ಪ್ರೇಮಿಗಳ ದಿನದಂದು ಸಮುದ್ರದಾಳದಲ್ಲಿ 17 ಜೋಡಿಗಳ ವಿವಾಹ (ವೀಡಿಯೋ ನೋಡಿ)

ಥೈಲೆಂಡ್‌: ನವ ಜೀವನಕ್ಕೆ ಕಾಲಿಡುವ ಪ್ರತಿಯೊಬ್ಬರಿಗೂ ಒಂದೊಂದು ರೀತಿಯಲ್ಲಿ ಮದುವೆಯ ಕನಸಿರುತ್ತದೆ. ಆಕಾಶದಿಂದ ಕೆಳಗೆ ಹಾರುತ್ತ, ಹಿಮದ ರಾಶಿಯ ನಡುವೆ, ಜಲಪಾತದ ತುತ್ತತುದಿಯಲ್ಲಿ ಹೀಗೆ ನಾನಾ ರೀತಿಯ ಕ್ರೇಜ್‌ಗೆ ಇಂದಿನ ಯುವ ಜನಾಂಗ ಹಾತೊರೆಯುತ್ತಿದೆ. ಇವುಗಳ ನಡುವೆ ಪ್ರಸಕ್ತ ವರ್ಷದಿಂದ ಪ್ರೇಮಿಗಳ ದಿನದ ಅಂಗವಾಗಿ ಥೈಲೆಂಡ್‌ನಲ್ಲಿ ಸಮುದ್ರದೊಳಗಿನ ವಿವಾಹ ಮಹೋತ್ಸವ ಟ್ರೆಂಡಿಂಗ್‌ ಆಗುತ್ತಿದೆ.

ಥೈಲೆಂಡ್‌ ಪ್ರವಾಸೋದ್ಯಮವನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಅಲ್ಲಿನ ಸರಕಾರ ಸಮುದ್ರದೊಳಗಿನ ಮದುವೆಗೆ ಪ್ರಶಸ್ತ್ಯ ನೀಡಿದ್ದು, ವಿಶೇಷ ಮುತುವರ್ಜಿ ವಹಿಸಿದೆ. ಪ್ರಸಕ್ತ ಪ್ರೇಮಿಗಳ ದಿನದ ಪ್ರಯುಕ್ತ 17 ಜೋಡಿಗಳು ಸಮುದ್ರದಾಳದಲ್ಲಿ ಮದುವೆಯಾಗುವ ಮೂಲಕ ನೂತನ ಸಹ ಜೀವನಕ್ಕೆ ಕಾಲಿಟ್ಟಿದ್ದಾರೆ.

ನೀರಿನ ಆಳದಲ್ಲಿ ವಿಹರಿಸಲು ಸಕಲ ಸಿದ್ಧತೆಗಳೊಂದಿಗೆ ಸಮುದ್ರಕ್ಕೆ ಧುಮುಕುವ ಜೋಡಿಗೆ, ಆಳದಲ್ಲಿ ನಿರ್ಮಿಸಿದ ವಿಶೇಷ ಮಂಟಪದಲ್ಲಿ ಥೈಲೆಂಡ್‌ ಸಂಪ್ರದಾಯದಂತೆ ವಿವಾಹ ಮಾಡಿಸಲಾಗುತ್ತದೆ. ಸಮುದ್ರದ ಮಧ್ಯೆಯೇ ಮದುವೆಯಾದ ನವ ಜೋಡಿಗೆ ಶುಭ ಹಾರೈಸಿ, ದಾಖಲಾತಿಗೆ ಸಹಿ ಮಾಡಿಸಿಕೊಳ್ಳಲಾಗುತ್ತದೆ. ನೋಂದಾವಣಿ ಪತ್ರದೊಂದಿಗೆ ಸಮುದ್ರದಿಂದ ಮೇಲೆ ಬರುವ ಜೋಡಿಗಳು ನವ ಜೀವನಕ್ಕೆ ಕಾಲಿಡುತ್ತಾರೆ.

ಈ ವಿಸ್ಮಯ ಅನುಭವದ ಮದುವೆ ಸಾಮಾಜಿಕ ತಾಣಗಳಲ್ಲಿ ಸದ್ದು ಮಾಡುತ್ತಿದೆ. ಮದುವೆಯಾದರೆ ಹೀಗೆ ಆಗಬೇಕು ಎಂದು ಪ್ರೇಮಿಗಳು ಗುಸುಗುಡುತ್ತಿದ್ದಾರೆ.