ಸೋಲ್‌: ಕ್ಷಿಪಣಿ ದಾಳಿಯ ಮೂಲಕ ನಿಮ್ಮ ಹುಟ್ಟಡಗಿಸುತ್ತೇವೆ ಎಂಬ ಉತ್ತರ ಕೊರಿಯಾದ ಎಚ್ಚರಿಕೆಗೆ ಡೋಂಟ್‌ಕೇರ್‌ ಎಂದಿರುವ ಅಮೆರಿಕ ತನ್ನ ಮಿತ್ರ ರಾಷ್ಟ್ರ ದಕ್ಷಿಣ ಕೊರಿಯಾ ಜತೆಗೂಡಿ ಫೆಸಿಫಿಕ್‌ ತೀರದ ಸೇನಾ ನೆಲೆಗಳಲ್ಲಿ ಜಂಟಿ ಸಮರಾಭ್ಯಾಸ ನಡೆಸಿದೆ.
ಅಮೆರಿಕದ ಫೆಸಿಫಿಕ್‌ ಪ್ರಾಂತ್ಯದ ಗುವಾಮ್‌ ಮೇಲೆ ಖಂಡಾಂತರ ಕ್ಷಿಪಣಿ ದಾಳಿ ನಡೆಸುವುದಾಗಿ ಉತ್ತರ ಕೊರಿಯಾ ಗಂಭೀರ ಎಚ್ಚರಿಕೆ ನೀಡಿದ ಕೆಲವೇ ದಿನಗಳಲ್ಲಿ ಅದಕ್ಕೆ ಸಡ್ಡು ಹೊಡೆಯಲು ಅಮೆರಿಕ-ದಕ್ಷಿಣ ಕೊರಿಯಾ ಈ ಸಮರಾಭ್ಯಾಸ ಕೈಗೊಂಡಿವೆ. 'ಉಲ್ಚಿ ಫ್ರೀಡಂ ಗಾರ್ಡಿಯನ್‌' ಹೆಸರಿನ ಜಂಟಿ ಸಮರಭ್ಯಾಸ ಆಗಸ್ಟ್‌ ತಿಂಗಳಾಂತ್ಯದವರೆಗೂ ನಡೆಯಲಿದ್ದು, ಇದು ಈ ವಲಯದಲ್ಲಿ ಬಿಗುವಿನ ಸನ್ನಿವೇಶವನ್ನು ಮತ್ತಷ್ಟು ಹೆಚ್ಚಿಸಿದೆ. ಕಂಪ್ಯೂಟರ್‌ ನಿರ್ದೇಶಿತ ಶಸ್ತ್ರಾಸ್ತ್ರಗಳ ತರಬೇತಿ ಹಾಗೂ ಕ್ಷಿಪಣಿಗಳ ಪರೀಕ್ಷಾರ್ಥ ಪ್ರಯೋಗ ಸೇರಿದಂತೆ ನಾನಾ ಕಸರತ್ತುಗಳು ಇದರಲ್ಲಿ ಸೇರಿವೆ.
ಇದೊಂದು ಪ್ರಚೋದನಾತ್ಮಕ ಕ್ರಮ. ನಮ್ಮ ಮೇಲೆ ಅಣ್ವಸ್ತ್ರ ಬಾಂಬ್‌ ದಾಳಿ ನಡೆಸಲು ನಡೆಸುತ್ತಿರುವ ಪೂರ್ವ ತಯಾರಿ ಇದು. ಇಂತಹ ಬೆದರಿಕೆಗಳಿಗೆ ಬಗ್ಗುವುದಿಲ್ಲ. ತಕ್ಕ ಎದಿರೇಟು ನೀಡುತ್ತೇವೆ ಎಂದು ಉತ್ತರ ಕೊರಿಯಾ ಅಬ್ಬರಿಸಿದೆ. ಆದರೆ ಅಮೆರಿಕ ಮತ್ತು ದಕ್ಷಿಣ ಕೊರಿಯಾ ಮಾತ್ರ ಇದು ರಕ್ಷಣಾತ್ಮಕ ನಡೆ ಎಂದು ಸಮರ್ಥಿಸಿಕೊಂಡಿವೆ.