​ಅಮೆರಿಕ 'ಸ್ಪೆಲ್ಲಿಂಗ್‌ ಬೀ' ಗೆದ್ದ ಅನನ್ಯಾ

ಮೇರಿಲ್ಯಾಂಡ್‌: ಅಮೆರಿಕದ 'ಸ್ಕ್ರಿಫ್ಸ್‌ ನ್ಯಾಷನಲ್‌ ಸ್ಪೆಲ್ಲಿಂಗ್‌ ಬೀ' ಸ್ಪರ್ಧೆಯಲ್ಲಿ 12 ವರ್ಷದ ಭಾರತೀಯ ಮೂಲದ ಅಮೆರಿಕನ್‌ ವಿದ್ಯಾರ್ಥಿನಿ ಅನನ್ಯಾ ವಿನಯ್‌ ಜಯಶಾಲಿಯಾಗಿದ್ದು, ಇದರೊಂದಿಗೆ ಪ್ರತಿಷ್ಠಿತ ಟ್ರೋಫಿ ಸತತ 13ನೇ ಬಾರಿಗೆ ಭಾರತೀಯ ಸಂಜಾತರ ಪಾಲಾದಂತಾಗಿದೆ. 'ಮ್ಯಾರಕೇನ್‌'(ಘ್ಕಿಞa್ಟಟ್ಚaಜ್ಞಿ) ಪದದ ಸ್ಪೆಲ್ಲಿಂಗ್‌ಅನ್ನು ಸರಿಯಾಗಿ ಬಿಡಿಸುವ ಮೂಲಕ ಸುಮಾರು 26 ಲಕ್ಷ ರೂ. (40000 ಡಾಲರ್‌) ನಗದು ಬಹುಮಾನ ಅನನ್ಯಾ ಕೈಸೇರಿದೆ.

ಕ್ಯಾಲಿಯಫೋರ್ನಿಯಾ ರಾಜ್ಯದ ದ ಫ್ರೆಸ್ನೊದಲ್ಲಿ 6ನೇ ತರಗತಿ ಓದುತ್ತಿರುವ ಅನನ್ಯಾ 12 ಗಂಟೆಗಳ ಕಾಲ ಸ್ಪರ್ಧೆಯಲ್ಲಿ ಭಾಗವಹಿಸಿ ಒಟ್ಟು 35 ಪದಗಳ ಸ್ಪೆಲ್ಲಿಂಗ್‌ಅನ್ನು ಸರಿಯಾಗಿ ಬಿಡಿಸುವ ಮೂಲಕ ಗಮನ ಸೆಳೆದರು. ಅಂತಿಮ ಹಣಹಾಣಿಯಲ್ಲಿ ಫ್ರೆಂಚ್‌ ಮೂಲದ 'ಮಾರೊಕೇನ್‌'ಪದದ ಸ್ಪೆಲ್ಲಿಂಗ್‌ ಹೇಳುವ ಮೂಲಕ ಟ್ರೋಫಿ ಮುಡಿಗೇರಿಸಿಕೊಂಡರು. ಪ್ರತಿಸ್ಪರ್ಧಿ ಒಕ್ಲೊಹಾಮದ 14 ವರ್ಷದ ವಿದ್ಯಾರ್ಥಿ ರೋಹನ್‌ ರಾಜೀವ್‌ ಸ್ಕ್ಯಾ‌ಂಡಿನೇವಿಯಾ ಮೂಲದ 'ಮರ್ರಂ' (ಘ್ಕಿಞa್ಟ್ಟaಞ) ಪದದ ಸ್ಪೆಲ್ಲಿಂಗ್‌ಅನ್ನು ತಪ್ಪು ಹೇಳುವ ಮೂಲಕ ಕೊನೆ ಗಳಿಗೆಯಲ್ಲಿ ಗೆಲುವು ಸಾಧಿಸಲಾಗದೇ ರನ್ನರ್‌ ಅಪ್‌ಗೆ ತೃಪ್ತಿಪಟ್ಟುಕೊಂಡರು.

ಮಾರೊಕೇನ್‌ ಅರ್ಥವೇನು?
ವಾಷಿಂಗ್ಟನ್‌ ಹೊರವಲಯದ ಗೇಲಾರ್ಡ್‌ ನ್ಯಾಷನಲ್‌ ರೆಸಾರ್ಟ್‌ ಅಂಡ್‌ ಕನ್ವೆನ್ಷನ್‌ ಸೆಂಟರ್‌ನಲ್ಲಿ ನಡೆದ 90ನೇ ಈ ಚಾಂಪಿಯನ್‌ಶಿಪ್‌ನಲ್ಲಿ ಅಮೆರಿಕದ 50 ರಾಜ್ಯಗಳಿಂದ 6-15 ವರ್ಷದ 11 ಮಿಲಿಯನ್‌ ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ವಿವಿಧ ಹಂತಗಳನ್ನು ದಾಟಿ ಕೊನೆಯ ಸುತ್ತಿಗೆ 40 ಮಂದಿ ಅರ್ಹತೆ ಪಡೆದಿದ್ದರು. ವಿಜಯಶಾಲಿ ಅನನ್ಯಾ ಸ್ಪೆಲ್‌ ಮಾಡಿದ 'ಮಾರೊಕೇನ್‌' ಪದ ಫ್ರೆಂಚ್‌ ಮೂಲದ್ದು. ಇದರರ್ಥ ರೇಷ್ಮೆ ಅಥವಾ ರೇಯಾನ್‌ನಿಂದ ತಯಾರಿಸಿದ ಬಟ್ಟೆ .

ಈ ಬಾರಿಯೇ ವಿನ್ನರ್‌: ಕಳೆದ ಮೂರು ವರ್ಷಗಳಿಂದ ಸ್ಪರ್ಧೆಯು ಟೈನಲ್ಲಿ ಅಂತಿಮಗೊಳ್ಳುತ್ತಿತ್ತು. ಆದರೆ ಈ ಬಾರಿಯ ಸ್ಪರ್ಧೆಯಲ್ಲಿ ಒಬ್ಬರೇ ವಿನ್ನರ್‌ ಆಗಿದ್ದು ವಿಶೇಷ. ''ಇದೊಂದು ಅದ್ಭುತ ಅನುಭವ. ಗೆಲುವು ಕನಸಿನಂತೆ ಭಾಸವಾಗುತ್ತಿದೆ. ನಿಜಕ್ಕೂ ಖುಷಿಯಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ನನ್ನ ಬುದ್ಧಿಮತ್ತೆಯನ್ನು ಮತ್ತಷ್ಟು ಹೆಚ್ಚಿಸಿಕೊಳ್ಳುತ್ತೇನೆ,'' ಎನ್ನುತ್ತಾರೆ ಅನನ್ಯಾ. ಇವಳ ಪ್ರದರ್ಶನಕ್ಕೆ ಟ್ವಿಟರ್‌ನಲ್ಲಿ ಅಭಿನಂದನೆಗಳ ಮಹಾಪೂರವೇ ಹರಿದುಬಂದಿದೆ.