ಮಲೇಷ್ಯಾ ವಿಮಾನ ಪತನಗೊಳಿಸಿದವರ ವಿರುದ್ಧ ಹತ್ಯೆ ಆರೋಪ

ಮಾಸ್ಕೊ: ಮಲೇಷ್ಯಾ ಏರ್‌ಲೈನ್ಸ್‌ ವಿಮಾನ ಎಂಎಚ್‌-17ರ ಪತನಕ್ಕೆ ಕಾರಣರಾದ ಶಂಕೆ ಮೇರೆಗೆ ರಷ್ಯಾದ ಮೂವರು ಹಾಗೂ ಉಕ್ರೇನ್‌ನ ಒಬ್ಬ ಪ್ರಜೆ ವಿರುದ್ಧ ಹತ್ಯೆ ಹಾಗೂ ವಿಮಾನ ಪತನಗೊಳಿಸಿದ ಆರೋಪ ಹೊರಿಸಿ ಬಂಧನ ವಾರೆಂಟ್‌ ಹೊರಡಿಸಲು ತನಿಖಾಧಿಕಾರಿಗಳು ನಿರ್ಧರಿಸಿದ್ದಾರೆ.

ರಷ್ಯಾ ಮಿಲಿಟರಿ ಮತ್ತು ಗುಪ್ತಚರ ವಿಭಾಗದೊಂದಿಗೆ ನಿಕಟ ಸಂಪರ್ಕ ಹೊಂದಿದ್ದಾರೆ ಎನ್ನಲಾದ ಇಗೊರ್‌ ಗಿರ್ಕಿನ್‌, ಸೆರ್ಗೆ ದುಬೆನ್‌ಸ್ಕಿ ಮತ್ತು ಒಲೆಗ್‌ ಪುಲಾಟವ್‌ ಹಾಗೂ ಉ್ರಕೇನ್‌ ಪ್ರಜೆ ಲಿಯೊನಿಡ್‌ ಖಾರ್ಶೆಂಕೊ ವಿರುದ್ಧ ಶೀಘ್ರವೇ ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ಮಟ್ಟದ ಬಂಧನ ವಾರೆಂಟ್‌ ಹೊರಬೀಳಲಿದೆ ಎಂದು ಜಂಟಿ ತನಿಖಾ ತಂಡದ (ಜೆಐಟಿ) ಅಧಿಕಾರಿಗಳು ಹೇಳಿದ್ದಾರೆ.

ಯಾವುದೇ ಶಂಕಿತ ಆರೋಪಿಯ ಗಡಿಪಾರಿಗೆ ಸರಕಾರಕ್ಕೆ ಮನವಿ ಸಲ್ಲಿಸಲ್ಲ. ರಷ್ಯಾ, ಉಕ್ರೇನ್‌ ಸಂವಿಧಾನದಲ್ಲಿ ಇದಕ್ಕೆ ಅವಕಾಶ ಕೂಡ ಇಲ್ಲ. ಹಾಗಾಗಿ ಆಯಾ ದೇಶದ ಪ್ರಜೆಯ ವಿಚಾರಣೆ ವೇಳೆ ಅಲ್ಲಿನ ಸರಕಾರ ಹಾಗೂ ಪೊಲೀಸರಿಗೆ ಸಹಕರಿಸುವಂತೆ ಸೂಚಿಸಲಾಗುವುದು ಎಂದು ಜೆಐಟಿ ಹೇಳಿದೆ.

2014ರ ಜುಲೈನಲ್ಲಿ ಆ್ಯಮ್‌ಸ್ಟರ್‌ಡ್ಯಾಮ್‌ನಿಂದ ಮಲೇಷ್ಯಾ ರಾಜಧಾನಿ ಕೌಲಾಲಂಪುರಕ್ಕೆ ಹಾರುತ್ತಿದ್ದ ವೇಳೆ ರಷ್ಯಾ ಪರ ಹೋರಾಟಗಾರರು ಎಂಎಚ್‌-17 ವಿರುದ್ಧ ಕ್ಷಿಪಣಿ ಹಾರಿಸಿ ಆಕಾಶದಲ್ಲಿಯೇ ಹೊಡೆದುರಳಿಸಿದ್ದರು. ವಿಮಾನದಲ್ಲಿದ್ದ 17 ರಾಷ್ಟ್ರಗಳ ಸುಮಾರು 298 ಪ್ರಯಾಣಿಕರು ಮೃತರಾಗಿದ್ದರು.