ಕುಡಿದ ಅಮಲಿನಲ್ಲಿ ಹೋಟೆಲ್‌ ಖರೀದಿಸಿದ ದಂಪತಿ!

ಕೊಲಂಬೊ: ಹನಿಮೂನಿಗೆ ಬಂದಿದ್ದ ಇಂಗ್ಲೆಂಡಿನ ದಂಪತಿ, ಕುಡಿದ ಮತ್ತಿನಲ್ಲಿ ಮೋಜಿನ ಬದಲು ಚೌಕಾಸಿ ವ್ಯಾಪಾರ ನಡೆಸಿ ಹೋಟೆಲ್‌ ಖರೀದಿಸಿದ್ದ ಹಳೆ ಪ್ರಸಂಗವೊಂದು ವರದಿಯಾಗಿದೆ.

ಇಂಗ್ಲೆಂಡಿನ ಗಿನಾ ಲಿಯಾಸ್ಸ್‌-ಮಾರ್ಕ್‌ ಲೀ ಜೋಡಿ 2017ರಲ್ಲಿ ಮಧುಚಂದ್ರಕ್ಕಾಗಿ ಮೂರು ವಾರಗಳ ಮಟ್ಟಿಗೆ ಶ್ರೀಲಂಕಾಗೆ ಬಂದಿದ್ದರು. ಈ ವೇಳೆ ಅಲ್ಲಿನ ಹೋಟೆಲೊಂದರಲ್ಲಿ ತಂಗಿದ್ದು, ಮೊದಲ ರಾತ್ರಿ ತುಸು ಹೆಚ್ಚೇ ಮದ್ಯ ಸೇವಿಸಿದ್ದರು. ಈ ವೇಳೆ ಆ ಹೋಟೆಲ್‌ನ ಭೋಗ್ಯದ ಅವಧಿ ಮರುದಿನವೇ ಮುಗಿಯಲಿದೆ ಎಂಬುದು ಅವರ ಗಮನಕ್ಕೆ ಬಂದಿತು. ಮರು ನವೀಕರಣಕ್ಕೆ ಹೋಟೆಲ್‌ ನಿರ್ವಹಕರ ಬಳಿ ಹಣವಿರಲಿಲ್ಲ. ಹಾಗಾಗಿ ತಕ್ಷಣ ದಂಪತಿ 29 ಲಕ್ಷ ರೂ. ನೀಡಿ ಮೂರು ವರ್ಷಗಳ ಅವಧಿಗೆ ಭೂಗ್ಯ ನವೀಕರಿಸಿಕೊಳ್ಳಲು ತೀರ್ಮಾನಿಸಿದರು.

ಆದರೆ ಮರು ದಿನ ಏನೋ ಅರಿಯದಂತಿದ್ದ ದಂಪತಿ ಕೊನೆಗೆ ನಡೆದ ವಿಷಯ ತಿಳಿದು, ಮೊದಲ ವರ್ಷ 14.5 ಲಕ್ಷ ರೂ. ನೀಡಿದ್ದರು ಹಾಗೂ 2019ರ ಮಾರ್ಚ್‌ನಲ್ಲಿ ಉಳಿದ ಹಣ ನೀಡಿ, ಜುಲೈ 1ರಿಂದ ಆ ಹೋಟೆಲ್‌ಗೆ ಅಧಿಕೃತವಾಗಿ ಮಾಲೀಕರಾಗಿದ್ದಾರೆ. ಸದ್ಯ ಅವರು ಹೋಟೆಲ್‌ಗೆ 'ಲಕ್ಕಿ ಬೀಚ್‌ ತಂಗಲ್ಲೇ' ಎಂದು ಮರು ನಾಮಕರಣ ಮಾಡಿದ್ದು, ವ್ಯಾಪಾರ ಚನ್ನಾಗಿ ನಡೆಯುತ್ತಿದೆ. ಕುಡಿದ ಅಮಲಿನಲ್ಲಿ ದಂಪತಿ ತೆಗೆದುಕೊಂಡ ನಿರ್ಧಾರ ಅವರನ್ನು ಹೋಟೆಲ್‌ ಮಾಲೀಕರನ್ನಾಗಿ ಮಾಡಿದೆ.