ಅಮೆರಿಕದ 'ಬೇಹುಗಾರ'ನನ್ನು ಗಲ್ಲಿಗೇರಿಸಿದ ಇರಾನ್

ಟೆಹ್ರಾನ್: ಅಮೆರಿಕದ ಬೇಹುಗಾರನಾಗಿ ಕೆಲಸ ಮಾಡುತ್ತಿದ್ದ 'ರಕ್ಷಣಾ ಇಲಾಖೆಯ ಗುತ್ತಿಗೆದಾರ' ನೊಬ್ಬನನ್ನು ಇರಾನ್ ಬಂಧಿಸಿ ಗಲ್ಲಿಗೇರಿಸಿದೆ ಎಂದು ಸುದ್ದಿಸಂಸ್ಥೆ ಐಎಸ್‌ಎನ್‌ಎ ವರದಿ ಮಾಡಿದೆ. ಕೆಲವು ದಿನಗಳ ಹಿಂದೆ ಅಮೆರಿಕದ ಗುಪ್ತಚರ ಜಾಲವೊಂದನ್ನು ನಾಶಪಡಿಸಿರುವುದಾಗಿ ಇರಾನ್ ಹೇಳಿಕೊಂಡಿತ್ತು. ಅದಾಗಿ ಕೆಲವೇ ದಿನಗಳಲ್ಲಿ ಈ ಘಟನೆ ನಡೆದಿದೆ.

'ರಕ್ಷಣಾ ಇಲಾಖೆಯ ಗುತ್ತಿಗೆದಾರ' ಜಲಾಲ್ ಹಾಜಿ ಝಾವರ್ ಅಮೆರಿಕದ ಬೇಹುಗಾರಿಕೆ ಸಂಸ್ಥೆ ಸಿಐಎ ಪರವಾಗಿ ಕೆಲಸ ಮಾಡುತ್ತಿದ್ದ' ಎಂದು ಇರಾನಿನ ಮಿಲಿಟರಿ ಅಧಿಕಾರಿಯನ್ನು ಉಲ್ಲೇಖಿಸಿ ಸುದ್ದಿಸಂಸ್ಥೆ ವರದಿ ತಿಳಿಸಿದೆ.

ಝಾವರ್‌ನನ್ನು ಬಂಧಿಸಿ ಮಿಲಿಟರಿ ಕೋರ್ಟಿನಲ್ಲಿ ವಿಚಾರಣೆಗೆ ಒಳಪಡಿಸಲಾಯಿತು. ಬಳಿಕ ಪಶ್ಚಿಮ ಟೆಹ್ರಾನ್‌ನ ಕರಾಜ್ ನಗರದ ರಜಾಯಿ ಶಹ್ರ್‌ ಜೈಲಿನಲ್ಲಿ ಗಲ್ಲಿಗೇರಿಸಲಾಯಿತು ಎಂದು ವರದಿ ಹೇಳಿದೆ. ಆತನನ್ನು ಯಾವಾಗ ಬಂಧಿಸಲಾಯಿತು ಎಂಬ ಮಾಹಿತಿಯಲ್ಲ. ಆದರೆ 2011ರಲ್ಲೇ ಇರಾನ್ ರಕ್ಷಣಾ ಇಲಾಖೆ ಆತನ ಗುತ್ತಿಗೆಗಳನ್ನು ರದ್ದುಪಡಿಸಿತ್ತು ಎಂದು ವರದಿ ತಿಳಿಸಿದೆ.

ಇರಾನ್ ಮೇಲೆ ಅಮೆರಿಕ ಸೈಬರ್ ದಾಳಿ: ಡ್ರೋನ್ ಹೊಡೆದುರುಳಿಸಿದ್ದಕ್ಕೆ ಪ್ರತೀಕಾರ

ಅಮೆರಿಕ ಮತ್ತು ಇರಾನ್ ನಡುವೆ ಕದನದ ಕಾರ್ಮೋಡ ಎದ್ದಿರುವಂತೆಯೇ ಈ ಬೆಳವಣಿಗೆ ಮತ್ತಷ್ಟು ಆತಂಕ ಸೃಷ್ಟಿಸಿದೆ.

ಇದೇ ರೀತಿ ಬೇಹುಗಾರಿಕೆ ಆರೋಪದಲ್ಲಿ ಝಾವರ್‌ನ ಮಾಜಿ ಪತ್ನಿಗೆ 15 ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ. ವಿಚಾರಣೆ ವೇಳೆ ತಾನು ಸಿಐಎ ಪರ ಬೇಹುಗಾರಿಕೆ ನಡೆಸುತ್ತಿರುವುದು ನಿಜ ಎಂದು ಝಾವರ್ ತಪ್ಪೊಪ್ಪಿಕೊಂಡಿದ್ದ. ಆತನ ಮನೆಯಿಂದ ಹಲವು ದಾಖಲೆಗಳನ್ನು ವಶಪಡಿಸಲಾಗಿದ್ದು, ಅವೆಲ್ಲವೂ ಬೇಹುಗಾರಿಕೆಗೆ ಸಾಕ್ಷಿಗಳಾಗಿದ್ದವು ಎಂದು ವರದಿ ಹೇಳಿದೆ.