ಬಲೂಚಿಸ್ತಾನದ ದರ್ಗಾದಲ್ಲಿ ಸ್ಫೋಟ: 30 ಬಲಿ

ಕರಾಚಿ: ಪಾಕಿಸ್ತಾನದ ಬಲೂಚಿಸ್ತಾನ ಪ್ರಾಂತ್ಯದ ದರ್ಗಾವೊಂದರಲ್ಲಿ ಶನಿವಾರ ಸಂಭವಿಸಿದ ಪ್ರಬಲ ಸ್ಫೋಟಕ್ಕೆ ಮಹಿಳೆಯರು, ಮಕ್ಕಳು ಸೇರಿದಂತೆ ಸುಮಾರು 30 ಜನರು ಮೃತಪಟ್ಟು, 100ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಒಳಾಡಳಿತ ಸಚಿವ ಸರ್ಫರಾಜ್‌ ಬುಗ್ತಿ ಅವರು ಸ್ಫೋಟ ಘಟನೆಯನ್ನು ದೃಢಪಡಿಸಿದ್ದಾರೆ. ಯಾವುದೇ ಉಗ್ರ ಸಂಘಟನೆಗಳು ಇದುವರೆಗೂ ದಾಳಿಯ ಹೊಣೆ ಹೊತ್ತುಕೊಂಡಿಲ್ಲ.

ಪ್ರಾಂತ್ಯದ ಲಸ್ಬೆಲಾ ಜಿಲ್ಲೆಯಲ್ಲಿರುವ ಶಾ ನೂರಾನಿ ದರ್ಗಾದಲ್ಲಿ ಸೂಫಿ ನೃತ್ಯ ಕಾರ್ಯಕ್ರಮ 'ಧಮಾಲ್‌'ನಲ್ಲಿ ಭಕ್ತರು ಪಾಲ್ಗೊಂಡಿದ್ದ ವೇಳೆ ಸ್ಫೋಟ ಸಂಭವಿಸಿದೆ. ಸ್ಫೋಟದ ತೀವ್ರತೆಗೆ ದರ್ಗಾದ ಕಟ್ಟಡ ಧ್ವಂಸಗೊಂಡಿದ್ದು, ರಕ್ತಸಿಕ್ತ ಮೃತದೇಹಗಳು ಚೆಲ್ಲಾಪಿಲ್ಲಿಯಾಗಿ ಬಿದ್ದಿದ್ದವು. ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ನೂರಾರು ಜನ ಪಾಲ್ಗೊಂಡಿದ್ದರೂ ಯಾವುದೇ ಸೂಕ್ತ ಭದ್ರತೆ ಹಾಗೂ ವೈದ್ಯಕೀಯ ಸೌಲಭ್ಯ ಕೈಗೊಂಡಿರಲಿಲ್ಲ ಎಂಬ ಮಾತುಗಳು ಕೇಳಿಬಂದಿವೆ.

ಕಳೆದ ಆಗಸ್ಟ್‌ನಿಂದ ಬಲೂಚಿಸ್ತಾನ ಪ್ರಾಂತ್ಯದಲ್ಲಿ ನಡೆದ ಮೂರನೇ ಬಾಂಬ್‌ ದಾಳಿ ಇದಾಗಿದೆ. ಆಗಸ್ಟ್‌ನಲ್ಲಿ ಪ್ರಾಂತ್ಯದ ರಾಜಧಾನಿ ಕ್ವೆಟ್ವಾದ ಸರಕಾರಿ ಆಸ್ಪತ್ರೆಯ ಹೊರಗೆ ಸಂಭವಿಸಿದ ಬಾಂಬ್‌ ಸ್ಫೋಟದಲ್ಲಿ 70 ಮಂದಿ ಮೃತಪಟ್ಟು, ಹಲವರು ಗಾಯಗೊಂಡಿದ್ದರು. ಕಳೆದ ತಿಂಗಳು ಕ್ವೆಟ್ಟಾದ ಪೊಲೀಸ್‌ ತರಬೇತಿ ಕೇಂದ್ರದ ಮೇಲೆ ಉಗ್ರರು ನಡೆಸಿದ ಬಾಂಬ್‌ ಮತ್ತು ದಾಳಿಗೆ 64 ಮಂದಿ ಬಲಿಯಾಗಿದ್ದರು.