ಜೀವಾವಧಿ ಶಿಕ್ಷೆ: 121 ವರ್ಷಗಳಿಂದ ಬಂಧನದಲ್ಲಿದೆ ಈ ಮರ

ಮನೆಯಲ್ಲಿ ನಾಯಿ, ದನಗಳನ್ನು ಕಟ್ಟಿ ಹಾಕಿ ಸಾಕುತ್ತೇವೆ. ಆನೆಯಂತಹ ದೊಡ್ಡ ಪ್ರಾಣಿಗೆ ಸರಳುಗಳಿಂದ ಬಂಧಿಸಿರುತ್ತಾರೆ. ಆದರೆ ಯಾರಾದರೂ ಮರವನ್ನು ಬಂಧಿಸಲು ಸಾಧ್ಯವೇ? ಅಷ್ಟೇ ಅಲ್ಲ ಮನುಷ್ಯ ಮಾಡಿದ ತಪ್ಪಿಗೆ ಜೀವಾವಧಿ ಮರಣದಂಡನೆ ಶಿಕ್ಷೆ ವಿಧಿಸುವುದನ್ನು ನೋಡಿರುತ್ತೇವೆ. ಮರವೊಂದಕ್ಕೆ ಶಿಕ್ಷೆ, ಅದರಲ್ಲೂ ಜೀವಾವಧಿ ಶಿಕ್ಷೆ ನೀಡಲು ಸಾಧ್ಯವೇ? ಮರವನ್ನು ಬಂಧಿಸಿಡಲು ಸಾಧ್ಯವೇ?

ಹೌದು, ಈ ಮರದ ವಿಷಯದಲ್ಲಿ ಇದೆಲ್ಲ ಸತ್ಯವೇ. ಪಾಕಿಸ್ತಾನದಲ್ಲಿ ಆಲದ ಮರವೊಂದನ್ನು 121 ವರ್ಷಗಳಿಂದ ಬಂಧಿಸಿಡಲಾಗಿದ್ದು ಅದರ ಮುಂದೆ "ಐ ಆ್ಯಮ್ ಅಂಡರ್ ಅರೆಸ್ಟ್ " ಎಂಬ ಬೋರ್ಡ್‌ನ್ನು ನೇತು ಹಾಕಲಾಗಿದೆ. ಅದ್ಯಾಕೆ ಹೀಗೆ? ತನ್ನ ಸುತ್ತಲಿರುವವರಿಗೆ ಸದಾ ಒಳಿತನ್ನೇ ಮಾಡುವ ಮರ ಮಾಡಿದ ಅಪರಾಧ ಏನು? ಅದನ್ಯಾಕೆ ಬಂಧಿಸಿದರು?


ಪಾಕಿಸ್ತಾನದ ಖೆಬರ್ ಏಜೆನ್ಸಿಯಲ್ಲಿರುವ ಈ ಮರ ಆ ಕಾಲದಲ್ಲಿ ಒಬ್ಬ ಬ್ರಿಟಿಷ್ ಅಧಿಕಾರಿ ಮೇಲೆ ದಾಳಿ ಮಾಡಿತ್ತು ಎಂಬುದು ಆರೋಪ. ಕುಡಿದ ಮತ್ತಿನಲ್ಲಿ ಬ್ರಿಟಿಷ್ ಸೇನಾಧಿಕಾರಿ ಮಾಡಿದ ಯಡವಟ್ಟಿಂದ ಆದ ಪ್ರಮಾದವಿದು.


ಅದು 1898ನೇ ವರ್ಷ. ಆಗಿನ್ನೂ ಈ ಮರ ಗಿಡವಾಗಿತ್ತು. ಜೇಮ್ಸ್ ಸಕ್ವಿಡ್ ಎಂಬ ಬ್ರಿಟಿಷ್ ಸೈನ್ಯಾಧಿಕಾರಿ ಒಂದು ದಿನ ಕಂಠಪೂರ್ತಿ ಕುಡಿದು ಗಿಡದ ಮುಂದಿಂದ ಹಾದು ಹೋಗುತ್ತಿದ್ದನಂತೆ. ಮತ್ತಿನಲ್ಲಿದ್ದ ಆತನಿಗೆ ಗಿಡ ತನ್ನ ಕಡೆಗೆ ನುಗ್ಗಿ ಬರುತ್ತಿರುವಂತೆ, ದಾಳಿ ಮಾಡಿದಂತೆ ಅನ್ನಿಸಿದೆ. ಕೂಡಲೆೇಅದನ್ನು ಬಂಧಿಸಬೇಕೆಂದು ಸೈನಿಕರಿಗೆ ಆದೇಶಿಸಿದನಂತೆ. ಹಾಗಾಗಿ ಅದನ್ನು ಈ ರೀತಿ ಸರಪಳಿಗಳ ಸಂಕೋಲೆಯಲ್ಲಿ ಬಂಧಿಸಿದ್ದಾರೆ.


121 ವರ್ಷಗಳಿಂದ ಈ ಆಲದ ಮರ ಪಾಕ್ ಸೇನಾ ಕಂಟೋನ್ಮೆಂಟ್‌ಲ್ಲಿ ಬಂಧನದ ಸ್ಥಿತಿಯಲ್ಲಿಯೇ ಇದೆ. ಆ ರೀತಿ ಬಂಧನಕ್ಕೊಳಗಾದ ಮರವನ್ನು ನೋಡಿ ಬಹಳಷ್ಟು ಮಂದಿ ಇದು ತುಂಬಾ ಅನ್ಯಾಯ, ಆ ಗಿಡಕ್ಕೆ ಬಿಡುಗಡೆ ಭಾಗ್ಯ ಕಲ್ಪಿಸಿ ಎಂದು ಕೋರುತ್ತಿದ್ದಾರೆ. ಆದರೆ ಬ್ರಿಟಿಷ್ ಅಧಿಕಾರಿಗಳ ಮೂರ್ಖತನಕ್ಕೆ ಸಾಕ್ಷಿಯಾಗಿರಿಸಲು ಅದನ್ನು ಹಾಗೆಯೇ ಬಂಧನದಲ್ಲಿ ಇಡಲಾಗಿದೆ.