ರಷ್ಯಾ ಕಡಲಲ್ಲಿ ಹಡಗು ದುರಂತಕ್ಕೆ 8 ಭಾರತೀಯರು ಬಲಿ

ಮಾಸ್ಕೊ: ಭಾರತ, ಟರ್ಕಿ ಮತ್ತು ಲಿಬಿಯಾ ದೇಶಗಳ ಸಿಬ್ಬಂದಿ ಒಳಗೊಂಡ ಎರಡು ಹಡಗುಗಳು ರಷ್ಯಾದ ಜಲ ಪ್ರದೇಶದಲ್ಲಿ ಬೆಂಕಿಗಾಹುತಿಯಾಗಿದೆ. ಘಟನೆಯಲ್ಲಿ 14 ಮಂದಿ ನಾವಿಕರು ಮೃತಪಟ್ಟಿದ್ದು, ಇವರಲ್ಲಿ 8 ಭಾರತೀಯರೂ ಸೇರಿದ್ದಾರೆ.

ತಾಂಜಾನಿಯಾ ದೇಶದ ಎರಡು ಹಡಗುಗಳು ರಷ್ಯಾದಿಂದ ಕ್ರಿಮಿಯಾವನ್ನು ಬೇರ್ಪಡಿಸುವ ಕೆರ್ಚ್‌ ಜಲಸಂಧಿಯಲ್ಲಿ ಸೋಮವಾರ ಸಾಗುತ್ತಿದ್ದವು. ಒಂದು ಹಡಗಿನಲ್ಲಿ ನೈಸರ್ಗಿಕ ಗ್ಯಾಸ್‌ ಮತ್ತು ಇನ್ನೊಂದು ಹಡಗಿನಲ್ಲಿ ಟ್ಯಾಂಕರ್‌ ಇತ್ತು. ಒಂದು ಹಡಗಿನಿಂದ ಮತ್ತೊಂದು ಹಡಗಿಗೆ ತೈಲವನ್ನು ವರ್ಗಾಯಿಸುತ್ತಿದ್ದ ವೇಳೆ ಬೆಂಕಿ ಹೊತ್ತಿಕೊಂಡದೆ.

'ಕ್ಯಾಂಡಿ' ಹಡಗಿನಲ್ಲಿ ಒಟ್ಟು 17 ಮಂದಿ ಸಿಬ್ಬಂದಿ ಇದ್ದರು. ಈ ಪೈಕಿ ಎಂಟು ಮಂದಿ ಭಾರತೀಯರು ಮತ್ತು ಒಂಬತ್ತು ಮಂದಿ ಟರ್ಕಿಶ್‌ ಪ್ರಜೆಗಳು. 'ಮ್ಯಾಸ್ಟ್ರೋ' ಹಡಗಿನಲ್ಲಿ ಒಟ್ಟು 15 ಮಂದಿ ಸಿಬ್ಬಂದಿ ಇದ್ದರು. ಈ ಪೈಕಿ ಏಳು ಮಂದಿ ಭಾರತೀಯರು, ಏಳು ಟರ್ಕಿ ನಾಗರಿಕರು ಹಾಗೂ ಒಬ್ಬ ಲಿಬಿಯನ್‌ ತರಬೇತಿ ಸಿಬ್ಬಂದಿ ಇದ್ದರು. ದುರಂತದಲ್ಲಿ 14 ಮಂದಿ ಬಲಿಯಾಗಿದ್ದಾರೆ. ಒಟ್ಟು 12 ಮಂದಿಯನ್ನು ರಕ್ಷಿಸಲಾಗಿದೆ. ಇತರ ಆರು ಮಂದಿ ಕಾಣೆಯಾಗಿದ್ದು, ಅವರಿಗಾಗಿ ಶೋಧ ಕಾರ್ಯ ಮುಂದುವರಿದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

''ಅವಘಡದಲ್ಲಿ ಮೃತಪಟ್ಟ ಭಾರತೀಯರ ಬಗ್ಗೆ ಹೆಚ್ಚಿನ ಮಾಹಿತಿ ಲಭ್ಯವಿಲ್ಲ. ಸಂಪೂರ್ಣ ಮಾಹಿತಿಗಾಗಿ ರಷ್ಯಾ ಸರಕಾರದೊಂದಿಗೆ ಮಾಸ್ಕೊದಲ್ಲಿರುವ ಭಾರತೀಯ ರಾಯಭಾರ ಕಚೇರಿ ನಿರಂತರ ಸಂಪರ್ಕದಲ್ಲಿದೆ. ಅವರಿಗೆ ಅಗತ್ಯವಿರುವ ಸಕಲ ನೆರವು ಒದಗಿಸಲಾಗುವುದು,'' ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಅಧಿಕಾರಿಗಳು ತಿಳಿಸಿದ್ದಾರೆ.