96ನೇ ವಯಸ್ಸಿನಲ್ಲಿ 4ನೇ ತರಗತಿ ಪರೀಕ್ಷೆ ಬರೆದ ಅಜ್ಜಿಗೆ, 10ನೇ ತರಗತಿವರೆಗೆ ಓದುವ ಆಸೆ

ಕಲಿಯುವ ಮನಸ್ಸಿದ್ದರೆ ವಯಸ್ಸಿನ ಮಿತಿಯಿಲ್ಲ ಎನ್ನುವುದನ್ನು ಸಾಬೀತು ಪಡಿಸಿದ್ದಾರೆ ಕೇರಳದ ಅಲೆಪ್ಪಿಯ ಈ ಅಜ್ಜಿ. ಇವರ ಹೆಸರು ಕಾತ್ಯಾಯಿನಿ ವಯಸ್ಸು 96 ಅಷ್ಟೆ, ಈ ಹುರುಪ್ಪಿನ(!) ವಯಸ್ಸಿನಲ್ಲಿ ಪರೀಕ್ಷೆ ಬರೆದಿರುವ ಅವರಲ್ಲಿ ಕಲಿಕೆಯ ಉತ್ಸಾಹ ಎಷ್ಟಿರಬೇಡ?

ಕೇರಳದ 'ಅಕ್ಷರ ಲಕ್ಷಂ' ಸಾಕ್ಷರತಾ ಯೋಜನೆ ಅಡಿಯಲ್ಲಿ ಅಕ್ಷರ ಕಲಿಯುತ್ತಿರುವ ಅಜ್ಜಿ 4ನೇ ತರಗತಿ ಪರೀಕ್ಷೆ ಬರೆದಿದ್ದಾರೆ. ಇವರ ಜತೆ ಅನೇಕ ಹಿರಿಯರು ಪರೀಕ್ಷೆ ಬರೆದಿದ್ದಾರೆ, ಆದರೆ ಪರೀಕ್ಷೆ ಬರೆದವರಲ್ಲೇ ಹಿರಿಯರು ಈ ಕಾತ್ಯಾಯಿನಿ ಅಜ್ಜಿ.

ಪರೀಕ್ಷೆ ಮುಗಿಸಿದ ಬಳಿಕ 'ನಾನು ತುಂಬಾ ಓದಿದ್ದೆ, ಆದರೆ ನಾನು ಓದಿದ ಎಲ್ಲವನ್ನು ಪ್ರಶ್ನೆ ಪತ್ರಿಕೆಯಲ್ಲಿ ಕೇಳಿಲ್ಲ' ಎಂದು ತುಸು ಅಸಮಾಧಾನ ವ್ಯಕ್ತಪಡಿಸಿದರು. ಈ ಪರೀಕ್ಷೆಯಲ್ಲಿ ಉತ್ತೀರ್ಣವಾಗಲು ಬೇಕಾದ 30 ಗಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ.


ಚಿಕ್ಕ ಹುಡುಗಿಯಾಗಿದ್ದಾಗ ಆರ್ಥಿಕ ತೊಂದರೆಯಿಂದಾಗಿ ಇವರಿಗೆ ಓದಲು ಸಾಧ್ಯವಾಗಿರಲಿಲ್ಲ. ಮದುವೆಯಾಗಿ 6 ಮಕ್ಕಳ ತಾಯಿಯಾದರು, ಗಂಡನ ಅಕಾಲಿಕ ಮರಣದ ನಂತರ ಮನೆಗೆಲಸ ಮಾಡಿ 6 ಮಕ್ಕಳನ್ನು ಬೆಳೆಸಿದರು. ಇವರು ಮಗಳು (ವಯಸ್ಸು 60) ಎರಡು ವರ್ಷಗಳ ಹಿಂದೆಯಷ್ಟೇ 10ನೇ ತರಗತಿ ಪರೀಕ್ಷೆ ಬರೆದಿದ್ದರು, ಅದನ್ನು ನೋಡಿ ಸ್ಪೂರ್ತಿ ಪಡೆದು ಇವರು ಓದಲು ಮನಸ್ಸು ಮಾಡಿದರು.

5ನೇ ತರಗತಿಗೆ ಪಾಸಾಗಿರುವ ಇವರು 10ನೇ ತರಗತಿಯವರೆಗೆ ಒದುವ ಇಚ್ಛೆ ವ್ಯಕ್ತಪಡಿಸಿದ್ದಾರೆ.