ಲಂಡನ್‌ ಮಸೀದಿ ಬಳಿ ವ್ಯಾನ್‌ ದಾಳಿ: ಒಂದು ಸಾವು

ಲಂಡನ್‌: ನಾರ್ತ್‌ ಲಂಡನ್‌ನ ಮಸೀದಿಯೊಂದ ಬಳಿ ಸೇರಿದ್ದ ಜನರ ಮೇಲೆ ಮುಂಜಾನೆಯೇ ವ್ಯಕ್ತಿಯೊಬ್ಬ ವ್ಯಾನ್‌ ಚಲಾಯಿಸಿ ದಾಳಿ ನಡೆಸಿದ್ದು, ಘಟನೆಯಲ್ಲಿ ಒಬ್ಬರು ಮೃತಪಟ್ಟಿದ್ದಾರೆ. ಪ್ರಿನ್ಸ್‌ಬರಿ ಪಾರ್ಕ್‌ ಮಸೀದಿ ಬಳಿ ನಡೆದಿರುವ ಈ ದಾಳಿಯಲ್ಲಿ ಎಂಟು ಮಂದಿ ಗಾಯಗೊಂಡಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ.

ದಾಳಿಗೆ ಸಂಬಂಧಿಸಿದಂತೆ ಒಬ್ಬನನ್ನು ಪೊಲೀಸರು ಬಂಧಿಸಿದ್ದು, ಇದು ಉಗ್ರರ ಕೃತ್ಯವಾಗಿರಬಹುದು ಎಂಬ ಶಂಕೆ ವ್ಯಕ್ತಪಡಿಸಿದ್ದಾರೆ. ಚಾಲಕ ಆರೋಪಿ ಉದ್ದೇಶಪೂರ್ವಕವಾಗಿಯೇ ಮಸೀದಿಗೆ ಬಂದಿದ್ದ ಭಕ್ತರ ಮೇಲೆಯೇ ಚಲಾಯಿಸಿದ್ದಾನೆ ಎಂದು ಬ್ರಿಟನ್‌ನ ಮುಸ್ಲಿಂ ಕೌನ್ಸಿಲ್‌ ಹೇಳಿದೆ.

ಪ್ರಿನ್ಸ್‌ಬರಿ ಪಾರ್ಕ್‌ ಮಸೀದಿ ಬಳಿ ಜನರ ಮೇಲೆ ವ್ಯಾಣ್‌ ಹತ್ತಿಸಿ ದಾಳಿ ನಡೆದನ್ನು ಪೊಲೀಸರು ಖಚಿತಪಡಿಸಿರುವುದಾಗಿ ಪ್ರಧಾನಿ ಥೆರೆಸಾ ಮೆ ಹೇಳಿದ್ದು, ಅಧಿಕಾರಿಗಳ ತುರ್ತು ಸಭೆ ಕರೆದಿದ್ದಾರೆ.