ರಷ್ಯಾ ಸಮುದ್ರದಲ್ಲಿ 2 ಹಡಗುಗಳಿಗೆ ಬೆಂಕಿ: ಭಾರತೀಯರ ಸಹಿತ 14 ಮಂದಿ ಸಾವು

ಮಾಸ್ಕೋ: ಭಾರತೀಯರು, ಟರ್ಕಿ ಮತ್ತು ಲಿಬಿಯಾದ ಸಿಬ್ಬಂದಿಗಳಿದ್ದ ಎರಡು ಹಡಗುಗಳು ರಷ್ಯಾದ ಕಿರ್ಚ್‌ ಜಲಸಂಧಿಯಲ್ಲಿ ಬೆಂಕಿಗೆ ತುತ್ತಾಗಿದ್ದು ಕನಿಷ್ಠ 14 ಮಂದಿ ಮೃತಪಟ್ಟಿದ್ದಾರೆ.

ಸಾಗರ ಮಧ್ಯೆ ರಷ್ಯಾದ ಪ್ರಾದೇಶಿಕ ಗಡಿಗೆ ಸಮೀಪ ಸೋಮವಾರ ಈ ದುರಂತ ಸಂಭವಿಸಿದೆ. ಎರಡೂ ಹಡಗುಗಳಲ್ಲಿ ತಾಂಜಾನಿಯಾದ ಧ್ವಜ ಹಾರಾಡುತ್ತಿದೆ. ಒಂದು ಹಡಗಿನಲ್ಲಿ ದ್ರವೀಕೃತ ನೈಸರ್ಗಿಕ ಅನಿಲ ಸಾಗಿಸಲಾಗುತ್ತಿದ್ದರೆ, ಇನ್ನೊಂದು ಹಡಗು ಟ್ಯಾಂಕರನ್ನು ಸಾಗಿಸುತ್ತಿತ್ತು. ಇಂಧನ ವರ್ಗಾವಣೆ ವೇಳೆ ಎರಡೂ ಹಡಗುಗಳಿಗೆ ಬೆಂಕಿ ಹತ್ತಿಕೊಂಡಿತು ಎಂದು ಮಾಧ್ಯಮಗಳು ವರದಿ ಮಾಡಿವೆ.

ಕ್ಯಾಂಡಿ ಹೆಸರಿನ ಒಂದು ಹಡಗಿನಲ್ಲಿ 17 ಸಿಬ್ಬಂದಿಗಳಿದ್ದರು. ಅವರ ಪೈಕಿ 9 ಮಂದಿ ಟರ್ಕಿ ಪ್ರಜೆಗಳು ಹಾಗೂ 8 ಮಂದಿ ಭಾರತೀಯರಿದ್ದರು.

ಮ್ಯಾಸ್ಟ್ರೋ ಹೆಸರಿನ ಇನ್ನೊಂದು ಹಡಗಿನಲ್ಲಿ 7 ಮಂದಿ ಟರ್ಕಿ, 7 ಮಂದಿ ಭಾರತೀಯರು ಹಾಗೂ ಒಬ್ಬ ಲಿಬಿಯಾದ ಪ್ರಜೆಯಿದ್ದ ಎಂದು ರಷ್ಯಾದ ಸುದ್ದಿಸಂಸ್ಥೆ ತಾಸ್‌ ವರದಿ ಮಾಡಿದೆ.

ದುರಂತದಲ್ಲಿ 14 ಮಂದಿ ಮೃತಪಟ್ಟಿದ್ದಾರೆ ಎಂದು ಕ್ರಿಮಿಯಾದ ಮುಖ್ಯ ಆಡಳಿತಾಧಿಕಾರಿ ಸೆರ್ಗೀ ಅಕ್ಸಿಯೊನೊವ್ ತಿಳಿಸಿದರು.

'ಬೆಂಕಿಗೆ ಕಾರಣವೇನೆಂದು ಸದ್ಯಕ್ಕೆ ಹೇಳಲಾಗದು. 14 ಮಂದಿ ನಾವಿಕರು ಮೃತಪಟ್ಟಿದ್ದಾರೆ ಎಂದಷ್ಟೇ ನಮಗೆ ಮಾಹಿತಿ ಬಂದಿದೆ. ಇತರ ನಾವಿಕರು ಇನ್ನೂ ಆಸ್ಪತ್ರೆಗೆ ತಲುಪಿಲ್ಲ. ಕಿರ್ಚ್ ಆಸ್ಪತ್ರೆಗಳಲ್ಲಿ ಅವರನ್ನು ದಾಖಲಿಸಿಕೊಳ್ಳಲು ಸಿದ್ಧತೆ ನಡೆಸಲಾಗಿದೆ' ಎಂದವರು ವಿವರಿಸಿದರು.

12 ಮಂದಿಯನ್ನು ರಕ್ಷಿಸಲಾಗಿದೆ. ಆರು ಮಂದಿ ನಾಪತ್ತೆಯಾಗಿದ್ದಾರೆ. ಶೋಧ ಹಾಗೂ ರಕ್ಷಣಾ ಕಾರ್ಯಾಚರಣೆ ಜಾರಿಯಲ್ಲಿದೆ.

ಬಹುಶಃ ಒಂದು ಹಡಗಿನಲ್ಲಿ ಉಂಟಾದ ಸ್ಫೋಟಕ್ಕೆ ಬೆಂಕಿ ಹೊತ್ತಿಕೊಂಡಿದ್ದು, ಇನ್ನೊಂದು ಹಡಗಿಗೂ ವ್ಯಾಪಿಸಿರಬಹುದು ಎಂದು ಅಂದಾಜಿಸಲಾಗಿದೆ. ರಕ್ಷಣಾ ಹಡಗು ಸ್ಥಳಕ್ಕೆ ಧಾವಿಸುತ್ತಿದೆ ಎಂದು ರಷ್ಯಾದ ಸಾಗರ ಸಾರಿಗೆ ಏಜೆನ್ಸಿ ವಕ್ತಾರ ತಿಳಿಸಿದರು.