ಮುಂಬಯಿ ದಾಳಿ ರೂವಾರಿ ಸಯೀದ್‌ಗೆ ಗೃಹ ಬಂಧನ

ಇಸ್ಲಾಮಾಬಾದ್: ವಿಶ್ವದ ವಿವಿಧ ರಾಷ್ಟ್ರಗಳಿಂದ ಒತ್ತಡಕ್ಕೊಳಗಾದ ಪಾಕಿಸ್ತಾನ ಮುಂಬಯಿ ದಾಳಿ ಸಂಚುಕೋರ ಜಮಾತ್‌ ಉದ್‌ ದಾವಾ (ಜೆಯುಡಿ) ಮುಖ್ಯಸ್ಥ ಹಫೀಜ್ ಸಯೀದ್ ಮತ್ತು ಇತರೆ ನಾಲ್ವರನ್ನು ಸೋಮವಾರ ರಾತ್ರಿ ಬಂಧಿಸಿ, ಗೃಹ ಬಂಧನದಲ್ಲಿರಿಸಿದೆ.

ಈ ಅಚ್ಚರಿಯ ಬೆಳವಣಿಗೆಯಲ್ಲಿ ಲಷ್ಕರ್ ಏ ತೋಯ್ಬಾದ ಸಹ ಸಂಸ್ಥಾಪಕ ಸಯೀದ್ ಮನೆಯನ್ನು ಕಾರಾಗೃಹವೆಂದು ಘೋಷಿಸಿದ್ದು, ಆತನನ್ನು ಗೃಹ ಬಂಧನದಲ್ಲಿರಿಸಲಾಗುವುದೆಂದು ಪೊಲೀಸರು ಸ್ಪಷ್ಟಪಡಿಸಿದ್ದಾರೆ.

ಸಯೀದ್‌ನನ್ನು ಬಂಧಿಸುವಂತೆ ಪಂಜಾಬ್ ಪ್ರಾಂತ್ಯದ ಆಂತರಿಕ ಸಚಿವ ಭಾನುವಾರ ಆದೇಶಿಸಿದ್ದರು. ಲಹೋರಿನ ಮಸ್ಜೀದ್-ಏ-ಖಾದ್ಸೀಯಾ ಚೌಬುರ್ಜಿಯಲ್ಲಿದ್ದಾಗ ಸಯೀದ್‌ನನ್ನು ಪೊಲೀಸರು ಬಂಧಿಸಿದ್ದಾರೆ.

'ಜೆಯುಡಿ ಮುಖ್ಯ ಕಚೇರಿಯಲ್ಲಿ ಸಯೀದ್‌ನಲ್ಲಿ ಬಂಧಿಸುವ ವೇಳೆ ಬಿಗಿ ಭದ್ರತೆ ಇತ್ತು,' ಎಂದು ಸಂಘಟನೆಯ ಪದಾಧಿಕಾರಿ ಅಹ್ಮದ್ ನದೀಮ್ ಹೇಳಿದ್ದಾರೆ.

2010-11ರಿಂದಲೂ ಜೆಯುಡಿ ಮೇಲೆ ವಿಶ್ವಸಂಸ್ಥೆ ಕಣ್ಣಿಟ್ಟಿದ್ದು, ಈ ಸಂಘಟನೆ ಹಾಗೂ ಇದರ ಮುಖ್ಯಸ್ಥನ ಮೇಲೆ ನಿರ್ಬಂಧ ವಿಧಿಸುವ ಬಗ್ಗೆ ಭಾರತ ಸೇರಿ ಇತರೆ ರಾಷ್ಟ್ರಗಳು ಆಗ್ರಹಿಸುತ್ತಿದ್ದವು. ಸದಾ ಸಯೀದ್‌ನನ್ನು ರಕ್ಷಿಸುತ್ತಲೇ ಬಂದಿದ್ದ ಪಾಕಿಸ್ತಾನ ಇದೀಗ ಉಗ್ರನನ್ನು ಬಂಧಿಸಿದೆ.