ಪತ್ನಿಯ ವಿಚಿತ್ರ ಡ್ರೆಸ್: ಹಾವು ಅಂದ್ಕೊಂಡು ಬ್ಯಾಟಿನಿಂದ ಹೊಡೆದ ಪತಿ!

[This story originally published in Navbharat Times on Jan 05, 2019]

Vijaya Karnataka Web

ಮೆಲ್ಬೊರ್ನ್‌: ಜಗತ್ತು ಫ್ಯಾಷನೆಬಲ್ ಆಗುತ್ತಿದೆ. ಜನರು ಚಿತ್ರವಿಚಿತ್ರ ಬಟ್ಟೆ ಧರಿಸುವ ಮೂಲಕ ಆಪತ್ತನ್ನು ಮೈಮೇಲೆ ಎಳೆದುಕೊಳ್ಳುತ್ತಿದ್ದಾರೆ. ಇದಕ್ಕೆ ತಾಜಾ ಉದಾಹರಣೆಯೊಂದು ಆಸ್ಟ್ರೇಲಿಯಾದ ಮೆಲ್ಬೊರ್ನ್‌ನಲ್ಲಿ ನಡೆದಿದೆ.

ಹೌದು, ಇಲ್ಲಿಯ ಮಹಿಳೆಯೊಬ್ಬರು ಪಾದದ ಮೇಲೆ ಹಾವಿನಂತೆ ಭಾಸವಾಗುವ ವಿಚಿತ್ರ ವಿನ್ಯಾಸದ ಉಡುಗೆ ಧರಿಸಿದ್ದರು. ಆದರೆ, ಅದನ್ನು ನೋಡಿದ ಆಕೆಯ ಪತಿಮಹಾಶಯ ಅದನ್ನು ತಪ್ಪಾಗಿ ಅರ್ಥೈಸಿಕೊಂಡು ನಿಜವಾದ ಹಾವೆಂದು ಭಾವಿಸಿ ಬ್ಯಾಟ್‌ನಿಂದ ಬಾರಿಸಿದ್ದಾನೆ. ಘಟನೆಯಲ್ಲಿ ಮಹಿಳೆ ಕಾಲು ಮುರಿತಕ್ಕೊಳಗಾಗಿದ್ದು, ಚಿಕಿತ್ಸೆ ಪಡೆಯುತ್ತಿದ್ದಾಳೆ.

ಆಗಿದ್ದಿಷ್ಟೇ. ಮಹಿಳೆ ಮಲಗುವಾಗ ಹಾವಿನಂತೆ ಕಾಣುವ 'ಸ್ಟಾಕಿಂಗ್ಸ್' ಧರಿಸಿದ್ದರು. ಶರೀರದ ಸಂಪೂರ್ಣ ಭಾಗ ಹೊದಿಕೆಯಲ್ಲಿ ಮುಚ್ಚಿ ಹೋಗಿತ್ತು. ಆದರೆ, ಕಾಲುಗಳು ಮಾತ್ರ ಹೊದಿಕೆಯಿಂದ ಹೊರಬಂದಿದ್ದವು. ರಾತ್ರಿ ವೇಳೆ ಪತ್ನಿಯಿರುವ ಬೆಡ್ ರೂಮ್‌ಗೆ ಆಗಮಿಸಿದ ಪತಿರಾಯ ಹೌಹಾರಿ ಹೋಗಿದ್ದ. ಪತ್ನಿಯ ಪಾದಗಳನ್ನೇ ಹಾವು ಎಂದು ತಿಳಿದ ಆತ, ಅದನ್ನು ಕೊಲ್ಲಲೆಂದು ಅಥವಾ ಓಡಿಸಲೆಂದು ಬೇಸ್ ಬಾಲ್ ಬ್ಯಾಟ್‌ನಿಂದ ಜೋರಾಗಿ ಹೊಡೆದಿದ್ದಾನೆ.

ಹಲ್ಲೆ ಬಳಿಕ ಪತ್ನಿ ಕಿರುಚಲಾರಂಭಿಸಿದ ಬಳಿಕವಷ್ಟೇ ಪತಿರಾಯನಿಗೆ ನೈಜ ಸಂಗತಿ ಅರಿವಾಗಿದೆ. ಕೂಡಲೇ ಪತ್ನಿಯನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸುತ್ತಿದ್ದಾರೆ.