ಬ್ಯಾಲಿಸ್ಟಿಕ್ ಮಿಸೈಲ್ ನೋಡಿ ನಗೆಬೀರಿದ ಕಿಮ್ ಜಾಂಗ್: ಎಚ್ಚರಿಕೆಯ ಗಂಟೆ ಎಂದ ಅಮೆರಿಕನ್ ವಿಶ್ಲೇಷಕರು!

ಖಂಡಾಂತರ ಕ್ಷಿಪಣಿಯಾಗಿರುವ ICBM ಕ್ಷಿಪಣಿ, 24 ಮೀಟರ್ ಉದ್ದ ಮತ್ತು 2.5 ಮೀಟರ್ ಅಗಲವಾಗಿದೆ. 100 ಟನ್ ಇಂಧನವನ್ನು ಸಾಗಿಸುವಷ್ಟು ಸಾಮರ್ಥ್ಯ ಹೊಂದಿರುವ ಈ ಕ್ಷಿಪಣಿಯನ್ನು ಲೋಡ್ ಮಾಡಲು ಹಲವು ಗಂಟೆಗಳ ಸಮಯ ಬೇಕು ಎಂದು ಹೇಳಲಾಗಿದೆ.

ಮಿಸೈಲ್ ಮತ್ತು ಮಾಸ್ಕ್: ಬೃಹತ್ ಮಿಲಿಟರಿ ಪರೇಡ್‌ಗೆ ಉತ್ತರ ಕೊರಿಯಾ ಸಜ್ಜಾದ ಬಗೆ ಇದು!

ಉಡಾವಣಾ ಸ್ಥಳದಲ್ಲಿ ಇಂಧನ ತುಂಬಲು ಸಾಧ್ಯವಿಲ್ಲದಿರುವುದರಿಂದ, ಮೊದಲೇ ಇಂಧನ ತುಂಬಿಸಿ ನಂತರ ಈ ಬೃಹತ್ ಕ್ಷಿಪಣಿಯನ್ನು ಉಡಾವಣಾ ಸ್ಥಳಕ್ಕೆ ತರಬೇಕು. ಆದರೆ ಒಮ್ಮೆ ಉಡಾವಣೆ ಕಂಡರೇ ಭಾರೀ ಅನಾಹುತವನ್ನು ಈ ಕ್ಷಿಪಣಿ ಹೊತ್ತು ತರಲಿದೆ ಎಂಬುದು ಅಮೆರಿಕನ್ ರಕ್ಷಣಾ ತಜ್ಞರ ಆತಂಕವಾಗಿದೆ.

ಇನ್ನು ICBM ಕ್ಷಿಪಣಿ ಪ್ರದರ್ಶನವನ್ನು ವೀಕ್ಷಿಸಿದ ಉತ್ತರ ಕೊರಿಯಾ ಸರ್ವಾಧಿಕಾರಿ ಕಿಮ್ ಜಾಂಗ್ ಉನ್, ಕ್ಷಿಪಣಿ ಹಾದು ಹೋಗುವಾಗ ನಗುಮುಖದಿಂದ ಅದನ್ನು ಸ್ವಾಗತಿಸಿದ್ದಾನೆ.

ಕಿಮ್-II ಸುಂಗ್ ಚೌಕದ ಮೂಲಕ ಖಂಡಾಂತರ ಕ್ಷಿಪಣಿ ಹಾದು ಹೋಗುವ ಸಂದರ್ಭದಲ್ಲಿ, ಕಿಮ್ ಜಾಂಗ್ ಉನ್ ಹಾಗೂ ಇತರ ಹಿರಿಯ ಸೇನಾಧಿಕಾರಿಗಳು ಕ್ಷಿಪಣಿಯನ್ನು ನಗುಮುಖದಿಂದ ಬರಮಾಡಿಕೊಂಡರು.

ಉಪಗ್ರಹದ ಮೂಲಕ ಸೆರೆಯಾದ ಉ.ಕೊರಿಯಾದ ಬ್ಯಾಲಿಸ್ಟಿಕ್ ಕ್ಷಿಪಣಿ ಹೊತ್ತೊಯ್ಯುವ ವಾಹನ!

ಕಿಮ್-II ಸುಂಗ್ ಚೌಕವನ್ನು ಕಿಮ್ ಜಾಂಗ್ ಉನ್‌ನ ತಾತನ ಹೆಸರಲ್ಲಿ ನಿರ್ಮಿಸಲಾಗಿರುವುದು ವಿಶೇಷ. ಕ್ಷಿಪಣಿಯನ್ನು ಹೊತ್ತ ವಿಶೇಷ ವಾಹನಗಳು ಒಂದಾದ ಮೇಲೊಂದರಂತೆ ಸರ್ವಾಧಿಕಾರಿಯ ಬಂಗಲೆಯ ಮುಂದೆ ಹಾದು ಹೋದವು.

ಉತ್ತರ ಕೊರಿಯಾದ ಖಂಡಾಂತರ ಕ್ಷಿಪಣಿ(ICBM) ಕುರಿತು ತೀವ್ರ ಆತಂಕ ವ್ಯಕ್ತಪಡಿಸಿರುವ ಅಮೆರಿಕನ್ ರಕ್ಷಣಾ ತಜ್ಞರು, ಇದು ಅಮೆರಿಕನ್ ಆಡಳಿತಕ್ಕೆ ಎಚ್ಚರಿಕೆಯ ಕರೆಗಂಟೆ ಎಂದು ಎಚ್ಚರಿಕೆ ನೀಡಿದ್ದಾರೆ.

ಈ ಕುರಿತು ಮಾತನಾಡಿರುವ ಮಿಡಲ್‌ಬರಿ ಇನ್‌ಸ್ಟಿಟ್ಯೂಟ್ ಆಫ್ ಇಂಟರ್‌ನ್ಯಾಷನಲ್ ಸ್ಟಡೀಸ್‌ನ ಜೆಫ್ರಿ ಲೂಯಿಸ್, ಅಲಾಸ್ಕಾದ ಯುಎಸ್ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯನ್ನು ಧ್ವಂಸ ಮಾಡುವ ಉದ್ದೇಶದಿಂದಲೇ ಈ ಕ್ಷಿಪಣಿಯನ್ನು ನಿರ್ಮಿಸಲಾಗಿದೆ ಎಂದು ಎಚ್ಚರಿಸಿದ್ದಾರೆ.

ಒಪ್ಲಾನ್ 5029: ಉತ್ತರ ಕೊರಿಯಾ ನಿರ್ನಾಮಕ್ಕೆ ಅಮೆರಿಕ ಹೆಣೆದ ಬಲೆಯೊಳಗೊಂದು ಸುತ್ತು...!

ICBM ಮೂರು ಅಥವಾ ನಾಲ್ಕು ಸಿಡಿತಲೆಗಳನ್ನು ಏಕಕಾಲದಲ್ಲಿ ಹೊತ್ತೊಯ್ದರೆ, ಪ್ರತಿ ಕ್ಷಿಪಣಿಯ ವಿರುದ್ಧ ರಕ್ಷಿಸಿಕೊಳ್ಳಲು ಯುಎಸ್ 12-16 ಇಂಟರ್‌ಸೆಪ್ಟರ್‌ಗಳಿಗೆ ಸುಮಾರು 1 ಬಿಲಿಯನ್ ಅಮೆರಿಕನ್ ಡಾಲರ್ ಖರ್ಚು ಮಾಡಬೇಕಾಗುತ್ತದೆ ಎಂದು ಲೂಯಿಸ್ ಅಭಿಪ್ರಾಯಪಟ್ಟಿದ್ದಾರೆ.

ಇನ್ನು ಉತ್ತರ ಕೊರಿಯಾದ ಆಡಳಿತಾರೂಢ ವರ್ಕರ್ಸ್ ಪಾರ್ಟಿಯ 75ನೇ ಸಂಸ್ಥಾಪನಾ ದಿನಾಚರಣೆಯನ್ನು ಅತ್ಯಂತ ವಿಜೃಂಭಣೆಯಿಂದ ಆಚರಿಸಲಾಗಿದ್ದು, ಕಿಮ್-II ಸುಂಗ್ ಚೌಕದಲ್ಲಿ ರಕ್ಷಣಾ ಪಡೆಗಳು ಆಕರ್ಷಕ ಕವಾಯತು ನಡೆಸಿದವು.

ಬಳಿಕ ದೇಶವನ್ನು ಉದ್ದೇಶಿಸಿ ಮಾತನಾಡಿದ ಸರ್ವಾಧಿಕಾರಿ ಕಿಮ್ ಜಾಂಗ್ ಉನ್, ವರ್ಕರ್ಸ್ ಪಾರ್ಟಿ ಉತ್ತರ ಕೊರಿಯಾವನ್ನು ಈ 75 ವರ್ಷಗಳಲ್ಲಿ ಅಭಿವೃದ್ಧಿಯ ಹೊಸ ಪಥದಲ್ಲಿ ಮುನ್ನಡೆಸಿದೆ ಎಂದು ಹೇಳಿದ್ದಾನೆ.

ಸಭೆಯಲ್ಲಿ ಪ್ರತ್ಯಕ್ಷನಾದ ಕಿಮ್ ಜಾಂಗ್: ಭೇದಿಸಲಾಗದ ಉ.ಕೊರಿಯಾ ಸರ್ವಾಧಿಕಾರಿಯ ಸಾವಿನ ರಹಸ್ಯ!

ಬಲಿಷ್ಠ ಉತ್ತರ ಕೊರಿಯಾ ನಿರ್ಮಾಣಕ್ಕೆ ಸರ್ಕಾರ ಬದ್ಧವಾಗಿದ್ದು, ಜನತೆಯ ಸಹಕಾರಿಂದ ಉತ್ತರ ಕೊರಿಯಾವನ್ನು ಜಾಗತಿಕ ಬಲಿಷ್ಠ ರಾಷ್ಟ್ರವನ್ನಾಗಿ ಮಾಡಲಾಗುವುದು ಎಂದು ಕಿಮ್ ಜಾಂಗ್ ಉನ್ ಈ ವೇಳೆ ಸಾರಿದ್ದಾನೆ.

ಒಟ್ಟಿನಲ್ಲಿ ಉತ್ತರ ಕೊರಿಯಾದ ಖಂಡಾಂತರ ಕ್ಷಿಪಣಿ ಅಮೆರಿಕನ್ ರಕ್ಷಣಾ ತಜ್ಞರ ನಿದ್ದೆಗೆಡೆಸಿದ್ದು, ನವೆಂಬರ್ ಬಳಿಕ ಚುನಾಯಿತರಾಗಿ ಬರುವ ಮುಂದಿನ ಅಧ್ಯಕ್ಷರು ಈ ಕುರಿತು ನಿಗಾವಹಿಸಬೇಕು ಎಂದು ಆಗ್ರಹಿಸಿದ್ದಾರೆ.