ಸಮುದ್ರದಲ್ಲಿ ಬಿದ್ದ ಮೊಬೈಲ್ ಮರಳಿಸಿದ ತಿಮಿಂಗಲ; ಮನಸೆಳೆಯುವ ವೀಡಿಯೋ

ಹೊಸದಿಲ್ಲಿ: ಮಾತು ಬಾರದಿದ್ದರೂ, ಪ್ರಾಣಿಗಳು ಮನುಷ್ಯರಿಗಿಂತ ಹೆಚ್ಚು ಭಾವನೆಗಳನ್ನು ವ್ಯಕ್ತ ಪಡಿಸುತ್ತವೆ. ಇದನ್ನು ಸಾಬೀತು ಪಡಿಸುವಂತಹ ಘಟನೆಗಳು ಆಗಾಗ ನಡೆಯುತ್ತಲೇ ಇರುತ್ತವೆ. ಅದಕ್ಕೊಂದು ಸೇರ್ಪಡೆ ಈ ಘಟನೆ. ಆದರೆ ಇದು ಬಹುಶಃ ಹಿಂದೆಂದೂ ಆಗದಿರುವಂತಹ , ಮನ ಸೆಳೆಯುವ ಘಟನೆ.

ನಾರ್ವೆಯ ಹ್ಯಾಮರ್‌ಫೆಸ್ಟ್‌ ಹಾರ್ಬರ್‌ನಲ್ಲಿ ದೋಣಿಯೊಂದರಲ್ಲಿ ಹೋಗುತ್ತಿದ್ದಾಗ ಇಶಾ ಎಂಬ ಯುವತಿಯ ಮೊಬೈಲ್ ಕೈ ತಪ್ಪಿ ನೀರಲ್ಲಿ ಬಿತ್ತು. ಸಮುದ್ರದಲ್ಲಿ ಬಿದ್ದ ಮೇಲೆ ಮತ್ತೆ ಮರಳಿ ಸಿಗಲು ಸಾಧ್ಯವೆ? ದುಬಾರಿ ಬೆಲೆಯ ಮೊಬೈಲ್ ಕಳೆದುಕೊಂಡ ನೋವು ಆಕೆಯದಾಗಿತ್ತು.


ಆದರೆ ಕೆಲವೇ ಕ್ಷಣಗಳಲ್ಲಿ ಆ ದೋಣಿಯಲ್ಲಿರುವವರೆಲ್ಲ ದಂಗು ಬಡಿದು ಹೋಗುವಂತಹ ಘಟನೆ ನಡೆಯಿತು.ಬಿಳಿ ತಿಮಿಂಗಲವೊಂದು ಮೊಬೈಲ್‌ನ್ನು ಬಾಯಲ್ಲಿಟ್ಟುಕೊಂಡು ನೀರಿನಿಂದ ಮೇಲಕ್ಕೆ ಮುಖ ಮಾಡಿ ನಿಲ್ಲುತ್ತದೆ. ದೋಣಿಯಲ್ಲಿ ಕುಳಿತಿದ್ದ ಇಶಾ ಅದರ ಬಾಯಿಂದ ಮೊಬೈಲ್‌ನ್ನು ತೆಗೆದುಕೊಳ್ಳುತ್ತಾಳೆ. ಬಳಿಕ ನಗುತ್ತ ನಿಂತ ಆ ಮೀನನ್ನು ಕೆಲವರು ಸ್ಪರ್ಶಿಸುತ್ತಾರೆ. ಅಲ್ಲಿಗೆ ವೀಡಿಯೋ ಕೊನೆಯಾಗುತ್ತದೆ.

ಆ ಹುಡುಗಿಯ ಸ್ನೇಹಿತರೊಬ್ಬರು ಮೀನು ಮೊಬೈಲ್ ಹಿಡಿದುಕೊಂಡು ಮೇಲಕ್ಕೆ ಬರುತ್ತಿರುವ ದೃಶ್ಯವನ್ನು ವೀಡಿಯೋ ಮಾಡಿಕೊಂಡರು. ಮತ್ತೀಗ ಅದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಈ ಸುಂದರ ವೀಡಿಯೋವನ್ನು ನೋಡಿದರೆ ನಿಮಗೂ ಆ ಮೀನಿನ ಮೇಲೆ ಪ್ರೀತಿಯುಕ್ಕದಿರದು.