ಬಿಟ್ಟು ಹೋದ ವಿಮಾನವನ್ನೇ ಬೆನ್ನಟ್ಟಿದ ಮಹಿಳೆ! ವೀಡಿಯೋ ನೋಡಿ.

ಇಂಡೋನೇಷ್ಯಾ: ಸಾಮಾನ್ಯವಾಗಿ ಬಸ್‌ ಹಿಂದೆ ಓಡಿದ ಪ್ರಯಾಣಿಕರನ್ನು ನೋಡಿರುತ್ತೀರಿ, ಆದರೆ ವಿಮಾನದ ಹಿಂದೆಯೇ ಓಡುವ ಮೂಲಕ ಮಹಿಳೆಯೊಬ್ಬರು ಹೀಗೂ ಉಂಟೇ ಎಂದೆನಿಸಿಕೊಂಡಿದ್ದಾರೆ.

ಇಂಡೋನೇಷ್ಯಾದ ಗುರಾಹ್‌ ರೇ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಮಹಿಳಾ ಪ್ರಯಾಣಿಕರೊಬ್ಬರು ಕೈ-ತಪ್ಪಿದ ವಿಮಾನವನ್ನು ಓಡಿ ಹೋಗಿ ಹತ್ತಲು ಯತ್ನಿಸಿದ್ದಾರೆ. ಭದ್ರತಾ ಸಿಬ್ಬಂದಿ ತಡೆದರೂ ಮುನ್ನುಗ್ಗಲು ಯತ್ನಿಸಿದ್ದಾರೆ. ಈ ಘಟನೆ ವೀಡಿಯೋಗಳು ಸಾಮಾಜಿಕ ತಾಣದಲ್ಲಿ ಹಾಟ್‌ ಟಾಪಿಕ್‌ ಆಗಿವೆ.

ಅಲ್ಲಿನ ಮಾಧ್ಯಮಗಳ ಪ್ರಕಾರ ಮಹಿಳೆ ಸಿಟಿಲಿಂಕ್‌ ವಿಮಾನದಲ್ಲಿ ಬಾಲಿಯಿಂದ ಜಕಾರ್ತಾಗೆ ಪ್ರಯಾಣಿಸಲು ಟಿಕೆಟ್‌ ಖರೀದಿಸಿದ್ದರು. ಆದರೆ ವಿಮಾನ ಹೊರಡುವ ಹೊತ್ತಿಗೆ ಬರಲು ಮಹಿಳೆಗೆ ಸಾಧ್ಯವಾಗಿರಲಿಲ್ಲ. ವಿಮಾನ ಸಿಬ್ಬಂದಿ ಮೈಕ್‌ ಮೂಲಕ ಮೂರು ಬಾರಿ ಮಹಿಳೆಯನ್ನು ಕರೆದಿದ್ದಾರೆ. ಬಾರದಿದ್ದುದರಿಂದ ಪೈಲಟ್‌ಗೆ ಹೊರಡುವಂತೆ ಸೂಚನೆ ನೀಡಿದ್ದಾರೆ.

ಇನ್ನೇನು ವಿಮಾನ ಹೊರಟಿತು ಎಂಬ ಸಂದರ್ಭದಲ್ಲಿ ಬಂದ ಮಹಿಳೆ ಬೋರ್ಡಿಂಗ್‌ ಪಾಸ್‌ನೊಂದಿಗೆ ವಿಮಾನ ಹತ್ತಲು ಆಗಮಿಸಿದ್ದಾಳೆ. ವಿಮಾನ ಟೇಕ್‌ಆಫ್‌ ಆಗುತ್ತಿದ್ದುದರಿಂದ ಇಬ್ಬರು ಭದ್ರತಾ ಸಿಬ್ಬಂದಿ ಆಕೆಯನ್ನು ತಡೆದಿದ್ದಾರೆ. ಭದ್ರತಾ ಸಿಬ್ಬಂದಿಯನ್ನು ದೂಡಿ, ಓಡಿ ಹೋಗಿ ವಿಮಾನ ಹತ್ತಲು ಯತ್ನಿಸಿದ ಮಹಿಳೆಯ ವೀಡಿಯೋವನ್ನು ಮತ್ತೊಂದು ವಿಮಾನದಲ್ಲಿದ್ದ ಪ್ರಯಾಣಿಕರೊಬ್ಬರು ಮೊಬೈಲ್‌ನಲ್ಲಿ ಚಿತ್ರೀಕರಿಸಿ, ಸಾಮಾಜಿಕ ತಾಣದಲ್ಲಿ ಹರಿಯ ಬಿಟ್ಟಿದ್ದಾರೆ.