ಬೆಸ್ಟ್‌ ಫ್ರೆಂಡ್‌ಗಾಗಿ ಎರಡು ವರ್ಷಗಳ ಕಾಲ ಹಣ ಉಳಿಸಿ ಎಲೆಕ್ಟ್ರಿಕ್‌ ಗಾಲಿ ಕುರ್ಚಿ ಕೊಡಿಸಿದ ಯುವಕ

ವಾಷಿಂಗ್ಟನ್‌: ಹದಿಹರೆಯದ ಯುವಕನೊಬ್ಬ ದಿವ್ಯಾಂಗ ಆತ್ಮೀಯ ಗೆಳೆಯನಿಗಾಗಿ ಎರಡು ವರ್ಷಗಳಿಗೂ ಹೆಚ್ಚು ಕಾಲ ಹಣ ಉಳಿಸಿ ಎಲೆಕ್ಟ್ರಿಕ್‌ ಗಾಲಿ ಕುರ್ಚಿಯನ್ನು ಕೊಡಿಸಿದ್ದಾನೆ. ಇದು ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್‌ ಆಗಿದ್ದು, ಆ ಯುವಕನ ಹೃದಯ ವೈಶಾಲ್ಯತೆಯನ್ನು ಎಲ್ಲರೂ ಮೆಚ್ಚಿಕೊಂಡಿದ್ದಾರೆ.

ಬ್ರ್ಯಾಂಡನ್‌ ಕ್ವಾಲ್ಸ್ ಎಂಬ ದಿವ್ಯಾಂಗ ಯುವಕ ಅಮೆರಿಕದ ನಾರ್ಮನ್, ಅರ್ಕಾನ್ಸಾಸ್‌ನಲ್ಲಿರುವ ಕ್ಯಾಡೋ ಹಿಲ್ಸ್ ಹೈಸ್ಕೂಲ್‌ನಲ್ಲಿ ಓದುತ್ತಿದ್ದಾನೆ. ಆದರೆ, ಆತನಿಗೆ ಓಡಾಡಲು ಬಹಳ ಕಷ್ಟವಾಗುತ್ತಿತ್ತು ಎಂಬುದನ್ನು ಗೆಳೆಯ ಟ್ಯಾನ್ನರ್‌ ವಿಲ್ಸನ್‌ ಗಮನಿಸಿದ್ದಾನೆ. ಬ್ರ್ಯಾಂಡನ್‌ ಬಳಿ ವೀಲ್‌ ಚೇರ್ ಇದ್ದರೂ ಅದು ಸಾಮಾನ್ಯವಾದ ಗಾಲಿ ಖುರ್ಚಿಯಾಗಿತ್ತು. ಹೀಗಾಗಿ, ಆತ ತನ್ನ ಕೈಗಳನ್ನು ಬಳಸಿ ಶಾಲೆಯಲ್ಲಿ ಓಡಾಡುತ್ತಿದ್ದ ಕಾರಣ ಹಲವು ಬಾರಿ ಕೈಗಳು ನೋಯುತ್ತಿತ್ತು. ಶಾಲೆಯಲ್ಲಿ ಗಂಟೆಗಟ್ಟಲೆ ಕಳೆಯುತ್ತಿದ್ದರಿಂದ ಬ್ರ್ಯಾಂಡನ್‌ಗೆ ತೀವ್ರ ಕಷ್ಟವಾಗುತ್ತಿತ್ತು ಎಂಬುದನ್ನು ಗೆಳೆಯ ಟ್ಯಾನ್ನರ್‌ ವಿಲ್ಸನ್‌ ಹೇಳಿದ್ದಾನೆ.

ಹೀಗಾಗಿ ಶಾಲೆಗೆ ಹೋಗುವ ಜತೆಗೆ ಸುಮಾರು 2 ವರ್ಷ ಪಾರ್ಟ್ ಟೈಂ ಜಾಬ್‌ ಮಾಡಿದ ವಿಲ್ಸನ್‌ ತನ್ನ ದೈನಂದಿನ ಭತ್ಯೆಯಲ್ಲಿ ಇಂತಿಷ್ಟು ಹಣವನ್ನು ಗೆಳೆಯನಿಗಾಗಿ ಹೊಸ ಗಾಲಿ ಖುರ್ಚಿ ತಂದುಕೊಡಲು ಮೀಸಲಿಟ್ಟಿದ್ದ. ಕ್ವಾಲ್ಸ್‌ನ ಜೀವನವನ್ನೇ ಬದಲಿಸುವ ಕೊಡುಗೆ ನೀಡಲು ಗೆಳೆಯ ವಿಲ್ಸನ್‌ ಕಷ್ಟಪಟ್ಟು ಹಣ ಗಳಿಸುತ್ತಿದ್ದ ಎಂದು ತಿಳಿದುಬಂದಿದೆ. ವಿಲ್ಸನ್‌ ಹೃದಯವಂತಿಕೆಯನ್ನು ಅವರ ಶಾಲೆಯಲ್ಲಿ ತೀವ್ರ ಮೆಚ್ಚುಗೆ ವ್ಯಕ್ತವಾಗಿದೆ. ಜತೆಗೆ, ಸಾಮಾಜಿಕ ಜಾಲತಾಣಗಳಲ್ಲೂ ತೀವ್ರ ಮೆಚ್ಚುಗೆ ವ್ಯಕ್ತವಾಗಿದೆ.

ಇನ್ನು, ಈ ಬಗ್ಗೆ ಮಾತನಾಡಿದ ವಿಲ್ಸನ್, ''ಅವನು ತನಗೆ ತುಂಬ ಒಳ್ಳೆಯ ಗೆಳೆಯನಾಗಿದ್ದ. ಹೀಗಾಗಿ, ನಾನು ಅವನಿಗೆ ಸಹಾಯ ಮಾಡಬೇಕೆನ್ನಿಸಿತು. ಕಳೆದ ಮೂರು ವರ್ಷಗಳಿಂದ ಅವನಿಗೆ ಈ ಗಾಲಿ ಖುರ್ಚಿ ನೀಡಬೇಕು ಎನಿಸುತ್ತಿತ್ತು. ಅದಕ್ಕೆ ಪ್ರಯತ್ನ ಪಡುತ್ತಿದ್ದೆ ಎಂದು ವಿಲ್ಸನ್‌ ಮಾಧ್ಯಮವೊಂದಕ್ಕೆ ಹೇಳಿದ್ದಾನೆ. ಜೀವನದಲ್ಲಿ ತೊಂದರೆಗಳಿರುವ ಜನ ಹಲವರು ಇದ್ದಾರೆ. ಒಮ್ಮೊಮ್ಮೆ ಅವರು ತಮಗಾಗಿಯೇ ಅದನ್ನು ಮಾಡಿಕೊಳ್ಳಲು ಆಗುವುದಿಲ್ಲ. ಅವರಿಗೆ ಚಿಕ್ಕದಾದ ಸಹಾಯ ಬೇಕಿರುತ್ತದೆ'' ಎಂದು ಹೇಳಿದ್ದಾನೆ.

ಈ ಹೊಸ ಎಲೆಕ್ಟ್ರಿಕ್‌ ಗಾಲಿ ಕುರ್ಚಿಯಿಂದಾಗಿ ಬಟನ್‌ಗಳ ಸಹಾಯದಿಂದಲೇ ಕ್ವಾಲ್ಸ್ ಶಾಲೆಯ ಕ್ಯಾಂಪಸ್‌, ಕ್ಲಾಸ್‌ ರೂಮ್‌ಗಳಲ್ಲಿ ಆರಾಮಾಗಿ ಓಡಾಡಬಹುದು.

ಇನ್ನೊಂದೆಡೆ, ''ತನ್ನ ಗೆಳೆಯ ನನಗಾಗಿ ಈ ರೀತಿ ಮಾಡಿರುವುದು ನನಗೆ ನಂಬಲು ಸಾಧ್ಯವಾಗುತ್ತಿಲ್ಲ. ಆ ವೇಳೆ, ಶಾಲೆಯಲ್ಲಿ ಓಡಾಡಿಕೊಂಡು ಅತ್ತಿದ್ದೆ'' ಎಂದು ಕ್ವಾಲ್ಸ್ ಹೇಳಿಕೊಂಡಿದ್ದಾನೆ.