3 ಮಿಲಿಯನ್ ಡಾಲರ್‌ಗೆ 150 ಮಿಲಿಯನ್ ವರ್ಷಗಳಷ್ಟು ಹಳೆಯ ಡೈನೋಸಾರ್ ಅಸ್ಥಪಂಜರ ಹರಾಜು!

ಪ್ಯಾರಿಸ್: ಒಂದು ಕಾಲದಲ್ಲಿ ಈ ಭೂಮಿಯನ್ನು ಆಳುತ್ತಿದ್ದ ಡೈನೋಸಾರ್‌ಗಳೆಂದರೆ ಎಲ್ಲರಿಗೂ ಕುತೂಹಲ. ಮಕ್ಕಳಿಂದ ಹಿಡಿದು ವೃದ್ಧರವರೆಗೂ ಡೈನೋಸಾರ್‌ಗಳ ಪಳಯುಳಿಕೆ ಕಂಡರೆ ಅಚ್ಚರಿಪಡುವುದು ಸಹಜ.

ಲಕ್ಷಾಂತರ ವರ್ಷಗಳ ಹಿಂದೆ ಭೂಮಿ ಮೇಲೆ ಬದುಕಿ ಸರ್ವಾನಾಶಕ್ಕೆ ಗುರಿಯಾಗಿರುವ ಡೈನೋಸಾರ್‌ಗಳು, ಇಂದಿಗೂ ಅಸ್ಥಿಪಂಜರಗಳ ರೂಪದಲ್ಲಿ ನಮ್ಮೊಂದಿಗಿವೆ.

ಈ ಅಸ್ಥಿಪಂಜರಗಳನ್ನು ನೋಡಿದರೆ ಈ ದೈತ್ಯ ಪ್ರಾಣಿಗಳ ಜೀವನಕಾಲವನ್ನು ಊಹಿಸಿಕೊಳ್ಳಬಹುದಾಗಿದೆ. ವಿಶ್ವದ ಅನೇಕ ಭಾಗಗಳಗಲ್ಲಿ ವಿವಿಧ ಪ್ರಜಾತಿಯ ಡೈನೋಸಾರ್‌ಗಳ ಅಸ್ಥಿಪಂಜರಗಳು ನಮಗೆ ದೊರೆತಿವೆ.

ಜೈಸಲ್ಮೇರ್‌ನಲ್ಲಿ ಡೈನೋಸಾರ್‌ ಹೆಜ್ಜೆ ಗುರುತು ಪತ್ತೆ

ಅದರಂತೆ ಸುಮಾರು 150 ಮಿಲಿಯನ್ ವರ್ಷಗಳ ಹಿಂದೆ ಈ ಭೂಮಿಯ ಮೇಲೆ ಬದುಕಿದ್ದ ಅಲೋಸಾರಸ್ ಡೈನೋಸಾರ್‌ನ ಅಸ್ಥಿಪಂಜರವನ್ನು, ಫ್ರಾನ್ಸ್ ರಾಜಧಾನಿ ಪ್ಯಾರಿಸ್‌ನಲ್ಲಿ ಹರಾಜು ಹಾಕಲಾಗಿದೆ .

ಅಮೆರಿಕದ ವ್ಯೋಮಿಂಗ್‌ನಲ್ಲಿ ಪತ್ತೆಯಾದ ಅಲೋಸಾರಸ್ ಡೈನೋಸಾರ್‌ನ ಈ ಬೃಹತ್ ಅಸ್ಥಿಪಂಜರವನ್ನು, ಪ್ಯಾರಿಸ್‌ನ ವಸ್ತುಸಂಗ್ರಹಾಲಯದಲ್ಲಿ ನಡೆದ ಹರಾಜಿನಲ್ಲಿ ವ್ಯಕ್ತಿಯೋರ್ವ 3 ಮಿಲಿಯನ್ ಯೂರೋ(3.5 ಮಿಲಿಯನ್ ಅಮೆರಿಕನ್ ಡಾಲರ್)ಗೆ ಖರೀದಿಸಿದ್ದಾನೆ.

ಈ ಕುರಿತು ಮಾಹಿತಿ ನೀಡಿರುವ ಬಿನೋಚೆ ಮತ್ತು ಗಿಕ್ವೆಲ್ಲೊ ಹರಾಜು ಸಂಸ್ಥೆಯ ಸಲಹೆಗಾರ ಇಯಾಕೊಪೊ ಬ್ರಿಯಾನೊ, ಶೇ.70ರಷ್ಟು ಮೂಳೆಗಳನ್ನು ಜೋಡಿಸಿ ನಿರ್ಮಿಸಲಾಗಿರುವ ಈ ಅಸ್ಥಿಪಂಜರ ವಿಶ್ವದ ಉನ್ನತ ದರ್ಜೆಯ ಮಾದರಿ ಎಂದು ಹೇಳಿದ್ದಾರೆ.

ಗುಜರಾತ್‌: ಡೈನೋಸಾರ್ ಪಳಯುಳಿಕೆ ಪತ್ತೆ

ಪುನಃಸ್ಥಾಪಿಸಲಾದ ಅಸ್ಥಿಪಂಜರವು 3.5 ಮೀಟರ್ (11 ಅಡಿ) ಎತ್ತರ ಮತ್ತು 10 ಮೀಟರ್ ಉದ್ದವಿದ್ದು, ಇದರ ಪಕ್ಕೆಲಬುಗಳಲ್ಲಿ ಗಾಯದ ಗುರುತುಗಳಿವೆ. ಬಹುಶ: ಇದು ಮತ್ತೊಂದು ಅಲಾಸೋರಸ್ ಡೈನೋಸಾರ್ ಜೊತೆಗೆ ನಡೆದ ಕಾಳಗದಲ್ಲಿ ಮೃತಪಟ್ಟಿರಬಹುದು ಎಂದು ಅಂದಾಜಿಸಲಾಗಿದೆ .