ಇಸ್ರೇಲ್‌ನಲ್ಲಿಸರಕಾರ ರಚಿಸಲು ಪ್ರಧಾನಿ ನೆತನ್ಯಾಹುಗೆ ಆಹ್ವಾನ

ಜೆರುಸಲೇಂ: ಇಸ್ರೇಲ್‌ ಚುನಾವಣೆಯಲ್ಲಿಯಾವ ಪಕ್ಷಕ್ಕೂ ಸಂಪೂರ್ಣ ಬಹುಮತ ಸಿಗದೆ ಬಿಕ್ಕಟ್ಟು ಸೃಷ್ಟಿಯಾಗಿರುವ ನಡುವೆಯೇ, ಹೊಸ ಸರಕಾರ ರಚನೆಗೆ ಹಾಲಿ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು ಅವರಿಗೆ ಅಧ್ಯಕ್ಷರು ಆಹ್ವಾನ ನೀಡಿದ್ದಾರೆ. ಅಧಿಕಾರದಲ್ಲಿಉಳಿಯುವುದಕ್ಕೆ ಮಿತ್ರಕೂಟವನ್ನು ರಚಿಸುವ ಸವಾಲು ನೆತನ್ಯಾಹು ಅವರಿಗಿದೆ.ನೆತನ್ಯಾಹು ಮತ್ತು ಅವರ ಪ್ರತಿಸ್ಪರ್ಧಿ ಬೆನ್ನಿ ಗ್ರಾಂಟ್ಸ್‌ ಅವರು ಸರಕಾರ ರಚನೆಗೆ ಅಗತ್ಯವಿರುವ ಬಹುಮತವನ್ನು ಹೊಂದಿಸಲು ವಿಫಲವಾದ ಹಿನ್ನೆಲೆಯಲ್ಲಿಅಧ್ಯಕ್ಷ ರೂವೆನ್‌ ರಿವ್ಲಿನ್‌ ಅವರು ನೆತನ್ಯಾಹು ಅವರಿಗೆ ಸರಕಾರ ರಚನೆಗೆ ಆಹ್ವಾನ ನೀಡಿದ್ದಾರೆ. ಇಸ್ರೇಲ್‌ ಸಂಸತ್ತಿನ 120 ಸ್ಥಾನಗಳಿಗಾಗಿ ನಡೆದ ಚುನಾವಣೆಯಲ್ಲಿ ಬೆನ್ನಿ ಗ್ರಾಂಟ್ಸ್‌ ಅವರ ಬ್ಲೂಎಂಡ್‌ ವೈಟ್‌ ಪಕ್ಷ 33 ಮತ್ತು ನೆತನ್ಯಾಹು ಅವರ ಬಲಪಂಥೀಯ ಲಿಕುಡ್‌ ಪಾರ್ಟಿ 32 ಸ್ಥಾನ ಗೆದ್ದಿತ್ತು. ಹಲವು ಪಕ್ಷಗಳು ಉಳಿದ ಸ್ಥಾನ ಹಂಚಿಕೊಂಡಿದ್ದವು. ಪ್ರಧಾನಿ ಹುದ್ದೆಯ ಸ್ಪರ್ಧೆಯಲ್ಲಿ ನೆತನ್ಯಾಹು ಅವರಿಗೆ 55 ಮಂದಿ ಮತ್ತು ಗ್ರಾಂಟ್ಸ್‌ ಅವರಿಗೆ 54 ಮಂದಿ ಬೆಂಬಲ ನೀಡಿದ್ದರು.