ಅಮೆರಿಕ ಪೌರತ್ವ ತ್ಯಜಿಸುವವರ ಸಂಖ್ಯೆಯಲ್ಲಿ ದಿಢೀರ್‌ ಹೆಚ್ಚಳ!

ನ್ಯೂಯಾರ್ಕ್‌: ವಿಶ್ವದ ಅತ್ಯಂತ ಬೇಡಿಕೆಯಿರುವ ಅಮೆರಿಕದ ಪೌರತ್ವವನ್ನು ತ್ಯಜಿಸಲು ಹಲವಾರು ಜನ ಮುಂದಾಗಿರುವುದು ವಿರೋಧಾಭಾಸಕ್ಕೆ ಕಾರಣವಾಗಿದೆ. ಉತ್ತಮ ಉದ್ದೇಶಕ್ಕಾಗಿ ಅಮೆರಿಕದ ಪೌರತ್ವ ತೊರೆಯಲು ನಾಮುಂದು ತಾಮುಂದು ಎಂಬಂತೆ ಕ್ಯೂ ನಿಲ್ಲುತ್ತಿದ್ದಾರೆ.

2020ರ ಮೊದಲ ಆರು ತಿಂಗಳಲ್ಲಿ ಅಮೆರಿಕದ ಪೌರತ್ವ ತ್ಯಜಿಸುವವರ ಸಂಖ್ಯೆಯಲ್ಲಿ ದಾಖಲೆಯ ಏರಿಕೆ ಕಂಡಿದೆ. ಈ ಕುರಿತು ಅಮೆರಿಕ ಸರಕಾರ ಹೊಸದಾಗಿ ಪ್ರಕಟಿಸಿರುವ ಅಂಕಿ ಅಂಶಗಳನ್ನು ಆಧರಿಸಿ ಸಿಎನ್‌ಎನ್‌ ವರದಿ ಮಾಡಿದೆ.

5,800 ಕ್ಕೂ ಹೆಚ್ಚು ಜನರು ತಮ್ಮ ಪೌರತ್ವವನ್ನು ತ್ಯಜಿಸಲು ಮುಂದಾಗಿದ್ದು, ಇವರೆಲ್ಲರೂ ಪರಿಶೀಲನೆ ಅವಧಿಯಲ್ಲಿ ಇದ್ದಾರೆ ಎಂದು ಬಾಂಬ್ರಿಡ್ಜ್ ಅಕೌಂಟೆಂಟ್ಸ್ ಸಂಗ್ರಹಿಸಿದ ದತ್ತಾಂಶಗಳಿಂದ ತಿಳಿದುಬಂದಿದೆ. 2019 ರಲ್ಲಿ ಈ ಸಂಖ್ಯೆ 2,072ರಷ್ಟಿತ್ತು.

ಬಂತು ಕೊರೊನಾ ಲಸಿಕೆ: ಸ್ಪುಟ್ನಿಕ್‌ V ಎಂದು ಹೆಸರಿಟ್ಟ ರಷ್ಯಾ

ಬಾಂಬ್ರಿಡ್ಜ್ ಅಕೌಂಟೆಂಟ್ಸ್ ಪ್ರತಿ 3 ತಿಂಗಳಿಗೊಮ್ಮೆ ಅಮೆರಿಕದ ಪೌರತ್ವವನ್ನು ತ್ಯಜಿಸುವವರ ಕುರಿತು ಅಂಕಿ ಅಂಶಗಳನ್ನು ಬಿಡುಗಡೆಗೊಳಿಸುತ್ತದೆ.

ಇದೀಗ ಅಮೆರಿಕದ ಪೌರತ್ವ ತ್ಯಜಿಸುವವರಲ್ಲಿ ದಿಢೀರ್‌ ಏರಿಕೆಗೆ ಡೊನಾಲ್ಡ್‌ ಟ್ರಂಪ್‌ ಅವರ ವೀಸಾ ನೀತಿಗಳೂ ಕಾರಣವಾಗಿ ಎಂಬ ಚರ್ಚೆಗಳೂ ಆರಂಭವಾಗಿವೆ. ಜತೆಗೆ ಕೊರೊನಾ ವೈರಸ್‌ ಸೋಂಕು ಕೂಡ ಪ್ರಮುಖ ಕಾರಣ ವಾಗಿದೆ ಎಂದು ಸ್ವತಃ ಬಾಂಬ್ರಿಡ್ಜ್‌ ಅಭಿಪ್ರಾಯಪಟ್ಟಿದೆ.

ರಷ್ಯಾ ಅಧ್ಯಕ್ಷ ಪುಟಿನ್‌ ಮಗಳಿಗೆ ಜಗತ್ತಿನ ಮೊದಲ ಯಶಸ್ವಿ ಕೊರೊನಾ ಲಸಿಕೆ ಪ್ರಯೋಗ

ಇನ್ನು ಕೆಲವರು ನವೆಂಬರ್‌ ಬರುವುದನ್ನೇ ಕಾಯುತ್ತಿದ್ದಾರೆ. ಏಕೆಂದರೆ ನವೆಂಬರ್‌ನಲ್ಲಿ ಅಮೆರಿಕದ ಅಧ್ಯಕ್ಷೀಯ ಚುನಾವಣೆ ನಡೆಯಲಿದೆ. ಈ ಚುನಾವಣೆಯಲ್ಲಿ ಡೊನಾಲ್ಡ್‌ ಟ್ರಂಪ್‌ ಮತ್ತೆ ಆಯ್ಕೆಯಾದರೆ, ಅಮೆರಿಕವನ್ನು ತ್ಯಜಿಸುವ ಬೃಹತ್‌ ಗುಂಪೇ ಸಿದ್ದವಾಗಲಿದೆ.

ಜತೆಗೆ ಅಮೆರಿಕದಲ್ಲಿರುವ ವಿದೇಶಿ ಪ್ರಜೆಗಳ ಮೇಲಿರುವ ತೆರಿಗೆ ನೀತಿ ಕೂಡ ಅಮೆರಿಕ ಪೌರತ್ವ ತ್ಯಜಿಸಲು ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ.