ಥಾಯ್ ಗುಹೆಯಲ್ಲಿ ಸಿಲುಕಿದ್ದ ಎಲ್ಲ ಬಾಲಕರು, ಕೋಚ್ ರಕ್ಷಣೆ

ಮೇ ಸಾಯ್, ಥಾಯ್ಲೆಂಡ್: ಸತತ ಮೂರು ದಿನಗಳ ಕಾರ್ಯಾಚರಣೆಯ ಬಳಿಕ ಥಾಯ್ಲೆಂಡ್‌ನ ಗುಹೆಯಲ್ಲಿ ಸಿಲುಕಿದ್ದ ಫುಟ್ಬಾಲ್ ತಂಡದ ಎಲ್ಲ 12 ಬಾಲಕರು ಮತ್ತು ಕೋಚ್‌ನನ್ನು ಸುರಕ್ಷಿತವಾಗಿ ಹೊರತರುವಲ್ಲಿ ಥಾಯ್‌ ನೇವಿ ಸೀಲ್ಸ್ ರಕ್ಷಣಾ ಪಡೆ ಯಶಸ್ವಿಯಾಗಿದೆ.

ಭಾನುವಾರದಿಂದ ಆರಂಭಗೊಂಡಿದ್ದ ಕಾರ್ಯಾಚರಣೆಯಲ್ಲಿ ಮೊದಲ ಹಂತದಲ್ಲಿ ನಾಲ್ವರು ಮತ್ತು ಸೋಮವಾರ ಮತ್ತೆ ನಾಲ್ವರು ಬಾಲಕರನ್ನು ಹೊರಕರೆತರಲಾಗಿತ್ತು.

ಮಂಗಳವಾರ ಮತ್ತೆ ಕಾರ್ಯಾಚರಣೆ ಮುಂದುವರಿಸಿ, ಗುಹೆಯಲ್ಲಿ ಸಿಲುಕಿಕೊಂಡಿದ್ದ ಎಲ್ಲ 12 ಬಾಲಕರು ಮತ್ತು ಫುಟ್ಬಾಲ್ ತಂಡದ ಕೋಚ್‌ನನ್ನು ಹೊರತರಲಾಗಿದೆ. ಥಾಯ್ಲೆಂಡ್‌ ಗುಹೆಯಲ್ಲಿ ಸಿಲುಕಿಕೊಂಡಿದ್ದ 12 ಬಾಲಕರು ಮತ್ತು ಕೋಚ್‌ ರಕ್ಷಣಾ ಕಾರ್ಯಾಚರಣೆ ಅತ್ಯಂತ ಅಪಾಯಕಾರಿ ಮತ್ತು ಸಾಹಸಮಯವಾಗಿದ್ದು, ಜಗತ್ತಿನ ಗಮನ ಸೆಳೆದಿತ್ತು.


ಅಮೆರಿಕ, ಇಂಗ್ಲೆಂಡ್, ಜಪಾನ್ ಸಹಿತ ವಿವಿಧ ರಾಷ್ಟ್ರಗಳ ತಜ್ಞರು, ಮುಳುಗುಗಾರರು ಥಾಯ್ ನೇವಿ ಸೀಲ್ಸ್ ಪಡೆಗೆ ನೆರವು ನೀಡಿದ್ದು, ಬಾಲಕರ ರಕ್ಷಣೆಗೆ ಶ್ರಮಿಸಿದ್ದರು.


ವೈಲ್ಡ್‌ಬೋರ್ ಫುಟ್ಬಾಲ್ ತಂಡದ 12 ಬಾಲಕರು ಕೋಚ್‌ ಜತೆ ಜೂನ್‌ 23ರಂದು ತಾಮ್ ಯೆವಾನ್ ಗುಹೆಗೆ ತೆರಳಿದ್ದ ಸಂದರ್ಭ ಅಲ್ಲಿ ಪ್ರವಾಹ ಪರಿಸ್ಥಿತಿ ಉದ್ಭವಿಸಿ ಸಿಲುಕಿಕೊಂಡಿದ್ದರು. ಗುಹೆಯಲ್ಲಿ ನೀರು ತುಂಬಿದ್ದರಿಂದ ಅವರು ಹೊರಗೆ ಬರಲು ಸಾಧ್ಯವಾಗಿರಲಿಲ್ಲ.

ತೀವ್ರ ಪ್ರತಿಕೂಲ ಪರಿಸ್ಥಿತಿಯಿದ್ದರೂ ಎಲ್ಲ ಬಾಲಕರನ್ನು ರಕ್ಷಿಸಿದ ಥಾಯ್ ನೇವಿ ಸೀಲ್ಸ್ ನೇತೃತ್ವದ ರಕ್ಷಣಾ ಪಡೆಗೆ ವ್ಯಾಪಕ ಪ್ರಶಂಸೆ ವ್ಯಕ್ತವಾಗಿದೆ.