ಪ್ರಧಾನಿ ಮೋದಿ ಪರವಾಗಿ ಮತ ಹಾಕಿ: ಮಗಳ ಮದುವೆಯ ಆಹ್ವಾನ ಪತ್ರಿಕೆಯಲ್ಲಿ ತಂದೆ ಮನವಿ

ಸಿವಾನ್‌: ಇತ್ತೀಚೆಗೆ ಮದುವೆಯ ಆಹ್ವಾನ ಪತ್ರಿಕೆಗಳಲ್ಲಿ ನಾನಾ ವಿಧದ ಬರಹಗಳನ್ನು ಹಾಕಿರುತ್ತಾರೆ. ಇದೇ ರೀತಿ, ಮದುವೆಗಳಲ್ಲಿ ಯಾವುದೇ ಉಡುಗೊರೆ ಕೊಡುವುದು ಬೇಡ ಎನ್ನುವ ಬರಹಗಳನ್ನು ನೋಡಿರುತ್ತೀರಾ. ಆದ್ರೆ, ಬಿಹಾರದ ಸಿವಾನ್‌ ಜಿಲ್ಲೆಯಲ್ಲಿ ಪ್ರಧಾನಿ ಮೋದಿಗೆ ಮತ ಹಾಕಿ ಎಂದು ಮದುವೆಯ ಆಹ್ವಾನ ಪತ್ರಿಕೆಯಲ್ಲಿ ಮುದ್ರಿಸಲಾಗಿದ್ದು, ಬಂಧುಗಳಿಗೆ, ಗೆಳೆಯ ಗೆಳತಿಯರಿಗೆ ಮೋದಿಗೆ ಮತ ಹಾಕುವ ಸಂದೇಶ ನೀಡುತ್ತಿದ್ದಾರೆ.

ಸಿವಾನ್‌ಕಾಲಾ ಗ್ರಾಮದ ನಿವಾಸಿ ಅಶೋಕ್‌ ಸಿಂಗ್, ತನ್ನ ಮಗಳ ಮದುವೆ ಆಹ್ವಾನ ಪತ್ರಿಕೆಯಲ್ಲಿ ಈ ರೀತಿಯ ಸಂದೇಶವನ್ನು ಪ್ರಿಂಟ್ ಮಾಡಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

''ನೀವು ನನ್ನ ಮಗಳಿಗೆ ಆಶೀರ್ವಾದ ಮಾಡಿ ಹಾಗೂ ದೇಶದ ಹಿತದೃಷ್ಟಿಗಾಗಿ ಮುಂಬರುವ ಲೋಕಸಭೆ ಚುನಾವಣೆಯಲ್ಲಿ ಪ್ರಧಾನಿ ಮೋದಿ ಪರವಾಗಿ ಮತ ಹಾಕಿ'' ಎಂದು ಆಹ್ವಾನ ಪತ್ರಿಕೆಯಲ್ಲಿ ಸಂದೇಶ ನೀಡಲಾಗಿದೆ.

ಇನ್ನು, ಈ ರೀತಿಯ ಮನವಿ ಮಾಡಿರುವುದಕ್ಕೆ ಕಾರಣವೇನು ಎಂದು ಸಿಂಗ್‌ರನ್ನು ಕೇಳಿದ್ದಕ್ಕೆ ''ದೇಶದ ಹಿತದೃಷ್ಟಿ ಮಾತ್ರ. ಇದರ ಹಿಂದೆ ಬೇರೆ ಯಾವುದೇ ಉದ್ದೇಶವಿಲ್ಲ'' ಎಂದು ಮಾಹಿತಿ ನೀಡಿದ್ದಾರೆ. ಅಲ್ಲದೆ, ''ಮೋದಿ ಜೀ ಗಿಂತ ಉತ್ತಮವಾದ ನಾಯಕ ಯಾರೂ ಇಲ್ಲ. ಹೀಗಾಗಿ, ಜನರು ಮೋದಿಜೀ ಪರವಾಗಿ ಮತ ಹಾಕಬೇಕು. ಪ್ರಧಾನಿ ಮೋದಿ ದೇಶದ ಪರವಾಗಿ ಯೋಚಿಸುತ್ತಾರೆ. ಆದರೆ, ಇತರರು ತಮ್ಮ ಪರವಾಗಿ ಮಾತ್ರ ಯೋಚಿಸುತ್ತಾರೆ'' ಎಂದು ಸಿಂಗ್ ಹೇಳಿದ್ದಾರೆ.

ಕಳೆದ 15 ವರ್ಷಗಳಿಂದ ಅಶೋಕ್‌ ಸಿಂಗ್ ಕುವೈತ್‌ನಲ್ಲಿದ್ದು, ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದಾರೆ.

ಅಲ್ಲದೆ, ಅವರ ಪುತ್ರ ರವೀಂದ್ರ ಸಿಂಗ್‌ ಕೂಡ ಇದೇ ರೀತಿಯ ಅಭಿಪ್ರಾಯ ಪಟ್ಟಿದ್ದಾರೆ. ''ನರೇಂದ್ರ ಮೋದಿ ಮಾತ್ರ ದೇಶವನ್ನು ಮುಂದಕ್ಕೆ ತೆಗೆದುಕೊಂಡು ಹೋಗುತ್ತಾರೆಯೇ ಹೊರತು ಬೇರೆ ಯಾವ ನಾಯಕರೂ ಮುಂದಕ್ಕೆ ತೆಗೆದುಕೊಂಡು ಹೋಗುವುದಿಲ್ಲ'' ಎಂದು ರವೀಂದ್ರ ಸಿಂಗ್ ತಿಳಿಸಿದ್ದಾರೆ.