರೇಟಿಂಗ್ ಕಡಿಮೆ ಮಾಡಿದವರ ವಿರುದ್ಧ ಹಲವರು ಟ್ವಿಟರ್‌ನಲ್ಲಿ ಟ್ರೋಲ್ ಮಾಡುತ್ತಿದ್ದಾರೆ.

ಕಳೆದ ವರ್ಷ ಸಹ 'ಸ್ನಾಪ್‌ಚಾಟ್‌' ಸಾಮಾಜಿಕ ಜಾಲತಾಣದ ವಿರುದ್ಧ ಆಕ್ರೋಶಗೊಂಡಿದ್ದ ನೆಟ್ಟಿಗರು ಇ - ಕಾಮರ್ಸ್ ಮಾರುಕಟ್ಟೆ ಆ್ಯಪ್‌ ಆದ ಸ್ನಾಪ್‌ಡೀಲ್‌ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿ ಅದರ ರೇಟಿಂಗ್ ಕಡಿಮೆಗೊಳಿಸಿದ್ದರು.