ಸಾಗರದಲ್ಲಿ ಇಳಿದ ವಿಮಾನ, ಈಜಿ ದಡ ಸೇರಿದ ಪ್ರಯಾಣಿಕರು

ಮಜುರೊ (ಮಾರ್ಷಲ್‌ ದ್ವೀಪ): 47 ಜನರಿದ್ದ ವಿಮಾನವೊಂದು ದಕ್ಷಿಣ ಪೆಸಿಫಿಕ್‌ ಸಾಗರದ ದ್ವೀಪ ರಾಷ್ಟ್ರವಾದ ಮೈಕ್ರೊನೇಷ್ಯಾದ ಛುಕ್‌ ಎಂಬಲ್ಲಿ ರನ್‌ವೇನಿಂದ ಹೊರನುಗ್ಗಿ ಸಮುದ್ರಕ್ಕೆ ಬಿದ್ದ ಘಟನೆ ಶುಕ್ರವಾರ ನಡೆದಿದೆ.

ವಿಮಾನದಲ್ಲಿದ್ದ ಎಲ್ಲಾ ಪ್ರಯಾಣಿಕರು ಸುರಕ್ಷಿತವಾಗಿದ್ದು, ಹಲವರು ಈಜಿ ದಡ ಸೇರಿದ್ದಾರೆ. ಸಣ್ಣ ಬೋಟುಗಳ ಸಹಾಯದಿಂದ ಇತರರನ್ನು ರಕ್ಷಿಸಲಾಗಿದೆ.

ಅಪಘಾತಕ್ಕೀಡಾದ ಬೋಯಿಂಗ್‌ 737 ವಿಮಾನ ಪಪುವಾ ನ್ಯೂಗಿನಿಯ ರಾಷ್ಟ್ರೀಯ ವಿಮಾನಯಾನ ಸಂಸ್ಥೆಯಾದ 'ಏರ್‌ ನ್ಯೂಗಿನಿ'ಗೆ ಸೇರಿದ್ದಾಗಿದೆ. ವಿಮಾನದಲ್ಲಿ 36 ಪ್ರಯಾಣಿಕರು ಹಾಗೂ 11 ಮಂದಿ ಸಿಬ್ಬಂದಿಯಿದ್ದರು. ವೆನೋ ವಿಮಾನ ನಿಲ್ದಾಣದಲ್ಲಿ ಲ್ಯಾಂಡಿಂಗ್‌ ವೇಳೆ ನಿಯಂತ್ರಣ ಸಿಗದೆ ವಿಮಾನ ರನ್‌ವೇ ದಾಟಿ ಆಚೆ ಚಲಿಸಿದೆ.ಘಟನೆಗೆ ಕಾರಣವೇನೆಂದು ತನಿಖೆ ನಡೆಸುವುದಾಗಿ ಸಂಸ್ಥೆ ಹೇಳಿದೆ. ಭಾರಿ ಮಳೆಯಿಂದಾಗಿ ರನ್‌ವೇ ಅಂದಾಜಿಸುವಲ್ಲಿ ಪೈಲಟ್‌ಗಳು ವಿಫಲವಾಗಿದ್ದೇ ದುರ್ಘಟನೆಗೆ ಕಾರಣ ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ.

ವಿಮಾನ ನೀರಿನೊಳಗೆ ಅರ್ಧ ಮುಳುಗುವವರೆಗೂ ಅವಘಡ ಸಂಭವಿಸಿರುವುದು ಗೊತ್ತೇ ಆಗಿರಲಿಲ್ಲ ಎಂದು ಕೆಲವು ಪ್ರಯಾಣಿಕರು ಹೇಳಿದ್ದಾರೆ.