ಟ್ರಂಪ್‌-ಪುಟಿನ್‌ ಐತಿಹಾಸಿಕ ಭೇಟಿ

ಹೆಲ್ಸಿಂಕಿ: ವಿಶ್ವದ ಎರಡು ಪ್ರಬಲ ಅಣ್ವಸ್ತ್ರ ರಾಷ್ಟ್ರಗಳ ನಡುವಿನ ಸಂಬಂಧವನ್ನು ಪುನಃ ಸ್ಥಾಪಿಸುವ ನಿಟ್ಟಿನಲ್ಲಿ ಫಿನ್‌ಲ್ಯಾಂಡ್‌ನ ಹೆಲ್ಸಿಂಕಿಯಲ್ಲಿ ಸೋಮವಾರ ಭೇಟಿಯಾದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಮತ್ತು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್‌ ಪುಟಿನ್‌ ಪರಸ್ಪರ ಮಾತುಕತೆ ನಡೆಸಿದರು.

ವಿಶ್ವದ ರಾಷ್ಟ್ರಗಳು ಕುತೂಹಲದಿಂದ ಗಮನಿಸುತ್ತಿರುವ ಈ ಐತಿಹಾಸಿಕ ಶೃಂಗಸಭೆಯ ಮೊದಲು ಟ್ರಂಪ್‌ ಮತ್ತು ಪುಟಿನ್‌ ಸುದ್ದಿಗೋಷ್ಠಿ ನಡೆಸಿದರು. ''ನಮ್ಮ ಸಂಬಂಧಗಳು ಮತ್ತು ಪ್ರಪಂಚದ ಸಮಸ್ಯೆಗಳ ಕುರಿತು ಅರ್ಥಪೂರ್ಣ ರೀತಿಯಲ್ಲಿ ಮಾತುಕತೆ ನಡೆಸುವ ಸಮಯ ಈಗ ಒದಗಿಬಂದಿದೆ. ಮಿಲಿಟರಿ, ವ್ಯಾಪಾರ ಸೇರಿದಂತೆ ಎಲ್ಲಾ ಕ್ಷೇತ್ರಗಳ ಬಗ್ಗೆ ಮಾತುಕತೆ ನಡೆಯಲಿದೆ,'' ಎಂದು ಟ್ರಂಪ್‌ ತಿಳಿಸಿದರು.

''ಕಳೆದ ಕೆಲವು ವರ್ಷಗಳಿಂದ ನಾವು ಜತೆಯಾಗಿ ಸಾಗುತ್ತಿರಲಿಲ್ಲ. ಎರಡು ಮಹಾನ್‌ ಪರಮಾಣು ಶಕ್ತಿಗಳು ಒಂದಾಗಲು ಪ್ರಪಂಚ ಬಯಸಿದೆ ಎಂದು ನಾನು ಭಾವಿಸುತ್ತೇನೆ. ಉಭಯ ರಾಷ್ಟ್ರಗಳು ಒಂದಾಗಿ ಉತ್ತಮ ಅವಕಾಶಗಳನ್ನು ಹೊಂದಿದ್ದೇವೆ. ನಾವು ಅಭೂತಪೂರ್ವ ಸಂಬಂಧ ಹೊಂದಲಿರುವ ಬಗ್ಗೆ ಆಶಾವಾದವಿದೆ,'' ಎಂದು ಟ್ರಂಪ್‌ ಹೇಳಿದರು.

ಅಮೆರಿಕದ ಚುನಾವಣಾ ಪ್ರಕ್ರಿಯೆಗಳಲ್ಲಿ ರಷ್ಯಾ ಯಾವತ್ತೂ ಮೂಗು ತೂರಿಸಿಲ್ಲ ಎಂದು ಪುಟಿನ್‌ ಇದೇ ವೇಳೆ ಸ್ಪಷ್ಟಪಡಿಸಿದರು.