ವಿದ್ಯುತ್‌ ಬಳಸದೆ 79 ವರ್ಷದಿಂದ ಜೀವನ ಮಾಡುತ್ತಿರುವ ಅಜ್ಜಿ!

ಪುಣೆ: ಬೇಸಿಗೆಯ ಬೇಗೆ ಹೆಚ್ಚಾದಂತೆ ಮಹಾರಾಷ್ಟ್ರದ ಪುಣೆಯಲ್ಲಿ 41 ಡಿಗ್ರಿ ಸೆಲ್ಸಿಯಸ್‌ ಗರಿಷ್ಠ ತಾಪಮಾನ ದಾಖಲಾಗಿದೆ. ಇಂತಹ ಬಿಸಿಲಿನಲ್ಲಿ ನೀವು ಒಂದು ದಿನವಾದರೂ ವಿದ್ಯುತ್‌ ಇಲ್ಲದೆ ಜೀವಿಸುವ ಬಗ್ಗೆ ಚಿಂತೆ ಮಾಡುತ್ತೀರಾ? ಆದರೆ, ಪುಣೆಯ ಬುಧವಾರ್‌ ಪೇಥ್‌ನಲ್ಲಿ ವಾಸಿಸುತ್ತಿರುವ 79 ವರ್ಷದ ಅಜ್ಜಿ ತನ್ನ ಜೀವನದುದ್ದಕ್ಕೂ ವಿದ್ಯುತ್‌ ಸಂಪರ್ಕವನ್ನೇ ಬಳಸಿಲ್ಲವಂತೆ.

ಪ್ರಕೃತಿ ಹಾಗೂ ಪರಿಸರದ ಮೇಲಿನ ಪ್ರೀತಿಯಿಂದಾಗಿ 79 ವರ್ಷದ ನಿವೃತ್ತ ಪ್ರೊಫೆಸರ್ ಪುಣೆಯ ಬುಧವಾರ್‌ ಪೇಥ್‌ನ ಮನೆಯೊಂದರಲ್ಲಿ ವಾಸಿಸುತ್ತಿದ್ದು ಆಕೆ ತನ್ನ ಜೀವನದುದ್ದಕ್ಕೂ ವಿದ್ಯುತ್ತನ್ನು ಬಳಸಿಲ್ಲ ಎಂದು ತಿಳಿದುಬಂದಿದೆ.

ಈ ಸಂಬಂಧ ಸುದ್ದಿಸಂಸ್ಥೆ ಎಎನ್‌ಐಗೆ ಮಾಹಿತಿ ನೀಡಿದ ಹೇಮಾ ಸೇನ್‌, ''ಆಹಾರ, ಆಶ್ರಯ ಮತ್ತು ಉಡುಪು - ಇವು ಮೂರು ಮೂಲಭೂತ ಅಗತ್ಯತೆಗಳು. ಈ ಹಿಂದೆ ವಿದ್ಯುತ್ ಸಂಪರ್ಕವಿರಲಿಲ್ಲ. ಅದು ಬಹಳ ತಡವಾಗಿ ಬಂದಿದೆ. ನಾನೂ ಸಹ ಅದನ್ನು ಬಿಟ್ಟು ನಿಭಾಯಿಸಬಲ್ಲೆ'' ಎಂದು ಹೇಳಿಕೊಂಡಿದ್ದಾರೆ.

ತಾನು ವಾಸಿಸುವ ಮನೆಯಲ್ಲಿ ನಾಯಿ, ಎರಡು ಬೆಕ್ಕು, ಮುಂಗುಸಿ ಹಾಗೂ ಹಲವು ಪಕ್ಷಿಗಳಿವೆ. ಆ ಮನೆ ಅವುಗಳಿಗೆ ಸೇರಿದ್ದೇ ಹೊರತು ತನ್ನದಲ್ಲ. ತಾನು ಆ ಪ್ರಾಣಿಗಳನ್ನು ನೋಡಿಕೊಳ್ಳುತ್ತೇನಷ್ಟೇ'' ಎಂದು ತಿಳಿಸಿದ್ದಾರೆ.

ಅಲ್ಲದೆ, ಜನ ನನ್ನನ್ನು ಮೂರ್ಖ ಎನ್ನುತ್ತಾರೆ. ನಾನು ಹುಚ್ಚಿಯೇ ಇರಬಹುದು. ಆದರೆ, ಇದು ನನ್ನ ಜೀವನದ ರೀತಿ. ನಾನು ನನಗಿಷ್ಟ ಬಂದ ಹಾಗೆ ಬದುಕುತ್ತೇನೆ'' ಎಂದು ಸುದ್ದಿಸಂಸ್ಥೆ ಎಎನ್‌ಐಗೆ ತಿಳಿಸಿದ್ದಾರೆ.


ಸಾವಿತ್ರಿಬಾಯಿ ಫುಲೆ ಪುಣೆ ವಿವಿಯಿಂದ ಸಸ್ಯಶಾಸ್ತ್ರ ವಿಷಯದಲ್ಲಿ ಪಿಎಚ್‌ಡಿ ಪಡೆದುಕೊಂಡಿರುವ ಹೇಮಾ, ಪುಣೆಯ ಗರ್ವಾರೇ ವಿವಿಯಲ್ಲಿ ಹಲವು ವರ್ಷಗಳಿಂದ ಪಾಠ ಮಾಡುತ್ತಿದ್ದರು.

ಇನ್ನು, ಮನೆ ಅಂದರೆ ಸಣ್ಣ ಗುಡಿಸಲಿನಲ್ಲಿ ಹಿರಿಯ ಮಹಿಳೆ ವಾಸ ಮಾಡುತ್ತಿದ್ದು ಅದರ ಸುತ್ತಮುತ್ತಲೂ ಹಲವು ವಿಧದ ಪಕ್ಷಿಗಳು ಹಾಗೂ ಮರಗಳಿವೆ. ಅಲ್ಲದೆ, ಸಸ್ಯಶಾಸ್ತ್ರ ಹಾಗೂ ಪರಿಸರದ ಕುರಿತು ಹಲವು ಪುಸ್ತಕಗಳನ್ನು ಸಹ ಹೇಮಾ ಬರೆದಿದ್ದಾರೆ.

ಅಲ್ಲದೆ, ''ಹಲವರು ತನಗೆ ನೀವು ವಿದ್ಯುತ್ ಇಲ್ಲದೆ ಹೇಗೆ ಜೀವಿಸುತ್ತೀರಿ ಎಂದು ಕೇಳುತ್ತಾರೆ. ತಾನು ಅವರಿಗೆ ನೀವು ವಿದ್ಯುತ್‌ ಸಂಪರ್ಕದೊಂದಿಗೆ ಹೇಗೆ ಬದುಕುತ್ತೀರಿ ಎಂದು ಕೇಳುತ್ತೇನೆ. ನಾನು ಯಾರಿಗೂ ಯಾವುದೇ ಸಂದೇಶ ಅಥವಾ ಪಾಠ ಕಲಿಸಬೇಕಿಲ್ಲ'' ಎಂದು ಹೇಮಾ ಮಾಹಿತಿ ನೀಡಿದ್ದಾರೆ.