ಚಿನ್ನದ ಗಣಿ ಕುಸಿದು 30 ಮಂದಿ ಸಾವು

ಕಾಬೂಲ್‌: ಆಫಘಾನಿಸ್ತಾನದ ಈಶಾನ್ಯ ಬದಕ್ಷಾನ್‌ ಪ್ರಾಂತ್ಯದ ಕೊಹಿಸ್ತಾನ್‌ ಜಿಲ್ಲೆಯಲ್ಲಿ ಭಾನುವಾರ ಚಿನ್ನದ ಗಣಿ ಕುಸಿದು ಕನಿಷ್ಠ 30 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ಘಟನೆಯಲ್ಲಿ ಏಳು ಮಂದಿ ಗಾಯಗೊಂಡಿದ್ದಾರೆ.

''ಚಿನ್ನದ ಶೋಧನೆಯಲ್ಲಿ ತೊಡಗಿದ್ದ ಗ್ರಾಮಸ್ಥರು ನದಿಯ ಸಮೀಪ 200 ಅಡಿ ಆಳದ ಸುರಂಗ ಕೊರೆದಿದ್ದರು. ಗಣಿಗಾರಿಕೆಯಲ್ಲಿ ತೊಡಗಿದ್ದ ಗ್ರಾಮಸ್ಥರು ವೃತ್ತಿಪರ ಗಣಿ ಕಾರ್ಮಿಕರಲ್ಲ. ಅವರು ಗಣಿಯ ಒಳಗೆ ಇದ್ದಾಗ ಸುರಂಗದ ಗೋಡೆ ಕುಸಿದಿದೆ. ಕುಸಿತಕ್ಕೆ ಕಾರಣ ತಿಳಿದುಬಂದಿಲ್ಲ. ಸರಕಾರದ ಅಧಿಕೃತ ಪರವಾನಗಿ ಇಲ್ಲದೇ ಗ್ರಾಮಸ್ಥರು ಹತ್ತಾರು ವರ್ಷಗಳಿಂದ ಗಣಿಗಾರಿಕೆಯಲ್ಲಿ ತೊಡಗಿದ್ದಾರೆ. ಘಟನಾ ಸ್ಥಳಕ್ಕೆ ತುರ್ತು ರಕ್ಷಣಾ ಪಡೆಯ ತಂಡವನ್ನು ಕಳುಹಿಸಲಾಗಿದೆ. ಗ್ರಾಮಸ್ಥರು ಈಗಾಗಲೇ ಮೃತದೇಹಗಳನ್ನು ಹೊರಗೆ ತೆಗೆಯುವ ಕಾರ್ಯದಲ್ಲಿ ನಿರತರಾಗಿದ್ದಾರೆ ಎಂದು ಕೊಹಿಸ್ತಾನ್‌ ಜಿಲ್ಲಾಧಿಕಾರಿ ಮೊಹಮ್ಮದ್‌ ರುಸ್ತಮ್‌ ರಘಿ ತಿಳಿಸಿದ್ದಾರೆ.