ಅಮೆರಿಕದ 2 ನಗರಗಳಲ್ಲಿ ಸಾರ್ವಜನಿಕರ ಮೇಲಿನ ದಾಳಿಗೆ 30 ಬಲಿ

ವಾಷಿಂಗ್ಟನ್‌: ಅಮೆರಿಕದ ಎರಡು ನಗರಗಳಲ್ಲಿ ಸಾರ್ವಜನಿಕರನ್ನು ಗುರಿಯಾಗಿಸಿ ಭಾನುವಾರ ನಡೆಸಲಾದ ಗುಂಡಿನ ದಾಳಿಗೆ 30 ಜನರು ಬಲಿಯಾಗಿದ್ದಾರೆ.
ಒರೆಗಾಂವ್‌ ಜಿಲ್ಲೆಯ ಡೇಟನ್‌ನಲ್ಲಿ 10 ಮಂದಿ ಹಾಗೂ ಟೆಕ್ಸಾಸ್‌ ಗಡಿಯ ಸಮೀಪದ ಎಲ್‌ ಪಾಸೊ ನಗರದಲ್ಲಿ 20 ಮಂದಿ ಮೃತಪಟ್ಟಿದ್ದು, ದೇಶ ಬೆಚ್ಚಿ ಬಿದ್ದಿದೆ. ಎರಡೂ ನಗರಗಳಲ್ಲಿ ನಡೆದ ದುರ್ಘಟನೆಗಳಲ್ಲಿ ಸಾಮ್ಯತೆ ಇದ್ದು, ಶಸ್ತ್ರಸಜ್ಜಿತ ವ್ಯಕ್ತಿಗಳು ಏಕಾಂಗಿಯಾಗಿ ಜನರ ಮೇಲೆ ಏಕಾಏಕಿ ಗುಂಡು ಹಾರಿಸಿದ್ದಾರೆ. ನೈಟ್‌ಕ್ಲಬ್‌ಗಳು, ಬಾರ್‌ಗಳು, ಶಾಪಿಂಗ್‌ಗೆ ಪ್ರಸಿದ್ಧವಾದ ಡೇಟನ್‌ನಲ್ಲಿ ಗುಂಡು ಹಾರಿಸಿದ ವ್ಯಕ್ತಿ ಸೇರಿದಂತೆ 10 ಮಂದಿ ಮೃತರಾಗಿದ್ದಾರೆ. ಉಳಿದ 16 ಮಂದಿ ಗಾಯಾಳುಗಳಿಗೆ ಚಿಕಿತ್ಸೆ ಕೊಡಿಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಈ ಘಟನೆಗೂ ಕೆಲವೇ ಗಂಟೆಗಳ ಮುನ್ನ ಎಲ್‌ ಪಾಸೊ ನಗರದ ವಾಲ್‌ಮಾರ್ಟ್‌ ಮಳಿಗೆಯಲ್ಲಿ ನೆರೆದಿದ್ದ ಜನರ ಮೇಲೆ 21 ವರ್ಷದ ಯುವಕನೊಬ್ಬ ಗುಂಡಿನ ಮಳೆಗರೆದಿದ್ದಾನೆ. ಪರಿಣಾಮ 20 ಮಂದಿ ಮೃತಪಟ್ಟು, 26 ಜನರು ಗಾಯಗೊಂಡಿದ್ದಾರೆ.
ಸಾರ್ವಜನಿಕರ ಮೇಲೆ ವ್ಯಕ್ತಿಯೊಬ್ಬನಿಂದ ಗುಂಡಿನ ದಾಳಿಯಂಥ ಪ್ರಕರಣಗಳಲ್ಲಿ ಈ ವರ್ಷ ಅಮೆರಿಕದಲ್ಲಿ ಒಟ್ಟು 522 ಮಂದಿ ಮೃತಪಟ್ಟಿದ್ದಾರೆ. ದಾಳಿಯಲ್ಲಿ 2040 ಮಂದಿ ಗಾಯಗೊಂಡಿದ್ದಾರೆ. ಇದರಿಂದಾಗಿ ಗನ್‌ ಪರವಾನಗಿ ನಿಯಮಗಳನ್ನು ಮತ್ತಷ್ಟು ಬಿಗಿಗೊಳಿಸುವಂತೆ ಅಮೆರಿಕದ ಪ್ರಮುಖ ರಾಜಕೀಯ ನಾಯಕರು ಟ್ರಂಪ್‌ ಸರಕಾರಕ್ಕೆ ಒತ್ತಾಯಿಸಿದ್ದಾರೆ.
ಹೇಡಿಗಳ ಕೃತ್ಯ ಎಂದು ಟ್ರಂಪ್‌ ಕಿಡಿ
''ಎಲ್‌ ಪಾಸೊ, ಟೆಕ್ಸಾಸ್‌ನಲ್ಲಿ ಸಾರ್ವಜನಿಕರ ಮೇಲಿನ ದಾಳಿ ದಾರುಣ ಘಟನೆ ಮಾತ್ರವಲ್ಲ. ಇದು ಹೇಡಿಗಳು ಮಾತ್ರ ಮಾಡುವ ಕೃತ್ಯ. ಈ ದಾಳಿಯನ್ನು ಖಂಡಿಸಿ ನಾನು ಎಲ್ಲ ಅಮೆರಿಕ ಪ್ರಜೆಗಳ ರಕ್ಷಣೆಗೆ ಬದ್ಧನಾಗಿ ನಿಲ್ಲುತ್ತೇನೆ. ಅಮಾಯಕರ ಹತ್ಯೆಗೈದವರ ಸಮರ್ಥನೆಗೆ ಯಾವುದೇ ಕಾರಣಗಳಿದ್ದರೂ ನಾನು ಒಪ್ಪುವುದಿಲ್ಲ,'' ಎಂದು ದಾಳಿ ಬಗ್ಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಟ್ವಿಟರ್‌ನಲ್ಲಿ ಪ್ರತಿಕ್ರಿಯಿಸಿದ್ದಾರೆ.