ತಜಿಕಿಸ್ತಾನ ಕಾರಾಗೃಹದಲ್ಲಿ ಹೊಡೆದಾಟ, 24 ಐಸಿಸ್‌ ಉಗ್ರರ ಸಾವು

ದುಶಾಂಬೆ : ತಜಿಕಿಸ್ತಾನದ ಪ್ರಮುಖ ಕಾರಾಗೃಹವೊಂದರಲ್ಲಿ ಕೈದಿಗಳ ನಡುವೆ ಜರುಗಿದ ಹೊಡೆದಾಟದಲ್ಲಿ 24 ಐಸಿಸ್‌ ಉಗ್ರರು ಸೇರಿದಂತೆ 32 ಮಂದಿ ಮೃತಪಟ್ಟಿದ್ದಾರೆ. ಭಾನುವಾರ ಸಂಜೆ ನಡೆದ ಹೊಡೆದಾಟದಲ್ಲಿ ಐಸಿಸ್‌ ಉಗ್ರರು ತಮ್ಮ ಐವರು ಸಹಕೈದಿಗಳು ಮತ್ತು ಮೂವರು ಜೈಲಧಿಕಾರಿಗಳನ್ನು ಹತ್ಯೆಗೈದಿದ್ದಾರೆ ಎಂದು ವರದಿಯಾಗಿದೆ. ಸುಮಾರು 1500 ಕೈದಿಗಳಿರುವ ವಾಖ್‌ದಾತ್‌ನಲ್ಲಿ ಕಾರಾಗೃದಲ್ಲಿ ಈ ಘಟನೆ ಜರುಗಿದೆ. ಜೈಲಿನ ಭದ್ರತಾ ಸಿಬ್ಬಂದಿಗೆ ಚಾಕುವಿನಿಂದ ಇರಿದು, ಉಳಿದ ಕೈದಿಗಳನ್ನು ಕೂಡ ಪ್ರಚೋದಿಸಿ ಜೈಲಿನಿಂದ ಪರಾರಿಯಾಗುವ ಸಂಚನ್ನು ಉಗ್ರರು ಹೆಣೆದಿದ್ದರು. ಆದರೆ ಪರಾರಿ ಯತ್ನದ ನಡುವೆ ಉಗ್ರರು ಸಹಕೈದಿಗಳನ್ನು ಒತ್ತೆಯಾಳುಗಳಂತೆ ಹಿಡಿದಿಟ್ಟಾಗ ಉಳಿದ ಕೈದಿಗಳು ಕೋಪಗೊಂಡು ಉಗ್ರರ ಮೇಲೆ ಎರಗಿದ್ದಾರೆ. ಉಗ್ರರು ಜೈಲಧಿಕಾರಿಗಳನ್ನು ಹತ್ಯೆಗೈದ ಕೂಡಲೇ ಭದ್ರತಾ ಸಿಬ್ಬಂದಿ ಪ್ರತಿದಾಳಿಯಾಗಿ ಗುಂಡು ಹಾರಿಸಿದರು. 24 ಉಗ್ರರು ಮೃತಪಟ್ಟು, 25 ಕೈದಿಗಳನ್ನು ಬಂಧಿಸಿದ್ದೇವೆ ಎಂದು ತಜಕಿಸ್ತಾನ ಗೃಹ ಸಚಿವಾಲಯ ಪ್ರಕಟಣೆ ತಿಳಿಸಿದೆ.

2018ರ ನವೆಂಬರ್‌ನಲ್ಲಿ ಖುಜಾಂಡ್‌ನಲ್ಲಿ ಐಸಿಸ್‌ ನಡೆಸಿದ ದಂಗೆಯಲ್ಲಿ 26 ಮಂದಿ ಮೃತಪಟ್ಟಿದ್ದರು.