ನಿಮಗಿದು ಗೊತ್ತೆ? ಮರದ ಎಲೆಗಳಿಗೆ ಪರಸ್ಪರ ಸ್ಪರ್ಶಿಸಲು ನಾಚಿಕೆಯಂತೆ!

ಮರಗಳು ಬುದ್ಧಿವಂತರು. ಆ ಕಾರಣದಿಂದಲೇ ಕೂದಲೆಳೆಯ ಅಂತರವನ್ನಾದರೂ ಪರಸ್ಪರ ಎಲೆಗಳ ನಡುವೆ ಅಂತರ ಇರುವಂತೆ ನೋಡಿಕೊಳ್ಳುತ್ತವೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.

ಮರದ ನೆರಳನ್ನು ಸೂಕ್ಷ್ಮವಾಗಿ ಗಮನಿಸಿದರೆ ಸೂರ್ಯನ ಕಿರಣಗಳು ಎಲೆಗಳು ಮಧ್ಯೆ ನುಸುಳಿ ಬಂದಿರುವುದು ತಿಳಿಯುತ್ತದೆ. ಮರ ಎಂದರೆ ಚಪ್ಪರದಂತೆ ದಟ್ಟವಾಗಿ ಎಲೆಗಳು ಹರಡಿಕೊಂಡಿರುತ್ತವೆ. ಆದರೆ ಅವುಗಳು ಪರಸ್ಪರ ಎಲೆಗಳ ಮೇಲೆ ಬಿದ್ದುಕೊಳ್ಳುವುದಿಲ್ಲ. ಅಸಲಿಗೆ ಟಚ್ಚೇ ಮಾಡುವುದಿಲ್ಲ.

ಇದೇನು ಮ್ಯಾಜಿಕ್‌ ಅಲ್ಲ. ಇದಕ್ಕೂ ವೈಜ್ಞಾನಿಕ ಕಾರಣಗಳು ಇವೆ. ಮರಗಳು ವೈಜ್ಞಾನಿಕವಾಗಿ ವಿನ್ಯಾಸಗೊಂಡಿರುತ್ತವೆ. ಇದನ್ನೇ ವಿಜ್ಞಾನಿಗಳ ಮರಗಳು ಬುದ್ಧಿವಂತರು ಎಂದಿದ್ದು.

ಪರಸ್ಪರ ಸ್ಪರ್ಶಿಸಲು ಎಲೆಗಳಿಗೆ ಮುಜುಗರವಂತೆ. ಇದನ್ನು ಕ್ರೌನ್‌ ಶೈನೆಸ್‌ ಎಂದು ವಿಜ್ಞಾನಿಗಳು ಗುರುತಿಸಿದ್ದಾರೆ. ಸಸ್ಯಗಳು ಬೆಳಕಿನ ಮೇಲೆ ಚಟುವಟಿಕೆ ನಡೆಸುವುದರಿಂದಲೇ ಕ್ರೌನ್‌ ಶೈನೆಸ್‌ ಬಂದಿದೆ ಎನ್ನುತ್ತಾರೆ ಸಂಶೋಧಕರು.

ಸೂರ್ಯ ಬೆಳಕು ಮರಗಳಿಗೆ ಬೇಕೇಬೇಕು. ಬೆಳಕಿನ ಸಹಾಯದಿಂದಲೇ ಸಸ್ಯಗಳು ಬೆಳವಣಿಗೆ ಹೊಂದುತ್ತವೆ. ತಮ್ಮ ಆಹಾರವನ್ನು ತಾವೇ ತಯಾರಿಸಿಕೊಳ್ಳುವ ವಿಶಿಷ್ಟ ಪತ್ರಹರಿತ್ತು ಎಂಬ ಮಾಂತ್ರಿಕ ಶಕ್ತಿಯನ್ನು ಹೊಂದಿರುವ ಸಸ್ಯಗಳಿಗೆ ಅಡುಗೆ ತಯಾರಿಸಲು ಸೂರ್ಯ ಕಿರಣಗಳು ಮೈಮೇಲೆ ಬೀಳಬೇಕು.